Èske w kwè Bondye egziste? Si repons lan se wi, èske w ka bay prèv ki montre li egziste? Alaverite, nou antoure ak prèv ki montre gen yon Kreyatè ki egziste ki gen sajès, ki gen pisans, e ki gen lanmou. Ki prèv sa yo e ki jan yo ka ede nou kwè Bondye egziste? Pou nou jwenn repons kesyon sa yo, ann egzamine pawòl apot Pòl te di nan lèt li te voye bay kretyen ki nan vil Wòm yo.

Men sa Pòl te di: “Kalite [Bondye] yo ki envizib, sètadi pisans li ki etènèl e lefètke se li menm reyèlman ki Bondye, parèt klè depi nan kreyasyon monn nan, paske moun rive wè yo nan bagay li fè yo, e konsa, yo san eskiz.” ​(Women 1:20). Jan apot Pòl montre sa, nou ka wè anprent kreyatè a nan bagay li kreye yo. Ann egzamine kèk ekspresyon nou jwenn nan pawòl Pòl te di yo.

Pòl di nou ka wè kalite Jewova yo nan “kreyasyon monn nan”. Nan kontèks sa a, mo grèk lè yo tradui l ki bay “monn” nan, pa fè referans ak planèt tè a, men li fè referans ak limanite a. Donk, Pòl te vle di, yon fwa Bondye te fin kreye premye moun yo, yo te ka wè aklè kalite l genyen yo nan bagay li kreye yo.

Nou ka wè prèv sa yo tout kote. Prèv sa yo pa kache nan lanati, tout “parèt klè”. Tout kreyasyon an nèt, soti nan bagay ki pi gwo rive nan bagay ki pi piti, montre aklè, nonsèlman gen yon Kreyatè ki egziste, men tou li gen anpil bèl kalite lakay li. Jan sa parèt klè nan lanati, Bondye te byen fè tout bagay, èske sa pa montre sajès li gen lakay li? Èske syèl la ki chaje ak zetwal ansanm ak gwo vag lanmè k ap frape sou resif yo pa montre pouvwa l genyen? Èske yon bèl solèy k ap leve, yon bèl solèy k ap kouche, pakèt varyete manje ki genyen yo, manje ki bon nan bouch nou, pa fè nou wè lanmou l gen lakay li? — Sòm 104:24; Izayi 40:26.

Jis nan ki pwen prèv sa yo parèt klè? Prèv sa yo tèlman klè, sa fè moun ki pa wè yo oubyen ki pa vle kwè Bondye egziste “san eskiz”. Gen yon moun ki fè rechèch nan domèn nan ki sèvi ak bèl egzanp ki vin apre a pou l montre sa. Imajine gen yon chofè ki wè yon pano sou wout li ki make “Tounen, epi vire agoch”, men li pa okipe l. Yon polisye kanpe l epi li ba l yon kontravansyon. Chofè a ap fè diskisyon, li di li pa t wè pano a. Men polisye a pa kwè l, paske pano a parèt byen klè, epi chofè a pa gen okenn pwoblèm nan je pou l pa ta wè pano a. Mete sou sa, antanke chofè, se responsablite l pou l wè tout pano ki sou wout la e pou l suiv enstriksyon ki sou yo. Se konsa sa ye tou pou prèv ki montre Bondye egziste yo, yo parèt klè nan lanati. Tout moun ka wè “prèv” sa yo. Antanke kreyati entèlijan, nou kapab wè yo. Se sa k fè pa gen okenn eskiz pou moun ki pran pòz yo pa wè yo.

Anfèt, kreyasyon an se yon liv ki revele anpil bagay sou Kreyatè nou an. Men gen yon lòt liv ki revele plis bagay sou li toujou, se Bib la. Grasa Bib la, nou ka jwenn repons pou kesyon enpòtan sa a: Ki objektif Bondye gen ni pou tè a ni pou moun ki abite sou li? Si w jwenn repons kesyon sa a, sa ap ede w vin pi pwòch Bondye, li menm ‘kalite l yo ki envizib parèt klè’ nan monn ki antoure nou an.