Siti ari utai ke pemadu pedis diasaika bala anak lebuh apai indai sida sarak. Enti apai indai nuan sarak, baka ni nuan ulih napi penusah ati nya?

Ba artikel tu

•  Tiga pekara ke enda patut digaga nuan

•  Tiga pekara ke patut digaga nuan

•  Nama ku nembiak serambau nuan

 Tiga pekara ke enda patut digaga nuan

 1. Nyalahka diri

 “Indai aku kala madah, penanggul ke nyadi ba entara apai enggau indai aku berengkah pengudah aku ada. Nya kebuah aku ngumbai, ketegal aku meh seduai iya sarak.”—Diana.

 Kingatka pekara tu: Apai indai nuan sarak ukai ketegal nuan. Nya nyadi, ketegal penanggul seduai iya empu. Ukai nuan ke ngasuh penanggul ba seduai iya nyadi, lalu nuan mega enda ulih mutarka nya. Seduai iya empu meh ke betanggungjawap mutarka penanggul ba tikah seduai iya.

 2. Nyimpan dendam

 “Aku amat ringat enggau apai laban iya gila indu. Amat tusah aku ka pechayaka iya agi.”—Rianna.

 Kingatka pekara tu: Endang amat, nuan patut ringat sereta tusah ati lebuh apai indai nuan sarak. Tang, enti nuan nyimpan dendam nya ulih ngemediska nuan empu. Nya ulih ngachau pengerai nuan empu, sekalika nya ba fizikal enggau emosi. Pandakka jaku, nyimpan dendam baka kitai ke ngirup rachun udah nya ngarapka orang bukai ke pedis. a

 3. Kakang ati sekalika nuan ulih lantang tauka enda lebuh nuan kawin dudi hari

 “Aku takut, aku ngulang penyalah apai aku. Aku takut, enti aku kawin lalu udah nya bisi anak, aku pan ngulang penyalah apai indai aku lalu ngujungka aku sarak.”—Jessica.

 Kingatka pekara tu: Ketegal apai indai nuan sarak, ukai reti iya nuan mega deka nunda penyalah sida dudi hari. Tang iya ke amat, nya ngajar nuan enggai ngulang penyalah sida dudi hari. Ngambika chunto, nuan engka nemu agi nama sifat ke dikedekaka nuan lebuh nuan deka ngiga kaling pengidup. Nuan empu mega belajar, nama sifat ke patut dikembuan nuan enti deka nyadi laki tauka bini ti manah.

 Tiga pekara ke patut digaga nuan

 1. Berandau meh. Kesuah iya, orang ke mendam asai ati diri tauka runding ti enda manah selalu ngereja pengawa ke ngemedis diri, baka kelalu balat ngirup ai bisa tauka makai dadah. Nya kebuah, berandau meh, anang kelalu nyimpan asai ati nuan, tang uji kereja tu:

 Berandau enggau apai indai nuan. Enti apai tauka indai nuan nguji mujuk nuan bepiak ngagai siku ari seduai iya, uji terangka enggau chara ti nelap, utai ke nyadi tu ngasuh nuan enda nyamai ati. Enti nuan tusah ka nyebut nya terus-terang, nuan ulih nuliska nya nengah surat.

 Berandau enggau kaban ke ulih dikearapka nuan. Enti bisi kaban ke ulih ningaka asai ati nuan aja pan udah chukup manah. Bup Kudus madah, “Pangan (tauka kaban) endang seruran ngayanka pengerindu sida. Nama guna bisi kaban belayan enti sida enda enggau natka penusah?”—Jaku-Dalam 17:17.

 Berandau meh enggau Petara nuan. Pending Petara seruran ningka nuan lalu “nyaut sampi” nuan. (Masmur 65:2) Bup Kudus madah, “Buai semua pengirau kita ngagai Petara laban Iya ibuhka kita.”—1 Peter 5:7.

•   Nuan senang agi berandau enggau sapa? Apai tauka indai?

•   Sapa kaban (sekalika nya serambau tauka tuai agi) ke ulih nulung nuan?

•   Nama utai ke deka disebut nuan dalam sampi?

 2. Nelebaka diri enggau ubah ke nyadi ba pengidup

 Pengudah apai indai nuan sarak, nuan engka patut nelebaka diri enggau rumah, sekula, masalah duit, indah bala kaban ke baru. Nuan tentu stress lalu ngasaika mayuh utai udah berubah. Nyadi, baka ni nuan ulih mutarka penanggul tu? Uji pikirka chara nuan ulih nelebaka diri enggau ubah ke nyadi ba pengidup nuan ke diatu.

•   Pengudah apai indai nuan sarak, nama ubah ti pemadu besai ke patut digaga nuan?

•   Baka ni nuan ulih nelebahka diri enggau ubah nya?

 3. Kelala meh pemanah nuan empu

 Amat, lebuh apai indai nuan sarak, nuan tentu mayuh utai dikeirauka. Tang ari utai ke nyadi, nuan mega ulih nemu nama sifat ti manah ke dikembuan nuan. Indah, nuan ulih ngemansangka sifat manah ke bukai. Jeremy madah, apai indai iya sarak maya iya beumur 13 taun. Ku Jeremy, “Ketegal apai indai aku sarak, ka pan enda aku patut ngereja mayuh tanggungjawap. Lebih-lebih agi, aku anak tuai, nyadi aku patut nulung indai lalu nyaga madi biak aku.”

•   Pengudah apai indai nuan sarak, nama sifat manah ke baru ditemu nuan ba nuan empu?

•   Nama sifat bukai ke deka dikemansangka nuan?