Gen anpil touris ki vizite chit dlo sa yo ki popilè anpil ki toupre vil Pagsanjan nan peyi Filipin. Se la papa m ki te rele Nardo Leron, te leve nan yon fanmi pòv. Pou jan li te wè gen koripsyon nan gouvènman an, nan lapolis ak nan travay li a, li te kòmanse vin egri e li te toujou move.

 Paran m yo te travay di pou yo leve uit pitit yo te genyen yo. Souvan, yo te oblije kite kay la pou yon bon ti tan pou yo t al chèche rekòt yo nan mòn yo. Se konsa, tanzantan, gran frè m nan Rodelio avè m te oblije veye sou tèt nou poukont nou e souvan nou te konn ret grangou. Antanke timoun, nou pa t gen anpil okazyon pou n jwe. Depi n te gen laj sèt an, nou tout timoun yo te dwe travay sou yon plantasyon, e travay nou se te pote gwo chay kokoye atravè ti wout apik nan mòn yo. Si yon chay te twò lou pou n pote l, nou te dwe trennen l.

 Nou te reziyen nou lè papa n t ap bat nou, men, sa ki te pi rèd pou n sipòte, se lè papa n t ap bat manman nou. Nou te eseye fè l sispann, men se te anven. Rodelio avè m te deside n ap touye papa n lè n pi gran, men, nou pa t kite moun konn sa. Se pa ti anvi m te anvi pou n gen yon papa ki renmen n!

 Kòm mwen te dekouraje e m te fache akoz papa m te konn maltrete nou, m te kite kay la lè m te gen 14 an. Pandan yon tan, m te viv nan lari e m te kòmanse fimen mariwana. Finalman, m te vin ap kondui bato pou mennen touris nan chit dlo yo.

 Kèk ane apre, m te etidye nan inivèsite nan vil Màniy. Men, kòm m te retounen al travay Pagsanjan nan wikenn yo, m pa t gen anpil tan pou m etidye. Lavi m te sanble ak lavi yon moun k ap kouri toutan san l pa konn kote l prale, e menm mariwana pa t reyisi ede m. M te vin ap pran lòt dwòg tankou kokayin, eroyin ak sa yo rele metanfetamin. Dwòg ak imoralite seksyèl mache kòtakòt. Mizè, enjistis ak soufrans te anvayi m. M te rayi gouvènman an e pou mwen se li ki te lakòz tout bagay sa yo. M te mande Bondye: “Poukisa se konsa lavi a ye?” Men, pa t gen okenn relijyon nan sa m te ale yo ki te banm repons lan. M te pran plis dwòg pou m te ka sipòte dezespwa m.

 Nan ane 1972, etidyan yo nan peyi Filipin te òganize kèk manifestasyon kont gouvènman an. M te patisipe nan youn nan manifestasyon sa yo ki te vin debouche sou vyolans. Yo te arete anpil moun e kèk mwa annapre, yo te deklare se lwa masyal la (lwa militè a), ki t apral sèvi pou yo jije moun nan peyi a.

 Finalman, se nan lari mwen te vin ateri ankò. Men, fwa sa a, se paske m te pè pou otorite yo pa arete m paske m te avèk rebèl yo. Etandone m te bezwen kòb pou m te ka kontinye pran dwòg, m te tonbe nan volè, e m te konn ede etranje ak moun rich jwenn sa yo bezwen anrapò ak dezi seksyèl imoral yo. M pa t bay ni lavi ni lanmò regle anyen pou mwen.

 Pandan tan sa a, manman m ak ti frè m te kòmanse etidye Labib ak Temwen Jewova yo. Papa m te fache anpil pou sa e li te menm boule piblikasyon yo te genyen ki baze sou Bib la. Men, yo toulede te andire e yo te rive batize antanke Temwen Jewova.

 Yon jou, yon Temwen te pale ak papa m e li te esplike l Bib la pwomèt, alavni, pral gen jistis sou tout tè a (Sòm 72:12-14). Bèl pwomès sa a te tèlman atire papa m, li te deside fè plis rechèch. Nan Bib la, li te vin aprann non sèlman Bondye pwomèt pral gen yon gouvènman ki jis men tou, ki sa yon mari oswa yon papa dwe fè (Efezyen 5:28; 6:4). Apre yon ti tan, li menm ak tout lòt frè ak sè m yo te vin Temwen. Etandone m te byen lwen, m pa t okouran tout chanjman sa yo.

