Baka ba mayuh menua bukai, piak ti bekuasa di Sri Lanka ngaga atur ngambika nagang COVID-19 ari majak ngelekai. Kena ngasika atur tu, bala menyadi kitai ba eklisia jaku bengal bisu diatu ngena perengka teknologi ngambika nginjil ngagai orang ke bengal, mimit bengal, tauka bisu.

Seiku pengerintis indu ke benama Vihanga Fernando nginjil ngena surat. Laban mayuh orang ke bengal bisu tusah deka macha, iya nepuka mayuh gambar ti nerangka ajar Bup Kudus dalam surat iya.

Keterubah iya, Menyadi Rosie Chithravelautham ngumbai diri enda ulih ngajar Bup Kudus ngena video call. Ku iya nerang: “Suba, maya aku nguji deka video call enggau orang bengal, sida tusah meretika aku laban line internet enda kuat.” Taja pia, Rosie keran deka neruska pengawa ngajar orang Bup Kudus pengelama penanggul COVID-19 tu. Iya mutuska nguji chara tu baru. Diatu, iya tetap bisi tiga iti pelajar Bup Kudus enggau orang, lalu sida pan datai gempuru nengah video call.

Seiku menyadi indu ti bengal, ke benama Nirosha Shiranthi, dibaptisa kena Mac, 2020. Iya berasai takut nginjil ngena video call. Iya besampi ngagai Jehovah pasal pengirau ati iya. Iya lalu deka nyadi pengerintis sukung maya musin Ngingatka Pemati Jesus. Mayuh orang ke dibai Nirosha datai Ngingatka Pemati Jesus amat gaga ati datai, lalu sekeda ari sida deka nemu agi pasal tanda hari ti penudi. Nirosha lalu ngepunka tujuh iti pelajar Bup Kudus. Ku iya madah: “Lebuh aku nginjil, aku amat gaga ati. Taja pan kitai enda ulih pansut ari rumah, kitai agi ulih nginjil. Peneka Jehovah sigi seruran dikeamatka.” Nirosha udah mutus nyadi pengerintis sukung enggau tetap.

Kitai semua gaga ati nerima riput ti manah tu ari Sri Lanka. Semua asil ti manah tu ketegal pemagas bala menyadi kitai ke nginjil ngena jaku bengal bisu, ti bebendar deka ngemuliaka nama Jehovah.—Masmur 113:1.