JULIAN wa tja: “Indu tjee puratene komatjivisiro wokutja omuatje wandje omuzandu wa kondwa kombongo, ami mba hihamwa tjinene. Eye wa ri omuatje wandje omunene nu twa ri noupanga wopopezu tjinene, nu aatu ungura pamwe oviṋa ovingi. Eye aruhe wa ri notjihorera otjiwa nu okuzambo wa uta okuritjinda momuano mbu ha yakurwa. Omukazendu wandje aa riri aruhe, nu ami hee tjiwa kutja hi mu huhumiṋe vi. Eṱe aatu ripura oveni kutja tu nopoṋa pu tu hi na twa ungura nawa otjovanene.”

Ongwaye okukonda Omukriste kombongo tji ku za ku raisa orusuvero ngunda aku eta omihihamo omingi nao? Omatjangwa ye yandja omapu yeṋe ku ku toorerwa ko omukambo mbwo? Nu hapo ongwaye omundu tje kondwa kombongo?

Oviṋa vivari mbi tjita kutja Omuhongonone wa Jehova ma kondwe kombongo. Otjitenga, Omuhongonone ngwa papitisiwa wa tjiti ouvi ounene. Otjitjavari, eye ke nokuritanaura komauvi we.

Nandarire kutja Jehova ka undjire ko kutja tu rire ohomonena, eye u vanga kutja ovakarere ve ve hupe otja komirari vye. Otjotjihorera, Jehova u tu raera kutja matu sokunakaura ouvi ounene tjimuna oruvakiro okurikotamena koomukuru wovisenginina, ourunga, okupunda oviṋa vyovandu, okuzepa noundjai.—1 Kor. 6:9, 10; Omavan. 21:8.

Hapo mo kupasana kutja omirari vya Jehova vi tu tjevera? Atuhe tu vanga okukara ku novandu vohange nu mbu mo yenene okukara nongamburiro mo. Mena romakwizikiro ngu tu tjita moruveze rwomeriyandjerero ku Mukuru wokuhupa otja komirari mbi ri mEmbo re, tu yenena okumuna ongaro otja indjo mokati kovakambure ovakwetu.

Hapo tjike indu Omukriste ngwa papitisiwa tja tjiti ouvi ounene mena roungundipare we? Ovakarere va Jehova ovaṱakame morukapitaveze va tjita ozondataiziro otja inḓo, nungwari Mukuru ke na pe ve nakaura oparukaze. Ombara David otjihorera tji tji tjiukwa nawa. David wa katuka orukupo nokuzepa, nandarire nao omuprofete Natan we mu raera kutja: “Muhona me ku isire.”—2 Sam. 12:13.

Mukuru wa isira ouvi wa David, mena rokutja David we ritanaura okuza komutima. (Eps. 32:1-5) Momuano tjingewo, omukarere wa Jehova ndino ma yenene okukondwa kombongo uriri indu tje hi nokuritanaura poo tji ma kayenda komurungu okutjita ouvi. (Oviung. 3:19; 26:20) Indu omundu ngwi tje hi nokuraisa kutja tjiri we ritanaura, ovanene vombongo mbe karera mokomiti ombangure mave sokukonda omundu ngwi kombongo.

Rutenga, mape ya atu munu kutja ondando yokukonda omundu ngwa tjiti ouvi ondando onene poo kai nokuraisa orusuvero, nu tjinenenene indu tji tu noupanga wopopezu ku nomundu ngo. Posi yokutja, Embo ra Jehova ri yandja omapu omawa wokukambura kutja ondando otja indjo i raisa orusuvero.

Jesus wa tja: “Nu imbi oviungura vye [poo “ovikongorere ko”] ombi raisa kutja imbwi ounongo owo ouatjiri.” (Mat. 11:19) Ondando ombwa yokukonda omundu kombongo ngu hi nokuritanaura ku eta ovikongorere ko oviwa. Ngatu tare koviṋa vitatu mbi:

Okukonda omundu kombongo ngwa tjiti ouvi ku eta ondjozikiro kena ra Jehova. Mena rokutja tu tjinda ena ra Jehova, omeritjindiro wetu ye ṱuna kena re. (Jes. 43:10) Otja ongaro yomuatje tji eta ondjozikiro poo ondjambu kovanene ve, ku nao oumune wovandu ohunga na Jehova u rekarekera kovihorera oviwa poo ovivi ovandu mbi ve muna movakarere va Mukuru. Ena ra Mukuru ewa ri pewa ondjozikiro indu ovakarere ve tji ve hupa otja komirari vye. Ongaro ndjo ya ri tjimuna moruveze rwa Esekiel, indu ovandu voviwaṋa mbyo tji va waneka ena ra Jehova ku nOvaisrael.—Esek. 36:19-23.

