• Ma toororwa i Mukuru. “Ami mba twirisira ombara yandje . . . nAmi me ku pe oviwaṋa avihe ovinavisenginina vi rire ouini woye; nouye auhe wina mau rire ouini woye.”⁠—⁠Epsalme 2:6, 8.

• Ma pingene Ombara David. “Eṱe twa kwaterwa omuatje, twa pewa omuna . . . Ouvara wouhona we mau ryamene ko komeho, ouhona we mau karerere mohange. Eye ma honapara mokupingena ombara David, ama zikamisa ouvara we.”​—Jesaja 9:6, 7.

• Ma kwaterwa mu Betlehem. “Betlehem . . . , move mamu zu omuhongore . . . Ovandu avehe mouye tjinga amave rizemburuka nounene we.”​—Mika 5:2, 4.

• Ma tondwa i yovandu nu ma ṱu. “Kape na ngwa tara ku ye, eṱe twe mu hahiza otja ngu ha ri otjiṋa. . . . Nungwari omena romauvi wetu eye tja usurwa ovirwaro; eye wa tonenwa ourunde eṱe mbu twa tjita.”​—Jesaja 53:3, 5.

• Ma pendurwa movakoke na tongamisiwa. “Orondu Ove tji u hi nokuisa omuinjo uandje motjovakoke; ko nokujandja omuingona uoje kokumuna omaorero. . . . Neke roje enene ri nonjuṋe nga aruhe.”​—Epsalme 16:10, 11.EEP

Momakuruhungi wovandu, omundu umwe uriri ngu ma hitasana naimbi mbya hungirwa mba nu omundu ngwi o Jesus Kristus. Kombanda yanao omuengeli wa raera Maria ina ya Jesus kutja, “Ndjambi me mupe otjihavero tjouhona tjaihe mukururume David, . . . nouhona we kamaau yanda ko.”​—Lukas 1:31-33.

Jesus kena parira omunane kombanda yehi. Nungwari, ma honaparere po ovandu otjOmbara yOuhona wa Mukuru okuza meyuru. Ovikeṋa mbi tjita kutja ma rire omuhonapare omusemba? Tara koviṋa Jesus mbya tjita indu tja ri kombanda yehi.

•   Jesus ee rikendere ovandu. Jesus aa vatere ovarumendu novakazendu, omitanda novakurundu, kainatja kutja va za pi poo aave varwa vi i varwe. (Mateus 9:36; Markus 10:16) Indu omurumendu ngwa verere omutjise wongana tje riheka ku ye na tja: “Tji wa vanga, Ove mo sora okundjiverukisa,” Jesus wa ṱondjenda ne mu verukisa.​—Markus 1:40-42.

• Jesus we tu honga kutja matu yenene vi okuyorokisa Mukuru. Eye wa tja: “Eṋe kamu nokusora okukarera Ndjambi novimariva tjimwe.” Eye wina wa tja, matu sokutjinda ovandu varwe momuano eṱe mutu vanga okutjindwa. Kombanda yanao, eye wa raisa kutja Mukuru ka yandja ombango ku imbi mbi tu ungura uriri nungwari wina u yandja ombango komuano mbu tu ripura. Kunao kutja tu yorokise omutima wa Jehova matu sokukara nomeritjaerero. (Mateus 5:28; 6:24; 7:12) Jesus wa tja, kutja tu kare nondjoroka, matu sokutjiwa imbi Mukuru mbye undjira ko kweṱe nu matu sokuvitjita.⁠—⁠Lukas 11:28.

• Jesus wa honga kutja okusuvera varwe ku heya tjike. Omambo wa Jesus novitjitwa vye aavi ṱunu komitima vyovapuratene ve. “Otjimbumba tjovandu arire tji tja himisiwa i omuhingo Eye mbuya hongo, Eye we ve hongere otja ngu nouvara.” (Mateus 7:28, 29) Eye we ve honga kutja, “Suvereye ovanavita na eṋe.” Eye nandarire wa kumbira imba mbe mu zepa kutja, “Tate, ve isira, orondu tji ve hi nakutjiwa ihi tji mave tjiti.”​—Mateus 5:44; Lukas 23:34.