 An 1978, m t al viv ann Ostrali. Menmsi se yon peyi ki pezib e ki rich, lespri m pa t anpè. M te kontinye pran dwòg epi bwè alkòl. Pita nan ane a, Temwen Jewova yo te vizite m. M te kontan wè nan Bib la lapè pral blayi sou tè a, men, m te yon ti jan renka pou m asosye m ak moun sa yo.

 Yon tikras tan apre sa, m te retounen Filipin pou kèk semèn. Frè ak sè m yo te di m papa m te travay di pou l ka vin yon pi bon moun, men m te tèlman kenbe l nan kè, m pa t vle rankontre avè l menm.

 Pi piti sè m nan te esplike m grasa Bib la, pou ki rezon gen soufrans ak enjistis konsa. M te sezi wè ki jan yon jèn tifi ki potko menm gen eksperyans nan lavi a te banm repons ak kesyon m yo. Anvan m ale, papa m te ban mwen liv Vous pouvez vivre éternellement sur une terre qui deviendra un paradis a a, e li te di m: “Sispann kouri pasi pala. Liv sa a ap ede w jwenn sa w ap chèche a.” Li te ensiste pou m kòmanse etidye ak Temwen Jewova yo lè m retounen Ostrali.

 M te suiv konsèy papa m nan, e m te jwenn yon sal Wayòm Temwen Jewova yo toupre lakay mwen nan vil Brisbàn. M te aksepte fè yon etid Labib regilyèman. Pwofesi ki nan Bib la, tankou sa a ki nan Danyèl chapit 7 ak sa a ki nan Ezayi chapit 9 la, te aprann mwen gouvènman Bondye a pral dirije alavni, e li pap nan danse kole ak koripsyon. M te aprann nou pral jwi paradi ki pral gen sou tè a. M te vle fè Jewova plezi, men, m te reyalize m t ap bezwen aprann kontwole tèt mwen, sispann pran dwòg ak bwè twòp, epi kanpe sou vi imoral m t ap mennen an. M te kite fi m t ap viv avèk li a e m te kanpe nèt sou vye abitid mwen yo. Toutpandan konfyans mwen nan Jewova t ap grandi, m te priye l pou l ban m èd pou m kapab fè plis chanjman nan lavi m.

 Tikras pa tikras, m te vin reyalize sa m t ap aprann yo te kapab vrèman chanje lavi yon moun. Bib la fè konnen, si n fè efò pou sa, nou ka vin genyen “nouvo pèsonalite a”. (Kolosyen 3:9, 10.) Pandan m t ap fè efò pou m chanje, m te tou vin reyalize sa yo te di m sou chanjman papa m te fè yo te ka posib vre. Donk, olye pou m te kontinye kenbe l nan kè m e fache avèk li, m te santi se lapè pou m fè avè l pito. Finalman, m te padone papa m e m te retire nan kè m hèn m te gen pou li depi lè m te toupiti a.

 Lè m te jèn gason, souvan m te konn ap fè move bagay lòt moun ap fè, bagay ki te lakòz soufrans ak anpil pèt. Avètisman nou jwenn nan 1 Korentyen 15:33 te parèt aklè nan ka pa m, move frekantasyon te mennen m nan move wout. Kounye a, m gen zanmi m ka fè konfyans pami Temwen Jewova yo e yo ede m vin yon pi bon moun. E se pami yo m te rankontre bon ti madanm mwen an, Loretta. Ansanm, nou anseye lòt moun sou fason Labib kapab ede yo.

 Grasa Bib la, mwen wè papa m tounen yon moun m te panse li pa t ap janm ka ye. Li te vin yon bon mari pou manman m, e li te vin yon kretyen ki gen imilite e ki renmen lapè. Lè nou te rankontre apre m te batize antanke Temwen Jewova an 1987, papa m te ban m yon gwo akolad pou premye fwa!

 Pandan prèske 35 an, papa m te kontinye ap travay ansanm ak manman m pou pataje pwomès Bib la fè ak lòt moun. Li te yon moun tout moun te konnen ki t ap fè efò pou l ede moun parèy li. Pandan ane sa yo, m te aprann respekte l epi renmen l. M te santi m fyè yo te konnen m se pitit li! Li mouri an 2016, men m toujou sonje l. Li menm avè m te fè gwo chanjman nan pèsonalite nou paske nou te mete ansèyman Bib la an patrik. M pa gen okenn rankin nan kè m pou li ankò. E sa k fè m pi kontan an, se lefètke m jwenn Papa m ki nan syèl la, Jewova Dye, ki pwomèt l ap elimine tout pwoblèm ki lakòz fanmi yo soufri.