Nan tan biblik yo, Bondye te konn sèvi ak jij pou l delivre pèp li a anba enjistis (Jij 2:18). Bib la dekri Jou jijman k ap vini an kòm yon moman ki bay kè kontan kote Jewova, Jij tout tè a, pral delivre limanite anba enjistis. — Li Sòm 96:12, 13; Izayi 26:9.

Bondye chwazi Jezi pou l bay ni moun ki vivan ni moun ki mouri jistis (Travay 10:42; 17:31). Gen anpil moun ki mouri ki pa t gentan konnen Bondye. Pandan Jou jijman an, Jezi ap resisite moun sa yo pou yo ka aprann konnen vrè Dye a e pou yo ka renmen l. — Li Travay 24:15.

Bondye pral resisite moun ki mouri yo pandan rèy mil an an (Revelasyon 20:4, 12). Y ap bezwen tan pou yo aprann konnen chemen Bondye yo e pou yo obeyi l. Kontrèman ak sa anpil moun panse, Bib la fè konnen se sou baz sa moun yo fè apre yo fin resisite yo pral jije yo. — Li Women 6:7.

Anplis de sa, Bib la pale konsènan yon jou jijman ki pral rive sanzatann, anvan rèy mil an an. Jan yo te pale de sa nan atik ki nan kòmansman peryodik sa a, yo rele jou sa a lafen tou. Nan jou sa a, Bondye pral detwi tout moun ki pa gen respè pou li yo, moun ki mechan yo (2 Pyè 3:7). Kidonk, nou dwe fè tout sa nou kapab pou n pwouve nou renmen Bondye. — Li 2 Pyè 3:9, 13.