Hapo ove u panḓera po nandarire kutja mo munu omauzeu? Hapo wa rora okutuurunga omauzeu tjimuna nga . . .

•   okuzepaisa omusuverwa woye?

•   ouvere woruveze orure?

•   omaumba?

 Ovakonḓonone ve tja katu hepa okupanḓera po uriri indu tji matu tuurunga omauzeu omanene. Posi ya omauzeu omaṱiṱi ngu tu muna eyuva arihe ye yenena okutuyetera omitjise wina. Ku nao ounanḓengu kove okukara notjikaṋena tjokupanḓera po, kutja mo tuurunga omauzeu omaṱiṱi poo omanene.

•  Hapo okupanḓera po maku hee tjike?

•  Ongwaye tji tu hepa otjikaṋena tjokupanḓera po?

•  Omomuano uṋe mu mo yenene okukara notjikaṋena tjokupanḓera po?

•  Ovakweṋu ve tja vi?

 Okupanḓera po omasa nge tu vatera okutjinda omarundurukiro ngu maye tjitwa mehupo nokutuurunga omauzeu nondoṋeno. Ovandu mbe panḓera po ve muna omauzeu tjimuna ovandu avehe. Nungwari, owo ve yenena okutuurunga omauzeu wawo, nandarire kutja ye ve ṱunu momuano omuvi pu pe ṱa pi, indu tji va tuurunga omauzeu wawo ngo ayehe ve yenena okukara nomasa okukapita inga ngu va ri na wo rukuru.

•   Omena rokutja ovandu avehe ve muna omauzeu. Ombeibela mai tja: “Ovanatjikara aruhe kambe toṋa momararakaneno, . . . nomunazondunge aruhe kangu tumba; . . . nungwari oruveze rwokumuna ouhumandu ru ya ku wo avehe.” (Omuzuvarise 9:11) Matu rihongere koye? Nandarire kutja ovandu ovawa ve muna omauzeu, kai rire mena rokutja va tjiti ouvi.

•   Omena rokutja okupanḓera po ku tu tjevera. Omurumendu ngu yandja ondunge kovanatje voskole wa tja: “Ovahongwa ovengi ve ya komberoo yandje ava pindike nu amave riri tjinene mena rokutja kave tuurungire omarorero kaaṋi poo mena rokutja omundu umwe wa hungire omambo omavi ku wo kotungovi twomahakaeneno. Nu nandarire kutja omauzeu nga ye munika aayo omaṱiṱi indu omuhongwa tje hi nokutjiwa okuyetjinda eye mape ya akakara nomutjise woviyoze poo omutjise wombameno.” a

•   Mena rokutja okupanḓera po maku ku vatere nai, na indu tji wa rire omunene motjiwondo. Dr. Richard Lerner wa tjanga nai: “Otjiṋa tjimwe tji matji ku vatere okukara nondoṋeno eendu tji mo tuurunga oviṋa mbi mavi ku wisa momuinyo, nokutwa po ozondando ozombe poo okupaha omiano vyarwe mbi mavi yenene okukuvatera okuyenenisa oviṋa mbi mo vanga okutjita.” b

•   Tara kutja ouzeu woye u ṱeki pi. Tjiwa ombangu pokati kouzeu ounene nouṱiṱi . Ombeibela i tja: “Eyova tji ra pindike, mokamanga ri tjiukisa omapindi waro. Omunazondunge u nyengwa ondjambu.” (Omiano 12:16) Kamauzeu ayehe ngu maye sokukuṱuna tjinene.

   “Poskole ovanatje mbu tu hita pamwe ve hungira ohunga noviṋa mbi hi nohepero aayo ovinahepero. Okuzambo okupitira motungovi twomahakaeneno omapanga wawo ye ve raera kutja owo ve ri nawa nu otjiṋa ho aatji ṱunu tjinene kovanatje mbu tu ri moklasa imwe, nu aave munu kutja ve nouzeu ounene.”—Joanne.

•   Rihongera okuza ku varwe. Omuimbo wOmbeibela u tja: “Otja otjitenda punga atji upika otjitenda otjikwao, ovandu wina opunga ave hongasana.” (Omiano 27:17) Mo yenene okurihongera kovandu mba tuurunga omauzeu ngo.

   “Indu tji mo hungire ku na varwe u yenena okumuna kutja va tuurunga omauzeu omengi, posi ya owo ve ri nawa nai. Hungira ku na wo okutara kutja ovikeṋa mbi va tjita kutja ve tuurunge omauzeu ngo.”—Julia.

•   Kara nomuretima. Ombeibela i tja: “Nandarire kutja omusemba ma u potuingi, eye ma sekama rukwao.” (Omiano 24:16) Pe kambura oruveze okuyakura oviṋa tji vi he ri komuano ove mbu mo vanga, ku nao o temwa indu tji wa u momuinyo omayuva tjiva. Otjiṋa otjinanḓengu tjiwa kutja mo sekama rukwao.”

   “Indu tji wa zu mouzeu, omutima woye ma u hepa okuveruka. Nu otjiṋa ho tji kambura oruveze. Ami mbe rihonga kutja, otja oruveze tji maru kayenda i rira oupupu okuuta okufula nawa rukwao.”—Andrea.

•   Kara nondangi. Ombeibela i tja: “Nopu mamu sokutjera okuhepa!” (Ovakolose 3:15) Nandarire kutja mo munu omauzeu omengi, aruhe pe kara oviṋa oviwa mbi mo yenene okuraisa ondangi ku vyo. Ripura noviṋa vitatu mbi tjita kutja ehupo roye ri rire ewa.

   “Indu tji mo munu ouzeu, i rira oupupu okuripura omuini kutja, ‘Ongwaye tje ri ami?’ Indu tji matu panḓere po, katu sokuripurira komauzeu wetu, posi ya matu sokukara nombepo ombwa nokuraisa ondangi ku imbi mbi tu na vyo poo ku imbi mbi matu yenene okutjita.”—Samantha.

•   Kowa mu imbi mbi u na vyo. Omuapostele Paulus wa tja: “Mbe rihonga okukara nohange na imbi mbi mbi navyo.” (Ovafilipi 4:11, ONT) Paulus kaa yenene okuisa po oviṋa ovivi mbyaa vi tjitwa ku ye. Posi ya aa yenene okutoorora kutja omauzeu we me ye tjindi vi. Eye we rimanena okukara nohange na imbi mbye na vyo.

   “Otjiṋa tjimwe tji mbe rihonga otjo kutja, ka aruhe tji mbi tjinda omauzeu momuano omuwa. Ondando yandje okuraisa omeritjindiro omawa, mongaro aihe mu mbi ri. Iho katji nokueta ouwa kwami uriri nungwari wina matji eta ouwa ku varwe.”—Matthew.

•   Kumba. Ombeibela i tja: “Omerikendero woye ye esa na Muhona, nEye me ku zeuparisa. Eye kamaa tarere ovasemba amave haverwa.” (Epsalme 55:22) Katu sokuvara ongumbiro otjotjiṋa uriri. Oyo omahakaeneno wa katjoo tjiri ku nomuute woye, ngu tu pa ‘imbi mbi matu hepa.’—1 Petrus 5:7.

   “Ami hi hepa okutjinda omauzeu erike. Tji mba kumbu nomutima wandje auhe nokuhinokuhoreka otjiṋa, nu okuzambo e tja ndangi ku Mukuru kozondaya nḓe ndji pa, mbi nakaura omeripura omavi e yandja ombango kozondaya Jehova nḓe ndji pa. Ongumbiro onanḓengu tjinene”—Carlos.