Lanmou se lè yon moun gen gwo afeksyon pou lòt moun. Yon moun ki gen lanmou pou yon lòt moun ap montre sa nan pawòl li, nan fason l aji, menm lè sa ka mande pou l fè sakrifis.

Moyiz te montre l renmen Bondye. Ki sa l te fè pou l montre sa? Bon, sonje pawòl nou jwenn nan 1 Jan 5:3: “Men sa lanmou pou Bondye vle di: se pou nou obeyi kòmandman l yo.” Etandone Moyiz te renmen Jewova, li te obeyi kòmandman l yo. Moyiz te obeyi tout sa Bondye te mande l fè, kit sa te mande anpil kouraj tankou fè fas ak Farawon ki te gen anpil pouvwa, kit se te yon senp aksyon tankou lonje baton l sou lanmè Wouj la. Menm lè sa Bondye te mande a te fasil pou Moyiz, menm lè l te difisil pou li, li te obeyi Bondye kanmenm. Men sa Bib la fè nou konnen: “Wi, li fè tout bagay jan [Jewova] te mande l la.” — Egzòd 40:16.

Moyiz te montre l gen lanmou pou Izrayelit parèy li yo. Izrayelit yo te rekonèt Jewova t ap itilize Moyiz pou l gide yo. Konsa, yo te vin devan Moyiz ak tout kalite pwoblèm yo te genyen. Men sa nou li: “Depi maten jouk aswè, moun t’ap pase devan Moyiz.” (Egzòd 18:13-16). Imajine jan sa te dwe fatigan pou Moyiz k ap koute Izrayelit yo k ap rakonte l tètchaje yo depi nan maten rive nan aswè, san pran souf! Ak tout sa, Moyiz te kontan ede pèp la paske l te renmen yo.

Anplis koute Moyiz t ap koute pèp la li te renmen an, li te konn priye pou yo. Li te menm priye pou moun ki te pale l mal! Pa egzanp, lè Miryam, sè Moyiz la, te pale kont Moyiz, Jewova te lage lèp sou Miryam. Olye Moyiz te kontan paske Jewova te pini Miryam, li te pito kouri mande Bondye pou l padone Miryam. Men priyè li te fè: “Bondye, tanpri, geri l non!” (Nonb 12:13). Ki sa ankò ki te ka pouse l fè yon priyè konsa si se pa t lanmou l te genyen?

Nou ka imite egzanp Moyiz la lè n fè efò pou n vin gen yon gwo lanmou pou Bondye. Yon lanmou konsa pouse n pou n obeyi kòmandman l yo “ak tout kè nou”. (Women 6:17.) Lè n obeyi Jewova ak tout kè n, nou fè l kontan (Pwovèb 27:11). Anplis de sa, nou jwenn anpil byenfè. An reyalite, lè n sèvi Bondye ak tout kè n, nou pap sèlman ap fè sa ki dwat, men n ap pran plezi pou n fè yo! — Sòm 100:2.

Yon lòt fason nou ka imite Moyiz se lè n demontre nou renmen lòt moun e nou dispoze fè sakrifis pou yo. Lè zanmi n oubyen fanmi n vin rakonte n pwoblèm yo, lanmou nou gen pou yo ap pouse n 1) ba yo tout atansyon nou, 2) mete nou nan po yo oubyen eseye konprann santiman yo, e 3) fè yo konnen nou gen sousi pou yo.

Menm jan ak Moyiz, nou ka priye pou moun nou renmen yo. Sa ka rive, apre yo fin fè n konnen tout tètchaje y ap rankontre yo, nou ka santi nou pa ka fè anyen pou yo. Avèk tristès, nou ka di moun nan: “Sèl sa m ka fè pou ou se priye.” Men, pa bliye: “Lè yon moun ap viv dwat devan Bondye, lapriyè moun sa a gen anpil pouvwa.” (Jak 5:16, Bib la). Priyè n fè pou moun nan ka pouse Jewova fè yon bagay pou moun sa a, yon bagay petèt Jewova pa t ap fè si n pa t fè priyè sa a. An reyalite, ki sa n ta ka fè ki te ka pi bon pase priye pou moun nou renmen yo *?

Èske w pa dakò nou ka aprann anpil bagay nan egzanp Moyiz kite pou nou? Malgre li te yon moun tankou tout moun, li kite yon bèl egzanp pou n suiv nan domèn lafwa, imilite ak lanmou. Plis nou fè efò pou n imite egzanp li kite, se plis n ap jwenn byenfè pou tèt nou e n ap fè lòt moun jwenn byenfè tou. — Women 15:4.