Ovikando vivari motjivike Ovahongonone va Jehova ve woronganena potuveze twomerikotameneno tu tu isanewa kutja Omatuwo wOmerikotameneno. Imbo pe tjitwa tjike nu ove mo munu mouwa waye indu tji wa kara pu zo?

•  PEtuwo rOmerikotameneno pe tjitwa tjike?

•  Ongwaye tji wa sokukara po?

•  Ovakweṋu ve tja vi

 Etuwo rOmerikotameneno opoṋa pu pe rihongwa omahongero nga zikamena kOmbeibela. Ozombongarero nḓe kara mbo maze yenene okukuvatera:

•   okurihonga ouatjiri ohunga na Mukuru.

•   okuzuva nawa omaheero woviṋa mbi tjitwa ndino.

•   okurundurura ongaro yoye.

•    okupaha omapanga omasemba.

  Ondjivisiro ndji mai ku vatere. Omirari vyOmbeibela mbi hungirwa pozombongarero zOvahongonone va Jehova mavi ku vatere okukara ‘nounongo nozondunge.’ (Omiano 4:5) Iho matji hee kutja Ombeibela mai yenene okukuvatera okutwa po ozondando ozombwa mehupo. Oyo wina mai yenene okukuvatera okumuna omaziriro komapuriro mehupo tjimuna nga:

•   Ondando yehupo oya ye?

•   Hapo matu sokuyandja ondjo ku Mukuru mena rouzeu mbu tu muna?

•   Pe tjitwa tjike ku eṱe tji twa koka?

 Pozombongarero zOsondaha pe yandjwa omahungi tjiva ngu maye kongorere kehi mba:

•   Omena raye tji mo sokuṱakamisa imbi Ombeibela mbi i honga?

•   Ombatero mo i munu pi moruveze rwouzeu?

•   Ouhona wa Mukuru u tu ungurira i ye nai.

 “Omuatje ngu twa ri moklasa imwe we ya kozombongarero zetu. Eye wa haama pu neṱunḓu retu, nu aatu tara pamwe omambo wetu. Kombunda yanao, eye we ndji raera kutja aa tjaterwa i yomaziriro ovandu ngaave yandja mombongarero. Eye wina wa tja mokereka yawo owo kave nomambo ku ve rihongera ko tjimuna eṱe.”​—Brenda.

 Hapo ove oo tjiwa? Ozombongarero zombongo pEtuwo rOmerikotameneno otjari, nu kape wongwa ovimariva.

 Ovandu mbe ri mbo mave ku tunduuza. Ombeibela i tja epu rimwe rokuworongana pamwe Otjovakriste “okupanḓiparisasana.” (Ovaheberi 10:24, 25) Okukara noupanga ouwa ku novandu mbe twa po Mukuru na varwe poruveze orutenga ku eta ondjoroka mouye wovandu mbe ripurira ku wo oveni mbwi.

 “Kombunda yeyuva ere, pe ya e rimunu okuwa momuinyo nokuurwa, posi yokutja ovandu pEtuwo rOmerikotameneno ve tjita kutja mbi kare nondjoroka. Kombunda yombongarero tji me i konganda, ami mbi kara nondjoroka okuuta eyuva rarwe.”​—Elisa.

 Hapo ove oo tjiwa? Pe nOmatuwo wOmerikotameneno nge ri kombanda 120 000 yOvahongonone va Jehova mouye auhe, nu ve worongana potuveze tu tu ri kombanda 60 000. Mombura aihe, pe tungwa Omatuwo wOmerikotameneno ape 1 500 okuyakura otjivarero tjovandu tji tji kurira ko. a