Lespri sen se fòs Bondye itilize pou l aji, se fòs aktif li (Miche 3:8; Lik 1:35). Bondye voye lespri l lè l voye fòs li nenpòt kote pou fè volonte l fèt. — Sòm 104:30; 139:7.

 Nan Bib la, yo mete “espri” pou yo tradui yon mo ebre ki se rouwa ak yon mo grèk ki se nema. Pi souvan, mo sa yo fè referans ak fòs Bondye itilize pou l aji a oswa lespri sen l (Jenèz 1:2). Men, Bib la sèvi ak mo sa yo tou nan lòt sans:

•   Souf. — Abakouk 2:19; Revelasyon 13:15.

•   Van. — Jenèz 8:1; Jan 3:8.

•   Fòs ki pèmèt kreyati ki vivan yo aji. — Jòb 34:14, 15.

•   Mantalite oswa fason yon moun wè bagay yo. — Nonb 14:24.

•   Espri yo, anpalan de Bondye ak zanj yo. — 1 Wa 22:21; Jan 4:24.

 Tout mo ak ekspresyon sa yo gen sans yon bagay moun pa ka wè men ki gen efè tout moun ka wè. Menm jan an tou, lespri Bondye “tankou van, moun pa ka wè l, yo pa ka touche l e l gen pisans”. — An Expository Dictionary of New Testament Words, se W. E. Vine ki ekri l.

 Bib la pale tou de lespri sen Bondye antanke “men” l oswa “dwèt” li (Sòm 8:3; 19:1; Lik 11:20; konpare ak Matye 12:28). Menm jan yon atizan sèvi ak men l ak dwèt li pou l fè travay li, se konsa tou Bondye sèvi ak lespri l pou l fè yon seri bagay tankou:

•   Linivè. — Sòm 33:6; Ezayi 66:1, 2.

•   Labib. — 2 Pyè 1:20, 21.

•   Mirak sèvitè l yo nan tan lontan te konn fè yo ak jan yo te chofe nan travay predikasyon an. — Lik 4:18; Travay 1:8; 1 Korentyen 12:4-11.

•   Bèl kalite moun ki obeyi l yo demontre. — Galat 5:22, 23.

Lespri sen pa yon moun

 Bib la montre lespri Bondye pa yon moun lè li pale de li antanke “men” l “dwèt” li oswa “souf”. (Egzòd 15:8, 10.) Men yon atizan pa ka fonksyone san kò ak lespri atizan an, menm jan an tou, lespri sen Bondye aji sèlman anba direksyon Bondye (Lik 11:13). Bib la konpare lespri Bondye tou ak dlo e li makònen l ak yon seri bagay tankou lafwa ak konesans. Konparezon sa yo montre aklè lespri sen pa yon moun. — Ezayi 44:3; Travay 6:5; 2 Korentyen 6:6.

 Bib la bay non Bondye, Jewova ak non pitit li a, Jezi Kris, men pa gen yon kote li bay non lespri sen (Ezayi 42:8; Lik 1:31). Lè yo t ap touye premye kretyen yo, pa mwayen yon mirak, Etyèn te wè syèl la nan yon vizyon, li te wè de moun sèlman, li pa t wè twa. Men sa Bib la di: “li menm, ki te ranpli ak lespri sen, li fikse syèl la, li wè glwa Bondye, e li wè Jezi ki kanpe adwat Bondye.” ​(Travay 7:55). Lespri sen se te pisans Bondye ki t ap aji e se li ki te pèmèt Etyèn wè vizyon sa a.

 Sa moun yo panse: “Sentespri” a oswa lespri sen se yon moun e li fè pati yon dye an twa pèsonn, jan sa parèt nan 1 Jan 5:7,8 nan Labib Wa Jak la (anglè).

 Sa ki verite: Nan Labib Wa Jak la (anglè) nan 1 Jan 5:7, 8, yo mete “nan syèl la gen yo twa, Papa a, Pawòl la ak Sentespri a. E yo twa a fè yon sèl. E yo twa bay temwayaj sou tè a”. Sepandan moun k ap fè rechèch yo dekouvri apot Jan pa t ekri pawòl sa yo e yo pa nan Bib la. Men sa yon biblis ki rele Bruce M. Metzger ekri: “Li klè pawòl sa yo fo e yo pa gen dwa mete yo nan Nouvo Testaman an.” — A Textual Commentary on the Greek New Testament.

 Sa moun yo panse: Bib la pale de lespri sen kòm yon moun, se prèv se yon moun li ye.

 Sa ki verite: Se vre pafwa Labib pale de lespri sen kòm yon moun, men sa pa pwouve lespri sen se yon moun. Labib pale tou de sajès, lanmò ak peche kòm moun (Pwovèb 1:20; Women 5:17, 21). Pa egzanp, Bib la di sajès fè “aksyon” e l gen “pitit” e l fè konnen peche sedui moun, touye moun e l pwodui tout kalite tanta nan moun. — Matye 11:19; Lik 7:35; Women 7:8, 11.

 Menm jan an tou, apot Jan te repete pawòl Jezi te di yo lè l t ap pale de lespri sen kòm yon moun, yon “èd” ki t ap bay disip yo prèv, ki t ap gide yo, tande yo, fè deklarasyon, bay glwa epi resevwa. Li enpòtan pou n note lè Jan t ap pale de lespri sen an, li te sèvi ak mo nema a ki se yon non ki net e l te sèvi ak pwonon “li” a ki pa ni maskilen ni feminen. — Jan 16:7-15.

 Sa moun yo panse: Lefètke yo batize moun nan non lespri sen, sa pwouve lespri sen se yon moun.

 Sa ki verite: Pafwa Labib itilize mo “non” an pou l pale de pouvwa oswa otorite yon moun (Detewonòm 18:5, 19-22; Estè 8:10). Yo sèvi avè l nan ekspresyon anglè “nan non lalwa” a, sa pa vle di lwa a se yon moun. Yon moun ki batize nan “non” lespri sen an rekonèt pouvwa lespri a genyen ak wòl li jwe nan reyalizasyon volonte Bondye. — Matye 28:19.

 Sa moun yo panse: Apot Jezi yo ak disip yo nan premye syèk la te kwè lespri sen se yon moun.

 Sa ki verite: Ni Labib ni listwa pa rapòte sa. Men sa yon ansiklopedi fè konnen: “Se nan gwo reyinyon yo te fè nan vil Konstantinòp nan ane 381 [...] yo fè konnen lespri sen se yon moun.” Sa te fèt plis pase 250 an apre dènye apot la fin mouri.