Mouatjiri eṱe atuhe tu hupa motuveze otuzeu, nu Jesus wa sasaneka oruveze ndo ‘nOzombamisiro ozonene tjinene.’ (Mateus 24:21) Eṱe kamaatu yenene okuyepa otuveze otuzeu two. Posi yokutja matu yenene okupaha ondjamo. Omomuano uṋe?

Momazuvarisiro we wOkondundu, Jesus wa rakiza kutja, “Rutengatenga paheye ouhona wa Ndjambi na indji ombango Ye.” (Mateus 6:33) Hapo eṱe tu paha vi Ouhona mbo?

Rutengatenga paheye Ouhona wa Mukuru. Ihi tji heya kutja matu sokutwapo Ouhona wa Mukuru rutenga mehupo retu. (Mateus 6:25, 32, 33). Omena ra tjike? Mena rokutja ovandu kamaave yenene okuzengurura omauzeu wovandu. Ouhona wa Mukuru porwe ombu mau yenene okuyenenisa avihe mbyo.

Paheye ombango ye. Matu sokukondja pu matu yenene okuhupa otja komatwako nomirari vya Mukuru. Omena raye? Mena rokutja indu tji matu rityere oveni ouwa nouvi kamaatu munu outoṋi. (Omiano 16:25). Posi yokutja indu tji matu hupu otja komirari vya Mukuru, eṱe katu yorokisa Mukuru uriri nungwari wina irira ondjamo kweṱe.​—Jesaja 48:17, 18.

Rutengatenga paheye Ouhona wa Mukuru na indji ombango ye. Jesus wa rakiza kutja tjiva mape ya mave pandjara omuhunga nu ave utu okupaha ondjamo movimariva ovingi. Varwe mape ya ave kara nomerikendero omengi mehupo  nga tji ve hi noruveze okupaha Ouhona wa Mukuru.​—Mateus 6:19-21, 25-32.

Nungwari, Jesus wa kwizika kutja imba mbe yandja oruvara kOuhona wa Mukuru kave nokukara nouhepe nai nu mave yorokere ozondaya nḓe ha yanda moruyaveze. (Mateus 6:33).

Nandarire kutja ovahongewa va Jesus veserewondo etenga aave paha Ouhona wa Mukuru rutenga na indji ombango ye, owo kave munine omaandero womihihamo nomauzeu nge ri ko nai moruveze rwawo. Posi yokutja owo va ri kehi yondjeverero. Omomuano uṋe?

Owo aave hupu otja komirari vya Mukuru omisemba nu iho aatji ve tjevere komauzeu wovandu mbe ha puratene ku Mukuru. Ongamburiro yawo yokutja Ouhona wa Mukuru mau ya, ye ve vatera okutjinda omauzeu omanene mehupo. Nu Mukuru we vepa “omasa nge kapita avihe” kutja ve tuurunge omauzeu wawo.​—2 Ovakorinte 4:7-9.

Ovakriste veserowondo etenga va kara nonḓuviro kerakiza ra Jesus, rokutwapo Ouhona wa Mukuru poruveze orutenga. Owo va zuvarisa ombuze ombwa yOuhona motukondwa atuhe mu va turire. (Ovakolose 1:23) Pe novandu mbe ungura otjiungura ho ndino?

Ii. Ovahongonone va Jehova ve tjiwa kutja kwa sewa oruveze orusupi ngunda Ouhona wa Mukuru auhi ya eta omaandero wouye mbwi. Kunao, owo ve kondja pu mave yenene okuhupa otja komambo wa Jesus ngu ma ye tja: “Nu indji Ombuze Ombwa yOuhona mai zuvarisiwa mouye auhe i rire omahongononeno koviwaṋa avihe; nomaandero indino otji maye ya.”​—Mateus 24:14.

Hapo ove mo toora omukambo uṋe indu tji wa zu nokuzuva ombuze ombwa? Eṱe matu ku tunduuza okuhorera kovature veserewondo etenga va Makedonie otjihuro tji tji ri moBerea. Indu tji va zuva ombuze ombwa yOuhona wa Mukuru okuza komuapostele Paulus, owo ve i yakura “nonḓero onene.” Owo va “konḓonona Omatjangwa” okutjiwa kutja imbi mbi va zuu ouatjiri nu va toorera ko omikambo ku imbi mbi ve rihonga.⁠—⁠Oviungura 17:11, 12.

Ove wina mo yenene okutjita nao. Indu tji wa paha Ouhona wa Mukuru rutenga na indji ombango ye, mo munu omaundiro nai nu moruyaveze mo yorokere ohange nondjeverero nga aruhe.