MORUVEZE rwa Paulus kapa ri ozondjuwozomomeva nḓa ungurirwe okutransporta ovandu. Kunao ovaryange tji mave vanga okutoora ouyenda, owo aave hepa okupura varwe kutja mave tjiwa ondjuwoyomomeva ndji ma i munda ku mave i nu ndji ma i toora ovandu. (Oviung. 21:2, 3) Nandarire kutja oskepi omuryange ndja toora ka i nokuyenda munda ku ma i, eye aa yenene okupaha oskepi yarwe ndji ma i munda ku ma sokuyenda potuveze pekepeke pu ya ka kurama.​—Oviung. 27:1-6.

Omaryangero nga aaye tjitwa motuveze tjiva twombura uriri, nu kaaruhe ovahinge vozondjuwozomomeva tjaave toora ouyenda meyuva ndi vatye okuhinga. Owo kaave toora ouyenda wawo mena romuinyo omuvi weyuru nungwari wina va ri novizerika, tjimuna tji va munu ekwara ndi ma ri kokora pongoze yoskepi poo tji va munu oskepi ndja teka pomukuro wokuvare, oviṋa otja imbi aavi teya ouyenda wawo. Ovahinge vozoskepi wina aave hingi ozoskepi zawo tjikuhina otjivepo otjizeu. Indu omuryange tja munu oskepi ndji ma i mu twaerere, eye ai pomakuturiro wozoskepi nomitwaro vye okuundja omatjivisiro wokutja oskepi ndjo mai nana ruṋe.

Omutjange womakuruhungi Lionel Casson wa tja: “Otjihuro tja Roma tja ri nomuano omupupu kovandu okumuna oskepi ndji ma i yenene okuvetwaerera kokutja ave ha hepa okupaha oveni. Omakutururiro wozoskepi ya ri pomukuro wonḓonḓu ndji Tiber. Nu popezu nokahuro nga Ostia pa ri oruveze orunene rwomarandisiro ndwa kovererwe i yozomberoo. Ozomberoo ozengi nḓa, za ri ozovandu mbaave kuramene po otjikuturiro tjozoskepi zomahi pekepeke. Ovandu vozoskepi va Narbonne [nai tji tji ri moFrance] va ri na imwe, ovandu vozoskepi va Carthage [nai tji tji ri moTunisia] va ri na yarwe, . . . nu wina pa ri zarwe zomahi warwe. Omundu auhe ngu ma paha oskepi okutoora ouyenda aa sokuyenda kozomberoo okukatara kutja ovihuro viṋe mbi ri mondjira ku ma i.”

Ouyenda mbwi kaa u kambura oruveze oruingi rovaryange, posi yokutja wa ri ounaumba. Povikando tjiva, Paulus tjaa toora ouyenda we otjomuhindwa ozondjuwozomeva aaze tekere mokuvare.​—2 Kor. 11:25