ԱՌԱՋԻՆ ԴԱՐՈՒ քրիստոնեաները շատ ջանք թափեցին, որ Թագաւորութեան բարի լուրը հասցնեն կարելի եղածին չափ շատ մարդոց (Մատ. 24։14)։ Ոմանք նոյնիսկ ուրիշ երկիրներ ճամբորդեցին։ Օրինակ, Պօղոս առաքեալ գնաց այն շրջանը, ուր հիմա Թուրքիան կը գտնուի, եւ հոն ընդարձակօրէն քարոզեց իր միսիոնարական ճամբորդութիւններուն ընթացքին *։ Շուրջ 2000 տարի ետք՝ 2014–ին, Թուրքիոյ մէջ նորէն յատուկ քարոզարշաւ մը եղաւ։ Լաւ, ինչո՞ւ այս քարոզարշաւը կազմակերպուեցաւ, եւ ո՞վ մասնակցեցաւ ատոր։

Թուրքիոյ մէջ աւելի քան 2800 հրատարակիչներ կան, բայց բնակչութիւնը 79 միլիոն է։ Ասիկա կը նշանակէ թէ գրեթէ ամէն 28,000 անհատի համար 1 Վկայ կայ։ Յստակ է թէ հրատարակիչները կրցած են միայն քիչ թիւով անձերու հասցնել բարի լուրը։ Քարոզարշաւին նպատակն էր՝ կարելի եղածին չափ շատ մարդոց հասցնել բարի լուրը կարճ ժամանակուան մը մէջ։ Ուրիշ երկիրներէ եղող շուրջ 550 թրքախօս եղբայրներ ու քոյրեր ճամբորդեցին Թուրքիա եւ տեղացի հրատարակիչներուն հետ ծառայեցին քարոզարշաւին ընթացքին։ Լաւ, արդիւնքը ի՞նչ եղաւ։

Լայնատարած վկայութիւն տրուեցաւ։ Պոլիսի մէջ ժողովք մը գրեց. «Երբ մարդիկ մեզ տեսան, հարցուցին. ‘Յատուկ համաժողո՞վ մը կայ։ Ամէն տեղ Եհովայի վկայ կը տեսնենք’»։ Իզմիր քաղաքին մէջ ժողովք մը գրեց. «Թաքսիներու կանգ առնելու տեղը, գործաւորը մօտեցաւ տեղացի երէցի մը, եւ հարցուց. ‘Ի՞նչ է, ձեր գործունէութիւնը աւելցուցե՞ր էք’»։ Քարոզարշաւը իրապէս ուշադրութիւն գրաւեց։

Օտար երկրէ մասնակցողները շատ հաճոյք առին քարոզելէ։ Դանիայէն եղող Սթեֆըն ըսաւ. «Ամէն օր առիթը ունեցայ որ քարոզեմ մարդոց, որոնք բնա՛ւ չեն լսած Եհովային մասին։ Զգացի թէ իրապէ՛ս կը ճանչցնեմ Եհովային անունը»։ Ֆրանսայէն եղող Ժան–Տաւիտ գրեց. «Մէկ փողոցի մէջ քարոզելը ժամեր առաւ։ Հոյակապ էր։ Մարդոց մեծամասնութիւնը չէր ճանչնար Եհովայի վկաները։ Գրեթէ ամէն մէկ դուռ որ զարկինք, կրցանք նիւթ բանալ, վիտէօ մը ցուցնել եւ հրատարակութիւն մը տալ տանտէրին»։

550 մասնակցողները միայն երկու շաբթուան մէջ բաշխեցին շուրջ 60,000 հրատարակութիւն։ Քարոզարշաւը իրապէս ալ լայնատարած վկայութիւն տուաւ։

 Ծառայութեան հանդէպ եղբայրներուն նախանձախնդրութիւնը աւելցաւ։ Այս յատուկ քարոզարշաւը լաւ ազդեցութիւն ունեցաւ տեղացի եղբայրներուն վրայ։ Շատեր սկսան մտածել լիաժամ ծառայութեան մասին։ Իրականութեան մէջ, քարոզարշաւին յաջորդող 12 ամիսներուն ընթացքին, Թուրքիոյ մէջ կանոնաւոր ռահվիրաներուն թիւը 24 առ հարիւր աւելցաւ։

