Yon pwofesi se yon mesaj Bondye enspire, yon revelasyon Bondye bay. Bib la di pwofèt yo “te pale pawòl ki soti nan Bondye, pandan lespri sen t ap gide yo”. (2 Pyè 1:20, 21.) Alò, yon pwofèt se yon moun ki resevwa mesaj nan men Bondye pou l bay lòt moun. — Travay 3:18.

Ki jan pwofèt yo te resevwa enfòmasyon nan men Bondye?

 Bondye te sèvi ak plizyè metòd pou l fè pwofèt yo konnen panse l:

•   Sou fòm ekri. Bondye te sèvi ak metòd sa a nan omwen yon ka lè l te bay Moyiz Dis Kòmandman yo sou fòm ekri. — Egzòd 31:18.

•   Pa mwayen zanj. Pa egzanp, Bondye te sèvi ak yon zanj pou l bay Moyiz enstriksyon konsènan mesaj li t ap gen pou l bay Farawon (Egzòd 3:2-4, 10). Lè sa te nesesè pou yo ekri pawòl yo yon fason byen presi, Bondye te voye zanj yo pou yo dikte mesaj li bay pwofèt yo, jan l te fè sa avèk Moyiz lè l te di: “W ap ekri pawòl sa yo, paske se selon pawòl sa yo m ap fè yon alyans avèk ou e avèk pèp Izrayèl la.” — Egzòd 34:27 a.

•   Vizyon. Pafwa, pwofèt yo te resevwa vizyon yo pandan yo te je klè, pandan yo te eveye (Ezayi 1:1; Abakouk 1:1). Kèk vizyon te tèlman reyèl, moun ki te resevwa yo te patisipe ladan yo (Lik 9:28-36; Revelasyon 1:10-17). Gende lè moun sa yo te resevwa yon vizyon pandan yo nan yon eta kote yo pa posede yo (Travay 10:10, 11; 22:17-21). Bondye te sèvi ak rèv tou pou l bay kèk pwofèt mesaj li pandan yo t ap dòmi. — Dànyèl 7:1; Travay 16:9, 10.

•   Direksyon nan lespri. Bondye te dirije lespri pwofèt yo pou l te kapab ba yo mesaj li. Se sa nou jwenn nan yon deklarasyon nan Bib la: “Tout sa ki nan Ekriti yo se Bondye ki enspire yo.” Ekspresyon “se Bondye ki enspire yo” a ka vle di tou se “Bondye ki soufle” yo. (2 Timote 3:16, The Emphasized Bible). Bondye te sèvi ak lespri sen oswa fòs aktif li pou l “soufle” ide pa l nan lespri sèvitè l yo. Se nan Bondye mesaj la te soti, men se te pwofèt yo ki te chwazi pwòp mo pa yo pou yo transmèt li. — 2 Samyèl 23:1, 2.

Èske pwofesi toujou anonse sa k pral rive?

 Non, pwofesi ki nan Bib la pa anonse sa k pral rive nan lavni sèlman. Men, pifò mesaj Bondye te bay te gen rapò avèk lavni menmsi se endirèkteman. Pa egzanp, pwofèt yo te bay avètisman plizyè fwa pou Izrayelit yo chanje move konduit yo te genyen. Avètisman sa yo te pale konsènan ni benediksyon yo t ap resevwa si yo te aksepte koute avètisman sa yo, ni konsènan malè ki t ap tonbe sou yo si yo te refize koute yo (Jeremi 25:4-6). Fason bagay yo te fini pou Izrayelit yo te depann de chemen yo te suiv la. — Detewonòm 30:19, 20.

Kèk egzanp pwofesi ki pa t bagay yo te anonse k ap rive

•   Nan yon okazyon, lè Izrayelit yo te mande Bondye pou l ede yo, li te voye yon pwofèt pou l esplike yo se paske yo te refize obeyi Bondye ki fè l pa t ede yo. — Jij 6:6-10.

•   Lè Jezi te pale ak yon Samaritèn, li te devwale bagay ki te deja rive nan lavi Samaritèn nan. Sèl fason Jezi te kapab konnen bagay sa yo se te paske Bondye te revele l bagay ki te kache. Samaritèn nan te rekonèt Jezi kòm yon pwofèt menm lè l pa t anonse anyen konsènan lavni. — Jan 4:17-19.

•   Pandan yo t ap jije Jezi, ènmi l yo te kouvri figi l, yo te ba l kou epi apre yo te di l: “Pwofetize non. Ki moun ki frape w la a?” Yo pa t mande Jezi pou l anonse lavni, non, men yo te vle pou l sèvi ak pouvwa Bondye ba li pou l di yo ki moun ki te frape l. — Lik 22:63, 64.