Omaprofetero 1. Omanyinganyingiro wehi

“Mamu kara omanyinganyingiro wehi omatirise.”—LUKAS 21:11.

● Winnie, ngwa ri nombura imwe nomieze vine, wa nanwa kehi yovinyanyaukiro moHaiti. Ovapitise vombuze mbaave pitisa oumba mbwi moTV, va zuva ombosiro yokanatje. Okanatje ngo kahupa, posi yokutja ovanene vako kave hupire.

HAPO OMAPU YEṊE NGU MAYE ṊUNISA OTJIṊA HI? Mu Januari 2010, mwa ri omanyinganyingiro wehi nga ri nomasa wo 7.0 moHaiti nga zepa ovandu votjivarero tjokombanda 300 000. Wina ovandu engete rimwe nokanḓe nondatu va isiwa nokuhina ozondjuwo mombapaiziro yeho. Nandarire kutja omanyinganyingiro wehi nga ri moHaiti yari omanene, owo kaya ri omatenga. Pokati ka April 2009 na April 2010, pa tjitwa omanyinganyingiro wehi ape 18 mouye auhe, nga ri nomasa tjinene.

OVANDU OVENGI VE PIRURA VI OUMUNE MBWO? Owo ve tja, eṱe katu munu omanyinganyingiro wehi omengi okukapita oruveze orukuru, nungwari ounongo wouye ombwa tjita kutja pe munike aayo omanyinganyingiro wehi ya rira omengi.

HAPO OUMUNE MBWO OUATJIRI? Tara kepu ndi: Ombeibela kai hungirire kotjivarero tjomanyinganyingiro wehi momayuva omasenina. Nungwari i tja, “mamu kara omanyinganyingiro wehi omatirise” “momahi pekepeke,” nge tjita kutja i rire tjimwe tjoviṋa mbi nana ombango moruveze ndwi.—Markus 13:8; Lukas 21:11.

HAPO OVE U NOUMUNE UṊE? Hapo u muna omanyinganyingiro wehi omanene poo omatirise otja Ombeibela pu ya kwizika?

Omanyinganyingiro wehi kangeri otjiṋa atji yerike tji tji raisa kutja tu hupa momayuva omasenina. Posi yokutja, i yemwe yomaprofetero nge yenenisiwa. Tara kotjiṋa otjitjavari.

[Blurb]

“Eṱe [ovandu mbe konḓonona omuano ehi mu ra ungurwa] tu tja omanyinganyingiro wehi omanene. Varwe ve tja omanyinganyingiro wehi omatirise.”​—KEN HUDNUT, OMUUNGURE MO U.S. GEOLOGICAL SURVEY.

[Picture Credit Line]

© William Daniels/​Panos Pictures