OMAPURIRO OKUZA KOVALESE . . .

Ouṋe ngwa ungura Mukuru?

Ripura na ihe ngu ma hungire ku na omuatje we omuzandu wozombura hambombari. Nu a tja: “Ozombura ozengi nḓa kapita, Mukuru wa mema ehi noviṋa avihe mbi ri kombanda yaro, nu wa ungura eyuva, omueze nozonyose.” Okazandona ake ripura ohunga noviṋa mbyo oruveze orusupi nokuzambo ake pura kutja: “Hapo tate, ouṋe ngwa ungura Mukuru?”

Ihe a ziri atja: “Kape nomundu ngwa ungura Mukuru. Eye aruhe okaa ri.” Eziriro ndo ra yenene komuatje oure woruveze orusupi uriri. Posi yokutja, tje kuru, wa utu okuripura nepuriro ndo rukwao. Ouzeu ku ye okuzuva nawa kutja mape ya vi omundu aha kara nombutiro ngunda ehi neyuru avi nombutiro. Nu e ripura kutja: ‘Hapo Mukuru wa za pi?’

Ombeibela i zira vi epuriro ndo? Ombeibela i zira epuriro ndo tjimuna ihe motjihorera tji twa hungirire ko. Moses wa tjanga kutja: “Muhona, . . . Ngunda au hiya mema ozondundu nau hiya uta ehi nouye, tjandje Ove opu u ri Ndjambi waaruhe, notjinga amo karerere Ndjambi aruhe nga aruhe.” (Epsalme 90:1, 2) Momuano otjingewo, omuprofete Jesaja wa tja: “Ko nokutjiwa are? Ko zuvire are? Muhona Eye ongu ri Ndjambi waaruhe, nu wa mema ouye auhe.” (Jesaja 40:28) Nu wina, orutuu rwa Judas rwa tja Mukuru okaa ri “okuza korukuru nga konambano nga ko nga aruhe!”—Judas 25.

Omatjangwa ngo ye raisa kutja Mukuru “Ombara yaaruhe,” otja omuapostele Paulus pa heya. (1 Timoteus 1:17) Ihi matji hee kutja Mukuru okaa ri aruhe, nandarire ozombura ozengi nḓa kapita. Neye aruhe ma kara po moruyaveze. (Omavandururiro 1:8) Ku nao, okukara ko aruhe maku hee kutja eye Omunamasaayehe.

Omena raye tje rira ouzeu okuzuva nawa otjiṋa ho? Mena rokutja ozombura nḓu tu hupa ozonḓiṱi, ku nao ze tu pa ouripura mbwa panguka ohunga nomuano Jehova me vara oruveze. Mena rokutja Mukuru u karerera, ozombura eyovi ku ye ze ri tjimuna eyuva rimwe. (2 Petrus 3:8) Otjotjihorera: Hapo ombahu ndji hupa oure womayuva 50 uriri, mape ya ai zuu nawa oure wozombura nḓu tu hupa nḓe ri 70 poo 80? Kako kamaape ya! Posi yokutja, Ombeibela i hungira kutja eṱe tu ri tjimuna ozombahu komurungu wOmuute wetu. Nandarire omuano mbu tu ripura wa panguka ku imbwi owe. (Jesaja 40:22; 55:8, 9) Ku nao katjikumise kutja katu yenene okuzuva nawa oviṋa tjiva ohunga na Jehova.

Nandarire kutja ouzeu okuzuva nawa ombutiro ya Mukuru, otjo otjiṋa tji mo yenene okuzuva. Ndoovazu pa ri nomundu ngwa uta Mukuru, omundu ngo atja rira Omuute. Posi yokutja, Ombeibela i tja Jehova ongwa “uta oviṋa avihe.” (Omavandururiro 4:11) Kombanda yanao, matu tjiwa kutja kapa ri eyuru nehi oruveze rumwe. (Genesis 1:1, 2) Hapo eyuru nehi vya za pi? Omuute woviṋa mbyo aa sokukara po rutenga. Eye wina wa ri ko ngunda aku hi ya kara ovandu varwe, tjimuna Omuna we omukwatwaerike novaengeli. (Job 38:4, 7; Ovakolose 1:15) Otjiperi kutja, eye wa ri erike rutenga. Eye ka memenwe mena rokutja kapa ri notjiṋa tjaatji sokumuungura.

Ombutiro yetu noyehi neyuru i raisa kutja pa ri nomundu ngwa hupire rukuru ngu ri Mukuru. Ingwi ngwa tjita kutja ehi neyuru vi kare ko, ongwa twa po omirari kutja oviṋa avihe vi kayende nawa, eye wa ri ko aruhe. Eye erike ongwa yandja omuinyo koviṋa avihe.—Job 33:4.