Yo konnen Temwen Jewova yo kòm yon relijyon ki fè anpil travay tradiksyon. Rive nan mwa novanm 2014, nou tradui Bib la nan 125 lang e nou tradui piblikasyon nou yo ki baze sou Bib la nan 742 lang. Nan travay tradiksyon n ap fè a, nou tradui videyo tou. Rive nan mwa janvye 2015, videyo ki gen tit Ki sa yo fè nan yon Sal Wayòm? nan te disponib nan 398 lang, e videyo ki gen tit Poukisa nou dwe etidye Labib? la te disponib nan 569 lang. Poukisa tout travay sa a? E ki jan Temwen yo rive reyalize tout travay sa a?

Nan mwa mas 2014, Kolèj santral Temwen Jewova yo te bay filyal ki sou tout tè a enstriksyon pou yo prepare anrejistreman odyo ak videyo nan plis lang posib pou ankouraje moun etidye Labib.

Gen plizyè etap pou yo tradui yon videyo. Premyèman, ekip tradiksyon an tradui tèks la. Dezyèmman, yo chwazi yon moun pou fè chak vwa ki nan videyo a. Twazyèmman, ekip odyo videyo a anrejistre odyo a nan lang nan, epi, si gen tèks ki parèt sou ekran an, yo travay sou yo. Apre sa, yo konbine odyo a, tèks la ak videyo a pou yo bay yon travay fini y ap mete sou sit la.

Gen kèk filyal ki te gen stidyo ak yon pèsonèl ki kalifye pou fè travay sa a. Men, ki jan travay sa a te rive fèt pou lang yo pale e yo tradui ladan yo nan zòn ki izole?

Toupatou sou tè a, te gen yon seri teknisyen ki te gen sistèm anrejistreman pòtatif ki te fè travay sa a. Teknisyen sa yo annik mete yon stidyo tanporè sou pye nan yon biwo, yon Sal Wayòm oswa nan yon mezon prive. Yo sèvi ak yon mikwo e ak yon laptòp ki gen yon pwogram pou anrejistreman odyo. Moun ki pale lang nan sèvi kòm lektè, kòm kotch ak moun k ap fè dènye verifikasyon. Lè anrejistreman an fini e yo jwenn apwobasyon pou li, teknisyen yo ranmase ekipman yo epi y al nan yon lòt lokalite.

Avèk metòd sa a, te vin gen videyo nan twa fwa plis lang pase anvan.

Anpil moun kontan poutèt videyo sa yo. Pou anpil moun, se premye videyo yo wè nan pwòp lang yo.

Youn nan lang yo te fè videyo sa yo se Pitjantjatjara. Gen anviwon 2 500 moun ki pale lang sa a ann Ostrali. Videyo sa yo te fèt nan yon lokalite yo rele Alice Spring nan Tèritwa ki nan nò a. Callan Thomas, yon moun ki te patisipe nan pwodui anrejistreman odyo yo, di: “Videyo yo te jwenn anpil siksè. Moun yo te kanpe la ap gade tablèt la e yo te kontinye ap mande ki kote yo ka jwenn lòt videyo konsa. Li pa fasil pou moun jwenn piblikasyon nan lang sa a. Lè yo tande yon piblikasyon nan lang yo, e espesyalman lè yo wè youn, yo sezi.”

Nan peyi Kamewoun, te gen de Temwen sou yon rivyè, ki t ap deplase nan sans kontrè rivyè a sou yon bwafouye. Yo rete nan yon vilaj kote gen Pigme ki abite la e yo pale ak chèf vilaj la, yon pwofesè k ap fè kou nan youn nan lekòl ki nan vilaj la. Lè frè yo te aprann chèf vilaj la te pale Basa, frè yo te sèvi ak yon tablèt pou yo pase videyo Poukisa nou dwe etidye Labib? la pou li nan pwòp lang li. Chèf la te enpresyone anpil e li te mande pou yo ba l kèk piblikasyon enprime.

Nan yon vilaj nan peyi Endonezi, chèf relijye zòn nan ki opoze ak Temwen yo te boule tout piblikasyon Temwen yo te distribye nan zòn nan. Gen lòt moun nan vilaj la ki te manase pou yo boule Sal Wayòm nan. Annapre, gen 4 polisye ki al lakay yon fi ki Temwen Jewova e yo poze li menm ak fanmi l yon seri kesyon. Yo te bezwen konnen ki sa yo fè lè y al nan Sal Wayòm nan. Kidonk, sè a pase videyo ki gen tit Ki sa yo fè nan yon Sal Wayòm? pou yo nan lang endonezyen.

Apre yo fin gade videyo a, gen youn nan polisye yo ki di: “Kounye a mwen rann mwen kont moun yo pa konprann nou e yo pa vrèman konn anyen sou nou.” Gen yon lòt polisye ki te mande: “Èske m ka jwenn videyo sa a pou m ka montre lòt moun li? Videyo sa a bay bonjan enfòmasyon sou nou.” Kounye a, polisye yo gen yon bon opinyon sou Temwen Jewova yo e yo ba yo pwoteksyon.

Si w poko wè videyo sa yo, nou ankouraje w gade yo nan pwòp lang ou.