Morupa ndwa kapita twa tarere kotjiraisiro Jesus tja yandja. Otjiraisiro ho tji raisa kutja Ouhona wa Mukuru wa zikwa meyuru nu Jesus Kristus onguri Ombara.

Ombeibela i tja indu Jesus tja uta okuhonapara eye wa ramba Satan nozondemone ze meyuru. Owo nai ve zunḓira ko imbi mbi tjitwa kombanda yehi uriri, oro ndi ri epu rimwe nda tjita kutja oviṋa vi ri rire ko ovivi okuza mombura ndji 1914.—Omavandururiro 12:7, 9.

Nandarire kutja ozongaro mouye ze ri rira ko ozombi, Jesus otjOmbara yOuhona wa Mukuru wa tjita oviṋa okuvatera ovandu mouye. Ovandu ovengi ve rihonga nokuṱakamisa omirari vyOmbeibela mehupo rawo tji tjiri otjiṋa Jesus tja hunganeka. (Jesaja 2:2-4) Ovandu ovengi ve rihonga okukara noumune ouwa ohunga noviungura, okukara neṱunḓu eṋingandu nokuhinokuyandjera omauini okurira otjiṋa otjitenga mehupo. Ovandu mba ve rihonga okurundurura ehupo rawo nai nu ve rira ovandu mbu mave yenene okuhupa mouye oupe mbu nohange.

Nandarire kutja Jesus u honapara meyuru, ozohoromende zovandu ngamba onḓe honapara kombanda yehi. Posi yokutja, Mukuru wa raera Jesus kutja, “Honaparera ovanavita na ove!” (Epsalme 110:2) Moruveze rwatjimanga Jesus ma nyono ovanavita na ye oparukaze nu ma eta ondjamo ku imba mbe nonḓuviro ku Mukuru.

Moruveze ndo, Ouhona wa Mukuru mau toora omukambo

• Wokuisapo ozongamburiro zoposyo. Ozongamburiro nḓa honga ovizeze ohunga na Mukuru nu nḓa tjita kutja ehupo ri rire ezeu kovandu ka ze nokukarapo rukwao. Ombeibela i sasaneka ozongamburiro zoposyo komukazendu omukorondu. Ovengi ma ve himisiwa i yomanyoneno ngo.​—Omavandururiro 17:15, 16.

• Wokuyandisa ouhonapare wovandu. Ouhona wa Mukuru mau nyono omauhona aehe wovandu.​—Omavandururiro 19:15, 17, 18.

• Mau isapo ovandu ovarunde. Hapo tjike na imba mbe tjitira wina ourunde nu mbe panḓa okuriwisa kehi yOuhona wa Mukuru? “Ndjambi ma hakana ovarunde mehi.”⁠—⁠Omiano 2:22.

• Mau pandeke Satan nozondemone ze. Satan nozondemone ze kamaave ‘pukisa oviwaṋa rukwao.’​—Omavandururiro 20:3, 10.

Imbi avihe mavi hee ye ku imba mba yakura Ouhona wa Mukuru?

Jesus ngu ri Ombara meyuru, ma ka yenenisa ovingi okukapita ngamwa Ouhonapare wovandu. Eye ma ka honapara puna imba 144 000 nu owo va toororwa movandu. (Omavandururiro 5:9, 10; 14:1, 3) Eye ma tjiti kutja ombango ya Mukuru i tjitwe kombanda yehi. Ouhona wa Mukuru mau ka eta ouwa waye kovandu?

• Mau ka isapo omitjise, nonḓiro. “Nu kape nomundu ngwa tura mehi retu, ngu ma unauna rukwao kutja eye wa vera,” “Nonḓiro kai tji nakukara po rukwao.”​—Jesaja 33:24; Omavandururiro 21:4.

• Mau yeta ohange yatjiri nondjeverero. “Me ve pe ouṋingandu nohange,” nu “auhe ma haama mohange kehi yomuvite na kehi yomukuyu we, nokuhinarive me mu handuza.”​—Jesaja 54:13; Mika 4:4.

• Mave munu ondoṋeno moviungura vyawo. “Owo oveni mave ri imbi mbi va ungura nomake wawo oveni. Oviungura, mbi mave ungura, mavi munu ondoṋeno.”​—Jesaja 65:22, 23.

• Ouzeu mbu munikwa mokuti nozondendera mau zengururwa. “Okuti ku ku ri tjo nu ku kwa kukuta maku nyanda, nokuti onguza maku yoroka nu aku nyomoka otja ongara.”​—Jesaja 35:1.

• Mau hongo ovandu imbi mbi mave hepa okutjita kutja ve hupe nga aruhe. “Nomuinyo waaruhe okwo ngwi okutja owo ve tjiwe Ove, ngu u ri Ndjambi watjiri, nokutja ve tjiwe Jesus Kristus ngu wa hinda.”​—Johanes 17:3

Mukuru u vanga kutja u yorokere ozondaya nḓo. (Jesaja 48:18) Orupa ndu maru kongorere ko maru ka kahurura omuano mbu mo yenene okutjita kutja u ka yorokere ozondaya nḓo moruyaveze.