Ki jan Jezi sove nou?

FÈ L JWE

Repons Bib la bay

Jezi te sove moun ki fidèl yo lè l te bay lavi l pou yo kòm ranson (Matye 20:28). Se poutèt sa Bib la rele l “sovè monn nan”. (1 Jan 4:14.) Epitou, Labib di: “Okenn lòt moun pa ka ban nou delivrans, paske Bondye pa t bay non okenn lòt moun anba syèl la pami lèzòm ki ka pèmèt nou sove.” — Travay 4:12.

Jezi te ‘goute lanmò pou tout moun’ ki demontre yo gen lafwa nan li (Ebre 2:9; Jan 3:16). Annapre, “Bondye leve l sot nan lanmò”, li te vin yon espri e li te monte nan syèl la (Travay 3:15). Detan nan syèl la, Jezi kapab ‘sove moun ki pwoche bò kot Bondye grasa li yo totalman, paske l ap toujou vivan pou l sipliye pou yo’. — Ebre 7:25.

Poukisa nou bezwen Jezi sipliye pou nou?

Nou tout se pechè (Women 3:23). Peche mete yon baryè ant nou menm ak Bondye, e se lanmò peche a pote pou nou (Women 6:23). Men, Jezi se “yon avoka” pou moun ki demontre yo gen lafwa nan sakrifis li te bay kòm ranson an (1 Jan 2:1, nòt). L ap sipliye pou yo, donk, l ap mande Bondye pou l koute priyè yo e pou l padone peche yo sou baz lanmò li, ki se yon sakrifis (Matye 1:21; Women 8:34). Bondye reponn demann sa yo Jezi fè paske moun sa yo ap viv ann amoni ak volonte l. Bondye te voye Jezi sou tè a “pou monn nan ka sove grasa li”. — Jan 3:17.

Èske depi nou annik kwè nan Jezi n ap sove?

Non. Se vre nou dwe kwè nan Jezi pou n ka sove, men gen lòt bagay ankò nou dwe fè (Travay 16:30, 31). Men sa Labib di: “Menm jan kò ki san espri a mouri, se konsa tou lafwa ki pa gen bon aksyon mache avè l la mouri.” (Jak 2:26). Pou nou ka sove, nou dwe:

Aprann konnen Jezi ak Jewova, Papa l. — Jan 17:3.
Chèche gen yon lafwa solid nan yo. — Jan 12:44; 14:1.
Demontre nou gen lafwa nan yo lè nou obeyi kòmandman yo bay (Lik 6:46; 1 Jan 2:17). Jezi te fè konnen se pa tout moun ki t ap rele l “Seyè” ki t ap sove, men se sèlman moun ki “fè volonte Papa [l] ki nan syèl la” ki t ap sove. — Matye 7:21.
Kontinye demontre lafwa nou genyen an malgre eprèv n ap rankontre yo. Jezi te montre sa byen klè lè l te di: “Moun ki andire jiska lafen, se moun sa a k ap sove.” — Matye 24:13.