Օտար երկիրներէ մասնակցողները ըսին թէ քարոզարշաւը ինչպէ՛ս ազդեց իրենց ծառայութեան, նոյնիսկ իրենց երկիրը վերադառնալէն ետք։ Գերմանիայէն եղող Շիրին անունով քոյր մը գրեց. «Թուրքիոյ մէջ եղբայրները շատ դիւրութեամբ կը քարոզեն անպաշտօն կերպով։ Ես այս մարզին մէջ շատ ամչկոտ եմ։ Բայց քարոզարշաւը, տեղացի եղբայրներուն օրինակը, եւ բազմաթիւ աղօթքներս ինծի օգնեցին, որ ընեմ ինչ որ առաջ չէի կրնար ընել։ Նոյնիսկ գետնուղիին մէջ քարոզեցի եւ թերթիկներ բաշխեցի։ Այլեւս առաջուան չափ ամչկոտ չեմ»։

Գերմանիայէն եղող Եոհաննէս ըսաւ. «Ծառայութեանս համար որոշ դասեր սորվեցայ։ Թուրքիոյ մէջ եղբայրները իրապէս կ’ուզեն կարելի եղածին չափ շատ մարդոց հասցնել ճշմարտութիւնը։ Անոնք ամէն առիթ կը գործածեն որ վկայեն։ Որոշեցի որ երբ Գերմանիա վերադառնամ նոյնը ընեմ։ Եւ հիմա իրապէս ալ առաջուընէ աւելի մարդոց կը քարոզեմ»։

Ֆրանսայէն եղող Զէյնեպ ըսաւ. «Այս քարոզարշաւը մեծ ազդեցութիւն ունեցաւ իմ ծառայութեանս վրայ։ Ատիկա ինծի օգնեց որ աւելի քաջ ըլլամ եւ Եհովային աւելի վստահիմ»։

Հրատարակիչները իրարու աւելի մօտեցան։ Տարբեր երկիրներէ եղող եղբայրներուն միջեւ եղած սէրն ու միութիւնը շատ մեծ ազդեցութիւն ունեցաւ։ «Համտեսեցինք եղբայրներուն հիւրասէր ոգին», ըսաւ նախապէս նշուած Ժան–Տաւիտ։ Ան աւելցուց. «Անոնք մեզ իրենց բարեկամը եւ ընտանիքին անդամները սեպեցին։ Իրենց տուները բացին մեզի համար։ Առաջ գիտէի որ համաշխարհային եղբայրութիւն ենք, եւ շատ անգամներ մեր հրատարակութիւններուն մէջ կարդացած էի այս արտայայտութիւնը։ Բայց այս անգամ աչքովս տեսայ։ Ա՛լ աւելի հպարտ զգացի որ Եհովայի ժողովուրդին մէկ մասն եմ, եւ Եհովայէն շնորհակալ եմ այս հոյակապ առանձնաշնորհումին համար»։

 «Բոլորս մէկ ընտանիքի պէս էինք, չնայած թէ ուրկէ ենք՝ Դանիայէն, Ֆրանսայէն, Գերմանիայէն կամ Թուրքիայէն։ Կարծես թէ Աստուած բոլոր ազգային սահմանները ջնջած էր մեծ ռետինով մը», ըսաւ Ֆրանսայէն եղող Քլեր։

Ֆրանսայէն եղող Սթեֆանին աւելցուց. «Այս յատուկ արշաւը մեզի սորվեցուց որ մշակոյթը կամ լեզուն չէ որ մեզ կը միացնէ, հապա՝ Եհովային հանդէպ մեր բոլորին ունեցած սէրը»։

Բազմաթիւ օտար մասնակցողներ սկսան մտածել Թուրքիա փոխադրուիլ, քանի որ հոն տակաւին կատարուելիք մեծ գործ կայ։ Քանի մը անձեր արդէն իսկ փոխադրուած են։ Այս անհատներուն ըրածը շատ գնահատելի է։

Օրինակ, հեռաւոր շրջանի մը մէջ կայ 25 հրատարակիչներէ կազմուած պզտիկ խումբ մը։ Այդ խումբը տարիներ շարունակ միայն մէկ երէց ունէր։ Երեւակայէ թէ այդ հրատարակիչները որքա՜ն ուրախացան, երբ 2015–ին՝ Գերմանիայէն եւ Հոլանտայէն վեց հոգիներ փոխադրուեցան որ իրենց օգնեն։

Անոնք որոնք Թուրքիա փոխադրուած են եւ որոշ ժամանակէ ի վեր հոն կ’ապրին, ի՞նչ կ’ըսեն իրենց նոր կեանքին մասին։ Ճիշդ է որ անոնց կեանքը ատեններ դժուար կ’ըլլայ, բայց միեւնոյն ատեն օրհնութիւններ կը վայելեն։ Նկատի առ թէ ոմանք ի՛նչ ըսած են։

