Աստվածաշնչի «Հայտնություն» գրքի հունարեն անունը «Ապոկալիպսիս» է, ինչը նշանակում է «բացահայտել» կամ «հայտնաբերել»։ Այս անունը ցույց է տալիս, թե ինչի մասին է գիրքը. այն բացահայտում է բաներ, որոնք գաղտնի են եղել, և հայտնում է այնպիսի իրադարձությունների մասին, որոնք պետք է տեղի ունենային այն գրվելուց դարեր անց։ Գրքում գրված շատ մարգարեություններ դեռ պետք է իրենց կատարումն ունենան։

Գրքի բովանդակությունը

•   Առաջաբան (Հայտնություն 1:1–9)։

•   Հիսուսի խոսքը՝ ուղղված յոթ ժողովներին (Հայտնություն 1:10–3:22)։

•   Տեսիլք, որտեղ երևում է Աստված՝ երկնքում նստած իր գահին (Հայտնություն 4:1–11)։

•   Մեկը մյուսին հաջորդող տեսիլքներ.

  •   յոթ կնիքներ (Հայտնություն 5:1–8:6)

  •   յոթ փողեր, որոնցից վերջին երեքը վայեր են ներկայացնում (Հայտնություն 8:7–14:20)

  •   յոթ գավաթներ, որոնցից յուրաքանչյուրը լցված է պատուհասով, ինչը խորհրդանշում է Աստծու դատավճիռները երկրի դեմ (Հայտնություն 15:1–16:21)

  •   Տեսիլքներ, որտեղ կործանվում են Աստծու թշնամիները (Հայտնություն 17:1–20:10)։

  •   Տեսիլքներ, որտեղ Աստված օրհնում է երկինքն ու երկիրը (Հայտնություն 20:11–22:5)։

•   Վերջաբան (Հայտնություն 22:6–21)։

«Հայտնություն» գիրքը հասկանալու բանալիներ

1.   «Հայտնությունը» Աստծու ծառաների համար ոչ թե ահազդու գիրք է, այլ հակառակը՝ քաջալերական ու հուսադրող։ Չնայած որ շատերը, լսելով ապոկալիպսիս բառը, պատկերացնում են կործանում, սակայն այս գրքի սկզբում և վերջում գրված է, որ երջանիկ են նրանք, ովքեր կարդում, լսում ու պահում են գրքում գրված խոսքերը (Հայտնություն 1:3; 22:7)։

2.   «Հայտնությունում» օգտագործվում է խորհրդանշական լեզու, հետևաբար շատ բաներ չպետք է հասկանալ բառացի (Հայտնություն 1:1)։

3.   «Հայտնությունում» հանդիպող շատ հասկացությունների, խորհրդանշանների և անձնավորությունների մասին նշվել են Աստվածաշնչի նախորդ գրքերում։

   •   Եհովա — «ճշմարիտ Աստվածը.... երկնքում» և ամեն ինչի Արարիչը (2 Օրենք 4:39; Սաղմոս 103:19; Հայտնություն 4:11; 15:3)։

   •   Հիսուս Քրիստոս — «Աստծու գառը» (Հովհաննես 1:29; Հայտնություն 5:6; 14:1)։

   •   Սատանա — Աստծու հակառակորդը (Ծննդոց 3:14, 15; Հովհաննես 8:44; Հայտնություն 12:9)։

   •   Մեծ Բաբելոն — հին Բաբելոնի նման՝ Աստծու և իր ժողովրդի թշնամին ու կրոնական ստերի աղբյուրը (Ծննդոց 11:2–9; Եսայիա 13:1, 11; Հայտնություն 17:4–6; 18:4, 20)։

   •   Ծով — ամբարիշտ մարդկությունը, որ հակառակվում է Աստծուն (Եսայիա 57:20; Հայտնություն 13:1; 21:1)։

   •   Հին ժամանակներում խորանում Աստծու երկրպագության մեջ օգտագործված առարկաներ։ Օրինակ՝ ուխտի տապանակ, ապակե ծով (ավազան լվացվելու համար), ջահեր, խունկ, զոհասեղան (Ելք 25:10, 17, 18; 40:24–32; Հայտնություն 4:5, 6; 5:8; 8:3; 11:19)։

   •   Գազաններ — խորհրդանշում են մարդկային կառավարությունները (Դանիել 7:1–8, 17–26; Հայտնություն 13:2, 11; 17:3)։

   •   Խորհրդանշական իմաստով օգտագործված թվեր (Հայտնություն 1:20; 8:13; 13:18; 21:16)։

4.   Տեսիլքները վերաբերում են «Տիրոջ օրվա» ժամանակ տեղի ունեցող դեպքերին, որը սկսվել է 1914թ.-ին, երբ հաստատվեց Աստծու Թագավորությունը և սկսեց իշխել Հիսուս Քրիստոսը (Հայտնություն 1:10)։ Այդ իսկ պատճառով կարող ենք ակնկալել, որ «Հայտնություն» գրքի մարգարեությունները կգտնեն իրենց կատարումը մեր օրերում։

5.   «Հայտնությունը», ինչպես որ ամբողջ Աստվածաշունչը հասկանալու համար մեզ հարկավոր է Աստծուց իմաստություն խնդրել և դիմել այն մարդկանց օգնությանը, ովքեր արդեն հասկացել են այն (Գործեր 8:26–39; Հակոբոս 1:5)։