Chak jou, prizonye ki nan sant koreksyon nan peyi Etazini ekri biwo Temwen Jewova yo plizyè dizèn lèt pou yo mande èd pou yo ka aprann konn Bondye.

Pou n reponn demann sa yo, nou pran dispozisyon pou moun k ap sèvi nan kongregasyon ki nan zòn nan vizite moun ki nan prizon, moun ki nan lopital sikyatri, jèn ki nan sant pou delenkan ansanm ak moun ki nan sant pou ede yo venk dwòg ak lòt sibstans ankò, e pou yo etidye Labib ak moun sa yo.

Nan kèk prizon, frè nou yo òganize reyinyon kongregasyon yo regilyèman. Pa egzanp, nan yon prizon, te gen 32 moun ki te asiste yon diskou piblik ki te fèt nan de lakou nan prizon an.

Rezilta yo ankourajan. Gen yon mesye nan prizon nan eta Indyana yo te kondane pou l pase tout vi l nan prizon, paske l te planifye pou l touye moun, ki te fè bonjan chanjman nan pèsonalite l e ki te batize antanke Temwen Jewova.

Men sa yon Temwen ki te etidye Labib ak yon lòt prizonye ki nan yon gwo sant koreksyon nan Kalifòni te fè konnen: “M wè kote l soti ak pwogrè l fè. Li te fè gwo chanjman pou l te ka kalifye pou l batize.”

Gen anpil prizonye ki aksepte verite ki nan Bib la, menm lè yo konnen sa ka mete lavi yo an danje. Pa egzanp, yo te oblije met kèk nan prizonye sa yo ki te kite gwoup gang yo te ye yo nan selil poukont yo oswa yo te chanje yo prizon pou sekirite yo.

Pouvwa Bib la genyen pou l chanje lavi moun tèlman estrawòdinè, sa enpresyone responsab prizon yo. Gen kèk nan yo ki te bay Temwen yo sètifika pou merit yo ak kèk rekonpans paske yo volontè pou fè yon bon travay nan sant koreksyon yo.