Bondye gen kapasite pou l wè tout bagay e pou l aji nenpòt kote l vle (Pwovèb 15:3; Ebre 4:13). Sepandan, Bib la pa anseye Bondye toupatou, kòmkwa l prezan tout kote, li la nan tout bagay. Olye de sa, li montre Bondye se yon moun e l gen yon kote l abite.

•   Fòm Bondye: Bondye se yon espri (Jan 4:24). Lèzòm pa ka wè l (Jan 1:18). Nan tout vizyon Bib la rakonte ki gen rapò ak Bondye, yo toujou dekri l kòm yon moun ki yon kote ki fiks. Bib la pa janm dekri l kòm yon moun ki egziste tout kote. — Ezayi 6:1, 2; Revelasyon 4:2, 3, 8.

•   Kote Bondye abite: Bondye abite nan monn envizib la, yon monn ki diferan ak monn fizik la. Nan monn envizib la, Bondye gen yon ‘kote l rete nan syèl la’. (1 Wa 8:30.) Bib la pale de yon fwa kote kreyati espirityèl yo “te antre vin devan Jewova a”, sa ki montre nan yon sans Bondye abite yon kote ki fiks. — Jòb 1:6.

Si Bondye pa toupatou, èske l ka pran swen m toutbon?

 Wi. Bondye gen bonjan sousi pou lèzòm. Aktout l ap viv nan monn envizib la, li wè ki moun sou tè a ki vle fè l plezi toutbon e l aji an favè yo (1 Wa 8:39; 2 Kwonik 16:9). Ann wè ki jan Jewova montre l gen sousi pou moun k ap adore l ak tout kè yo:

•   Lè w priye: Jewova ka tande yon priye w fè menm moman w fè l la. — 2 Kwonik 18:31.

•   Lè w deprime: “Jewova toupre moun kè yo ap fann yo, li sove moun ki gen lespri yo kraze.” — Sòm 34:18.

•   Lè w bezwen direksyon: Jewova “ap fè w gen bon konprann” e l ap enstwi w grasa Pawòl li a, Labib. — Sòm 32:8.

Rezon ki fè kèk moun panse Bondye toupatou

 Sa yo panse: Sòm 139:8 montre Bondye toupatou lè l di: “Si m ta monte nan syèl la, w ap la. Si m ta ranje kabann mwen nan Tonm nan, w ap jwenn mwen la.”

 Sa ki verite: Vèsè sa a pap pale konsènan kote Bondye ye. Yon fason powetik, li montre pa gen okenn kote ki twò lwen pou Bondye aji an favè nou.