Tji matu tjiti oruvakiro matu yamburura ena ra Mukuru eyapuke. Omuapostele Petrus wa tunduuza Ovakriste kutja: “Kareye nonḓuviro ku Ndjambi nu amu riyandjere kutja mu honaparerwe i ozonḓuma nḓu mwa ri na zo mokuhatjiwa kweṋu. Rireye ovayapuke mu avihe mbi mamu tjiti, Ndjambi ngwe mu isana tjinga e ri omuyapuke. Omatjangwa maye tja: ‘Rireye ovayapuke, ami tjinga ambi ri omuyapuke.’ ” (1 Petr. 1:14-16, ONT) Omeritjindiro omakohoke ye eta ondjozikiro kena ra Mukuru.

Indu umwe wOvahongonone va Jehova tje tjita ouvi, omapanga we mape ya aye tjiwa otjiṋa hi. Okukondwa kombongo otjiṋa tji tji raisa kutja Jehova u novandu ovakohoke mbe nonḓuviro komirari vye kokutja ve yenene okurira ovayapuke. Eyuva rimwe omundu umwe we ya kombongarero yombongo ndja ri pEtuwo rOmerikotameneno moSwitzerland, nu wa tja ma vanga okurira okaṋepo kombongo. Omuṱena kwe wa kondwa kombongo mena rokutjita oruvakiro. Eye wa tja aa vanga okurikuta ku notjira “tji tji ha yandjere omeritjindiro omavi.”

Okukondwa kombongo ku ṱiza ombongo yOukriste oukohoke. Omuapostele Paulus wa rakiza kOvakorinte koumba mbu za mokuyandjera omundu ngu tjita ouvi owina okukara mokati kawo. Eye wa sasaneka ongaro ombi ndji tjitwa i yovandu otja imbo ku nosurise ndji surisa otjisema poo oruhere rwozomboroto aruhe. Eye wa tja: “Osurise onḓiṱi i surisa otjisema atjihe.” Eye wina we ve raera kutja: “Ingwi omurunde nga isiwe mo mokati keṋu!”—1 Kor. 5:6, 11-13.

Pe munika aayo omundu “ingwi omurunde” ngwa tamunwa i Paulus aa tjiti oruvakiro owina. Varwe mombongo aave munu kutja ongaro ye kaya ri ombi tjinene. (1 Kor. 5:1, 2) Indu ouvi ounene otja imbwo tji u ha perwe ombango yapeke, Ovakriste varwe mape ya atja ve kongorera ozongaro otja inḓo motjihuro mu va tura. Okuhinokuyandja ombango kouvi mbu tjitirwa owina ku tunduuza okuhinokuṱakamisa omirari vyOmbeibela. (Omuzuv. 8:11) Tjimuna omawe tji ye rihoreka kehi yomeva tji ye yenena okuhihamisa oskepi, momuano tjingewo ouvi waimba mbe ha vanga okuritanaura u yenena okuṱuna kongamburiro yavarwe mbe ri mombongo.—Judas 4, 12.

Okukondwa kombongo mape ya aku vatere omundu ngwa tjiti ouvi okumuna kutja eye u ri posyo. Jesus wa hungira ohunga nomuatje omuzandu omutanda ngwa isa onganda yaihe nu a kamorosera otjirumatwa tje mehambaneno rouye. Omuzandu ngwa pandjara ngwi we rihonga kutja okukara kokure nonganda yaihe otjiṋa otjizeu. Korusenina omuzandona ngwi we ritanaura nu a toora omukambo wokuyaruka keṱunḓu re. (Luk. 15:11-24) Ehungi ra Jesus ohunga na ihe worusuvero ngwa yorokera omuatje we omuzandu tja kotoka konganda mari tu vatere okuzuva nawa oumune wa Jehova. Jehova u tu raera kutja: “Hi kara nonyuṋe tji me munu omunauvi ama ṱu. Ami itje vanga okumumuna a poka kouvi kutja a kare nomuinyo.”—Esek. 33:11.

