OVAISRAEL va suverere omaimburiro tjinene. Ombeibela potuingi i hungira ohunga novandu mbaave nyanda omaimburiro nokuimbura. Orupa oruingi rOmbeibela rwa zikamena komaimburiro. Otjotjihorera, Omapsalme, Eimburiro rOmaimburiro, nOmiimbo vyOruhoze. Embo rimwe ri tja Ombeibela i raisa kutja Ovaisrael aave ungurisa omaimburiro movitjitwa ovingi pekepeke mehupo rawo.

Omaimburiro mehupo reyuva arihe. Ovaisrael aave nyanda omaimburiro okuraisa omuano mbwaave fula. (Jes. 30:29) Ovakazendu aave nyanda ozongoma zomomake, aave imbura nondjoroka, nu aave pundu indu tji pa zikwa ombara ombe. Nu wina, owo aave tjiti nao indu ovasorondate tji va taara ovita, na pomayuva omanene womerikotameneno. (Ovapang. 11:34; 1 Sam. 18:​6, 7; 1 Ozomb. 1:​39, 40) Ovaisrael wina aave imbura omaimburiro wokuraisa oruhoze indu omundu tja ṱu. (2 Ekuruh. 35:25) Oukahu kutja, Ovaisrael va suverere omaimburiro tjinene.

Ozombara zOvaisrael za suverere omaimburiro. Ombara Saul ya eta David pondjuwo youhona okumunyandera otjiharpe. (1 Sam. 16:​18, 23) Kombunda indu David tja rira ombara, eye wa ungura oviungurisiwa vyokunyanda omizumbi, wa tjanga omaimburiro omawa, nu wa zikamisa ovandu mbaave imbura omizumbi pOndjuwo Ondjapuke ya Muhona. (2 Ekuruh. 7:6; Amos 6:5) Ombara Salomo ya ri novaimbure ovarumendu novakazendu pondjuwo ye youhona.—Omuzuv. 2:8.

Ovaisrael aave ungurisa omizumbi okurikotamena ku Jehova. Ovarumendu 4 000 aave nyanda omaimburiro pOndjuwo ondjapuke ya Muhona moJerusalem. (1 Ekuruh. 23:5) Owo aave nyanda ozongoma zovitenda, oviharpe, nozohiva. (2 Ekuruh. 5:12) Posi ya ozonongo zomizumbi nḓa, kaaze yerike nḓaaze rikotamene ku Jehova nomizumbi. Ovaisrael ovengi aave imbura Omapsalme 120-134 indu tji va ri mouyenda okuyenda koJerusalem okukakara pomayuva omanene. Nu otja komatjangwa wOvajuda, Ovaisrael aave imbura tjiva wOmapsalme a pomariro wOpaska.

Omaimburiro omanahepero tjinene kovakarere va Mukuru ngamba. (Jak. 5:13) Eṱe tu tanga Jehova nomaimburiro. (Ef. 5:19) Omaimburiro ye tu wanisa ku novakambure ovakwetu. (Kol. 3:16) Nu ye tu pa omasa tji tu ri kehi yomauzeu. (Oviung. 16:25) Okuimbura omuano omuwa wokuraisa ongamburiro mu Jehova nokutja twe mu suvera.