Hapo Jesus aa munika vi mombunikiro?
Eziriro okuza mOmbeibela
Kape nomundu ngu ma tjiwa nawa kutja Jesus aa munika vi, mena rokutja ombuniko ye kai tamuninwe mOmbeibela. Iho matji raisa kutja ombuniko ya Jesus katjiṋa otjinanḓengu. Nungwari, Ombeibela mai yenene okutuhonga oviṋa tjiva ohunga nomuano Jesus maa munika.
Ovikaṋena: Jesus wa ri Omujuda nu mape ya wa rumata ovikaṋena tjiva okuza ku ina. (Ovaheberi 7:14) Nu mape ya ovikaṋena vye kavi pangukire kovyovandu varwe. Otjikando tjimwe, eye wa yenena okuza koGalilea okuyenda koJerusalem mongumumu. (Johanes 7:10, 11) Nu mape ya eye kaa panguka nandarire kovahongewa ve vopopezu. Zemburuka kutja Judas Iskariot wa tjiukisa Jesus kotjimbumba tjovandu tji tja ri novirwise tji ve ya okumukambura.—Mateus 26:47-49.
Ozondjise: Jesus kaa ri nozondjise ozonde, mena rokutja Ombeibela i tja: “Omurumendu tja hapisa ozondjise ozonde, otjo ohoṋi.”—1 Ovakorinte 11:14.
Oruyezu: Jesus wa ri noruyezu. Eye aa kongorere omatwako wOvajuda, nga ye tjaere ovarumendu okukonda ‘otuyezu twawo kovikoro.’ (Levitikus 19:27; Ovagalate 4:4) Wina, Ombeibela i tamuna oruyezu rwa Jesus momaprofetero ohunga nondatumisire ye.—Jesaja 50:6.
Orutu: Oviraisiro avihe vi raisa kutja Jesus wa ri omunamasa nomuveruke korutu. Motjiungura tje tjokuzuvarisa Jesus aa ryanga tjinene. (Mateus 9:35) Eye wa kohorora Ondjuwo ondjapuke yOvajuda povikando vivari, wa tjengura ovitihe vyovarandise, nu otjikando tjimwe wa ungura ongora okuramba na yo ovinamuinyo. (Lukas 19:45, 46; Johanes 2:14, 15) Embo ndi McClintock and Strong’s Cyclopedia ra tja: “Oviṋa avihe mbya tjangwa ohunga na Jesus momaevangeli vi raisa kutja Jesus wa ri omunamasa nomuveruke korutu.”—Orupa 4, omukuma 884.
Eye aa yenene okuraisa momurungu we: Jesus wa ri norusuvero notjari nu omurungu we aau raisa ovikaṋena mbyo. (Mateus 11:28, 29) Ovandu avehe aave ya ku ye okupaha omahuhumiṋino nombatero. (Lukas 5:12, 13; 7:37, 38) Nu nandarire ya ri oupupu kovanatje okukara pu na ye.—Mateus 19:13-15; Markus 9:35-37.
Omazuviro woposyo ohunga nombuniko ya Jesus
Omazuviro woposyo: Tjiva ve muna kutja Jesus ma sokuza moAfrica mena rokutja embo rOmavandururiro ri sasaneka ozondjise ze ku nomainya wozonḓu nozombaze ze ku ‘nongoporo ndja kohororwa.’—Omavandururiro 1:14, 15.
Ouatjiri: Embo rOmavandururiro ri hungira ‘moviraisiro.’ (Omavandururiro 1:1) Omakahururiro wozondjise nozombaze za Jesus vi ungurisiwa okusasaneka ovikaṋena vya Jesus kombunda yombendukiro ye, nungwari kavi kahurura ombuniko yorutu rwe indu tja ri kombanda yehi. Indu Ombeibela mOmavandururiro 1:14 tji mai tja Jesus wa ri ‘nozondjise ozombapa twee tjimuna omainya omavapa wozonḓu, tjimuna ovitutukende’ mai sasaneke otjivara, nungwari kamuano ozondjise mu za ungurwa. Iho matji kuramene po ounongo we mena rokutja eye wa hupa ozombura ozengi. (Omavandururiro 3:14) Ezeva ndi kari nokusasaneka omuano ozondjise za Jesus mu za ungurwa ku nomainya wozonḓu tjimuna tji ri hi nokusasaneka omuano ozondjise ze mu za ungurwa ku novitutukende.
Ozombaze za Jesus maze munika “tjimuna ongoporo ndja zuzurwa mezuko nu ndja kohororwa.” (Omavandururiro 1:15) Wina, omurungu we “iyau yere tjimuna eyuva pokahatenya.” (Omavandururiro 1:16) Mena rokutja kape nomuhoko mbu notjivara tji matji sasanekwa nomakahururiro wotjirimunikise hi omasasanekero uriri ngu maye raisa Jesus ngwa pendurwa otja ngwa “tura mondjerera ku ku ha vazewa.”—1 Timoteus 6:16.
Omazuviro woposyo: Jesus kaa ri nomasa nu wa ri otjingundi.
Ouatjiri: Jesus wa ri ependa momeritjindiro we. Otjotjihorera, eye nouvanḓe we ritjiukisa omuini kotjimbumba tjovandu tji tje ku mu kambura nu tji tja ri novirwise. (Johanes 18:4-8) Jesus mape ya wa ri nomasa morutu okuyenena okuungura otjomuhonge womiti ngwa ungurisa oviungurisiwa vyokomake.—Markus 6:3.
Nu hapo omena raye Jesus tja hepa ombatero okutjinda omuti wondatumisire? Nu omena raye tja tenga pokuṱa ngunda imba mbu va papererwe pamwe avi hi ya ṱa? (Lukas 23:26; Johanes 19:31-33) Ousupi ngunda Jesus e hi ya ṱa orutu rwe rwa ngundiparere tjinene. Eye wa ri katumba ouṱuku auhe mena rokutja wa ri momburuma yonḓiro. (Lukas 22:42-44) Ouṱuku mbwo Ovajuda ve mu tjinda navi nu meyuva ependukirwa Ovaroma ve mu tatumisa. (Mateus 26:67, 68; Johanes 19:1-3) Oviṋa otja imbyo mape ya ombya tjita kutja ma ṱe tjimanga.
Omazuviro woposyo: Jesus aruhe wa ri nombameno momuinyo.
Ouatjiri: Jesus aruhe aa raisa ovikaṋena vya Ihe womeyuru Jehova, Ombeibela mbwi tja ‘oMukuru wondjoroka.’ (1 Timoteus 1:11, NWT; Johanes 14:9) Ouatjiri owo mbwi wokutja Jesus aa hongo varwe okukara nondjoroka. (Mateus 5:3-9; Lukas 11:28) Oviṋa mbi vi raisa kutja Jesus aruhe aa raisa ondjoroka.
Mo yenene okutara ku imbi wina
ESSENTIAL BIBLE TEACHINGS
Hapo Ombeibela i nouatjiri?
Ndovazu Ombeibela ya tjangwa i Mukuru, okutja i sokuhaṋika komambo warwe nga tjangwa.
OHUNGA NA EṰE
Ningira omahongero wOmbeibela wotjari
Hungirira kepuriro rOmbeibela, poo rihonga ovingi ohunga nOvahongonone va Jehova.