2023 թ. դեկտեմբերի 5-ին Խանտի-Մանսիական ինքնավար շրջանի (Յուգրա) Սուրգուտ քաղաքի դատարանը մեղավոր ճանաչեց 17 եղբայրների և 1 քրոջ։ Նրանց թվում էին եղբայրներ Եվգենի Ֆեդինը, Արթուր Սևերինչիկը և Տիմոֆեյ Ժուկովը։ 17 եղբայրները դատապարտվել են պայմանական ազատազրկման՝ վեց տարի երեք ամսից մինչև յոթ տարի ժամկետով։ Իսկ քրոջը դատապարտել են երեք տարի և երեք ամսվա պայմանական ազատազրկման։ Նրանցից ոչ ոք այս պահին չի կալանավորվի։

1. Փետրվարի 15, 2019

   Սուրգուտում և մոտակա քաղաքներում ոստիկանները խուզարկեցին բազմաթիվ Եհովայի վկաների տներ։ Տեղեկություններ կան, որ հարցաքննության ընթացքում որոշ եղբայրների կտտանքների ենթարկեցին։ Երեք եղբայրների վերցրին նախնական կալանքի տակ, այդ թվում՝ Եվգենի Ֆեդինին և Արթուր Սևերինչիկին։

2. Մարտի 7, 2019

   21 օր նախնական կալանքի տակ պահելուց հետո վերաքննիչ դատարանը որոշեց ազատ արձակել Արթուրին։

3. Ապրիլի 11, 2019

   Եվգենին ազատ արձակվեց նախնական կալանքից մոտ երկու ամիս անց։ Դատարանը նրա նկատմամբ տեղաշարժի, հաղորդակցման և ինտերնետի օգտագործման սահմանափակումներ նշանակեց։

4. Հունվարի 16, 2020

   Դատավորը կարգադրեց, որ եղբայր Տիմոֆեյ Ժուկովը գնա հոգեբուժական հիվանդանոց՝ զննություն անցնելու։ Հետաքննիչները պատճառաբանեցին, որ նա հարցաքննության ժամանակ հրաժարվել է հարցերին պատասխանելուց՝ իրավունք, որը պաշտպանված է Ռուսաստանի Դաշնության սահմանադրության 51-րդ հոդվածով։ Տիմոֆեյը հետագայում բողոքարկեց այդ կարգադրությունը։

5. Փետրվարի 5, 2020

   Թեև դատարանի կարգադրության դեմ Տիմոֆեի բողոքարկումը դեռ ընթացքի մեջ էր, սակայն դատարանից դուրս գալիս ոստիկանությունը ձերբակալեց նրան։ Ոստիկանները Տիմոֆեին տարան մոտ 1 200 կիլոմետր (746 մղոն) հեռավորության վրա գտնվող Եկատերինբուրգի հոգեբուժարան, որտեղ նա մնաց 14 օր։

6. Մարտի 5, 2020

   Վերաքննիչ դատարանը որոշեց, որ Տիմոֆեյի բանտարկությունը անօրինական էր։

7. Հոկտեմբերի 19, 2021

   Վերաքննիչ դատարանը կարգադրեց փոխհատուցել Տիմոֆեյին՝ անօրինական բանտարկության համար։

8. Նոյեմբերի 12, 2021

   Նախնական քննության ընթացքում պաշտպանյալի փաստաբանները ներկայացրին իշխանությունների կողմից կատարված ապօրինի և անմարդկային գործողությունների, այդ թվում՝ խոշտանգումների, ապացույցների կեղծման և կանխակալ փորձագետների կիրառման ապացույցներ: Պաշտպանները դատարանից խնդրեցին գործը վերադարձնել դատախազություն։

9. Նոյեմբերի 15, 2021

   Դատավորը ընդունեց, որ հետաքննության ժամանակ խախտվել են որոշ օրենքներ, սակայն մերժեց գործը վերադարձնել դատախազություն։

Վստահ ենք, որ Եհովան կշարունակի լինել Եվգենիի, Արթուրի, Տիմոֆեյի, ինչպես նաև բոլոր նրանց կողքին, ովքեր հալածանքի ժամանակ իրենց աչքերը հառած են պահում չերևացող բաներին (2 Կորնթացիներ 4։17, 18)։