Bisi sekeda ari nembiak ngasaika tusah amat enti sida enda ulih pansut ari rumah ketegal hari ujan. Sida berasai boring laban enda ulih ngereja nama-nama utai tauka kini-kini. Seiku nembiak ke benama Robert madah, “Enti baka nya, aku duduk aja meh. Aku enda nemu nama patut digaga.”

 Kala nuan ngasaika utai ti sama? Enti kala, topik tu manah ke nuan!

•  Nama utai ke patut ditemu nuan

•  Utai ke ulih digaga nuan

•  Nama ku nembiak serambau nuan

•   Ukai reti iya teknologi nya seruran ulih nulung.

   Enti kitai meda Internet, amat enda berasai. Tang, nya ulih ngasuh untak kitai enda ulih berunding mayuh. Jeremy, 21 taun madahka, “Kekadang, lebuh kitai meda skrin nya, untak kitai kusung aja.”

   Seiku nembiak indu ke benama Elena mega setuju enggau utai tu. “Endang amat, teknologi nya bisi guna,” ku Elena. “Tang, lebuh kitai main handphone, kitai enda beratika utai ke ngelingi kitai. Nya kebuah, lebuh nuan enda meda handphone, tu ngasuh nuan berasai boring agi!”

•   Kitai ulih berubah.

   Asai ti boring nya ulih dibuai enti kitai mayuh pengawa. Nya bepanggai ba, ni naka pengerindu nuan ngagai sesiti pengawa ke digaga nuan. Chunto, seiku nembiak indu ke benama Karen madah, “Aku boring amat nurun sekula taja pan ba sekula bisi mayuh pengawa. Ngambika aku enda boring, aku patut rindu enggau utai ke digaga aku.”

 Nemu nuan? Anang kelalu irau enti nadai pengawa. Tang, kena meh peluang nya nyadi kreatif agi.

 Kereja meh utai ti baru. Giga kaban ti baru. Bisi hobi ti baru. Orang ke rindu belajarka utai ti baru enda jampat boring taja pan iya kediri aja. Pia mega, iya empu pan ulih nyadi orang ti ngerinduka ati!

 Prinsip Bup Kudus: “Kereja enggau bebendar sebarang pengawa ti dikereja nuan.”—Pengajar 9:10.

 “Empai lama ti udah, aku belajar jaku Mandarin. Ninting hari aku belajar lalu tu ngasuh aku nemu diri, iya ke amat rindu belajar. Ketegal bisi tuju, tu meransang aku. Runding aku enda lebu ngapa pia mega jam aku enda dibasau.”—Melinda.

 Beberatka tuju ati nuan. Kitai deka bebendar agi ngereja sesiti utai enti kitai nemu asil iya. Nyentukka, kereja sekula nya pan ulih nyadi enda boring enti kitai meda asil iya.

 Prinsip Bup Kudus: “Utai ti pemadu manah ti tau dikereja kitai . . . ngelantangka diri ngena utai ti udah diulih kitai.”—Pengajar 2:24.

 “Ba peresa ke penudi, aku belajar lapan jam sehari laban bisi mayuh utai ke patut dipelajarka. Tang aku enda boring laban bisi tuju ati. Aku deka pass ba peresa nya. Nya meh meransang aku.”—Hannah.

 Nerima utai ke enda ulih diubah nuan. Kekadang utai ti ngerinduka ati pan ulih ngasuh nuan boring. Indah kaban ti rapat pan ulih nginsil semaya sida lalu ngujungka nuan kediri aja. Kitai engka berasai asa sereta tusah ati, tang tapi meh penanggul nya enggau chara ti manah.

 Prinsip Bup Kudus: “Orang ke lantang ati endang seruran nyamai diau.”—Jaku Dalam 15:15.

 “Kaban aku madahka, aku patut belajar ngena awak kediri empu. Iya madah, aku patut nemu magi awak, maya begulai enggau orang bukai sereta maya aku empu kediri. Semua orang patut nemu magi awak baka nya.”—Ivy.