Ֆէտէրիգօ, որ ամուսնացած եղբայր մըն է 40–ական տարիքին մէջ եւ Սպանիայէն փոխադրուած է Թուրքիա, կ’ըսէ. «Քանի որ շատ նիւթական բաներ չունիմ, ասիկա կը ձգէ որ աւելի ազատ ըլլամ եւ ամէնէն կարեւոր բաներուն վրայ կեդրոնանամ»։ Լաւ, ան ուրիշները կը քաջալերէ՞ որ այս տեսակ ծառայութիւն ընեն։ «Ա՛նկասկած», կ’ըսէ ան։ «Երբ ուրիշ երկիր մը փոխադրուիս, որպէսզի մարդոց օգնես որ Եհովան ճանչնան, դուն քեզ Եհովային ձեռքերուն մէջ դրած կ’ըլլաս։ Իրապէս որեւէ ժամանակէ աւելի կը զգաս Եհովային հոգատարութիւնը»։

Հոլանտայէն եկող Ռուտին, որ 50–ական տարիքին մէջ եւ ամուսնացած եղբայր մըն է, կ’ըսէ. «Շատ գոհունակ կը զգանք որ ‘կրակի գիծին’ վրայ կը ծառայենք եւ ճշմարտութիւնը կը հասցնենք բազմաթիւ մարդոց,  որոնք ատոր մասին ո՛չ մէկ բան լսած են։ Շատ կ’ուրախանանք երբ կը տեսնենք, թէ անհատներ ինչպէ՛ս ուրախ կը դառնան ճշմարտութիւնը ընդունելով»։

Գերմանիայէն եկող Սաշա, որ 40–ական տարիքին մէջ եւ ամուսնացած եղբայր մըն է, կ’ըսէ. «Ամէն անգամ որ ծառայութեան կ’ելլեմ, կը հանդիպիմ մարդոց որոնք առաջին անգամ ըլլալով կը լսեն ճշմարտութիւնը։ Շատ գոհունակ կը զգամ երբ այսպիսի անհատներու առիթ կու տամ որ Եհովան ճանչնան»։

Ճափոնէն եկող Ացուքօ, որ ամուսնացած քոյր մըն է իր 30–ական տարիքին մէջ, կ’ըսէ. «Անցեալին, միշտ կ’ուզէի որ Արմագեդոնը շուտով գայ։ Բայց Թուրքիա փոխադրուելէս ետք, Եհովային շնորհակալութիւն կը յայտնեմ որ տակաւին կը համբերէ։ Որքան աւելի տեսնեմ թէ Եհովան ինչպէ՛ս կ’ուղղէ հարցերը, այնքան աւելի կ’ուզեմ իրեն մօտենալ»։

Ռուսիայէն եկող Ալիսան, որ իր 30–ական տարիքին մէջն է, կ’ըսէ. «Այս կերպով Եհովային ծառայելը ինծի օգնած է որ իր բարութիւնը համտեսեմ» (Սաղ. 34։8)։ Ան կ’աւելցնէ. «Եհովան ոչ միայն Հայրս է, հապա նաեւ իմ մտերիմ Բարեկամս, եւ զինք աւելի կը ճանչնամ տարբեր–տարբեր պայմաններու մէջ։ Կեանքս լեցուն է ուրախ յիշատակներով, հետաքրքրական փորձառութիւններով եւ առատ օրհնութիւններով»։

Թուրքիոյ մէջ կատարուած յատուկ քարոզարշաւին միջոցաւ շատ աւելի մարդիկ լսեցին բարի լուրը։ Բայց տակաւին մեծ թաղամասեր կան, որոնք չեն ծառայուած։ Անոնք որոնք Թուրքիա փոխադրուած են, ամէն օր կը հանդիպին անհատներու, որոնք բնա՛ւ չեն լսած Եհովային մասին։ Կ’ուզե՞ս այսպիսի թաղամասի մը մէջ ծառայել։ Եթէ այո՛, քեզ կը քաջալերենք. ‘Աչքերդ վերցո՛ւր ու արտերուն նայէ՛։ Արդէն ճերմկած ու հնձուելու պատրաստ են’ (Յովհ. 4։35)։ Կրնա՞ս ծառայել երկրի մը մէջ, ուր արտերը «ճերմկած ու հնձուելու պատրաստ են»։ Եթէ այո՛, ուրեմն հիմա սկսէ գործնական քայլեր առնել, որպէսզի այդ նպատակին հասնիս։ Մէկ բան ստոյգ է. եթէ աւելի բաժին բերես բարի լուրը «մինչեւ երկրին ծայրերը» քարոզելուն մէջ, երեւակայածէդ աւելի առատ օրհնութիւններ պիտի վայելես (Գործք 1։8)։