Ombongo yOukriste eṱunḓu retu ndi noupanga ouwa ku na Jehova. Indu umwe tja kondwa kombongo, eye ke norupa meṱunḓu ndi nu eye mape ya u zera okukara pu neṱunḓu ndi rukwao. Kombunda yokumuna ovikongorere ko vyomeritjindiro we omavi, eye mape ya u muna ozondataiziro ze nu a zemburuka omuano eye ma ri noupanga ouwa ku na Jehova nombongo. Ihi mape ya atji mu tunduuza okukotoka keṱunḓu re ndi noupanga ouwa ku na Jehova.

Okuvatera omundu ngwa kondwa kombongo kutja ma kotoke matu hepa okumuraisira orusuvero mokukongorera omirari vya Jehova ohunga na imba mbe kondwa kombongo. Omutjange wEpsalme David wa tja: “Omundu omusemba ma sora okundjitona nokundjivyura morusuvero.” (Eps 141:5) Otjotjihorera, ripura nomundu ngu ma ri ovikurya nu onyama ai mu rama. Eye ke nokusuvana nawa, nu ke nokurivatera. Nu wina eye ke nokuyenena okuhungira. Indu tji pe hi nomundu okumuvatera tjimanga ma yenene okuṱa. Okuzambo epanga re ari mu pambara metambo kutja onyama i pite momuryu. Okupambarwa mape ya aku mu hihamisa, posi ya maku yama omuinyo we. Momuano tjingewo, David aa munu kutja nandarire okuvyurwa ku hihamisa okwo maku mu vatere.

Povikando ovingi, okukondwa kombongo oomavyuriro omundu nge hepa okukotoka ku Jehova. Kombunda yozombura omurongo, omuatje omuzandu wa Julian, ngwa tamunwa rukuru morupa ndwi, wa rundurura ehupo re, a kotoka kombongo, nu nai u karera otjomunene wombongo. Eye wa tja: “Oruveze ndu mba konderwe kombongo, oviṋa mbye tjiti aavi ndji hihamisa. Okukondwa kombongo otjiṋa ami tjee hepa.”—Hebr. 12:7-11.

Iho tjiri otjihihamise indu umwe tja kondwa kombongo, posi ya ondando oyokumuvatera kutja ma kotoke ku Jehova. Otjiṋa otjinanḓengu kweṱe atuhe okuyandjera omavyuriro ngo kutja ye ungure. Omomuano uṋe mu matu yenene okutjita nao?

Ovanene vombongo aruhe ve kondja okuhorera korusuvero rwa Jehova, tjinenenene indu tji mave raere omundu kutja kamuhongonone wa Jehova rukwao. Owo norusuvero ve kahurura nawa oviṋa mbi ma hepa okutjita kutja ma kotoke ku Jehova nokurira orupa rwombongo rukwao. Indu umwe tja kondwa kombongo tji ma raisa okuvanga okukotoka kombongo, ovanene vombongo ve mu varura nu ave mu zemburukisa oviṋa mbi ma sokutjita kutja ma kotoke ku Jehova. a

Ouṋepo weṱunḓu u raisa orusuvero kombongo na komundu ngwa kondwa kombongo indu tji mave yandja oruvara kondando ndja tjitwa i yovanene vombongo. Julian wa tja: “Eye ngunda omuatje wandje omuzandu, posi ya omeritjindiro we ya tjita kutja a ha tu kara pamwe rukwao.”

Avehe mombongo ve raisa orusuvero rwatjiri komundu ngwa kondwa kombongo mokuyandja oruvara komavyuriro Jehova nge yandja okupitira movanene vombongo. Ihi matji hee kutja owo kave sokukara pu na ye poo nandarire okuhungira ku na ye. (1 Kor. 5:11; 2 Joh. 10, 11) Wina avehe mombongo mave sokuyandja orusuvero nombatero keṱunḓu raingwi ngwa kondwa kombongo. Indwo ooruveze oruzeu tjinene keṱunḓu. Eṱe katu sokutjita kutja ve mune kutja owo karupa rwombongo rukwao.—Rom. 12:13, 15.

Julian wa tja: “Indu omundu tja tjiti ouvi nu tje hi nokuritanaura, eye ma hepa okukondwa kombongo. Nandarire kutja ya ri otjiṋa otjihihamise, korusenina omuatje wandje wa kotoka ku Jehova. Andakuzu mba kayenda komurungu okukara pu nomuatje wandje omuzandu, eye katja kotoka ku Jehova.”