TANYA ARI BALA NEMBIAK

Nama Kebuah Begempuru ba Palan Gempuru?

TEBAH

Saksi-Saksi Jehovah begempuru ba Palan Gempuru sida dua kali seminggu. Nama utai ke digaga ba dia, enggau nama penguntung ke diulih nuan enti nuan datai ngagai gempuru tu?

Nama utai ke digaga ba Palan Gempuru?

Palan Gempuru nya sempama sekula ti ulih endur nuan ngulihka lalau ti pemadu manah ke diambi ari Bup Kudus. Gempuru ke dipejalaika ba dia ulih nulung nuan dalam:

belajarka pemendar pasal Petara.
nemu nama kebuah sesiti utai nyadi dalam pengidup.
nyadi orang ke manah agi.
bulih bakih ti bendar.

Palan Gempuru Saksi-Saksi Jehovah endur kami selalu berandauka topik pasal Perintah Petara.—Matthew 6:9, 10; 24:14; Luke 4:43.

Nama kebuah nuan patut datai begempuru?

Penerang ke dipelajarka nuan ulih nulung. Ajar ari Bup Kudus ke dikerandauka dalam gempuru Saksi-Saksi Jehovah ulih nulung nuan bulih “penemu-dalam enggau runding ti dalam.” (Jaku Dalam 4:5) Reti iya, Bup Kudus ulih nulung nuan ngaga pemutus ti betul dalam pengidup. Bup Kudus mega ulih meri saut ngagai tanya ti beguna baka:

Ninting ujung minggu bisi cheramah deka dikenataika ba gempuru. Mayuh macham tajuk cheramah, chunto iya:

Nama kebuah Bup Kudus nya ulih ngiring kitai?
Dini nuan tau bulih tulung lebuh napi penusah?
Diatu, nama utai ke digaga Perintah Petara ke kitai?

“Seiku ari orang ke sama sekelas enggau aku kala datai begempuru. Iya duduk enggau kami sebilik, lalu kami bekunsi bup enggau iya. Pengudah abis gempuru, iya madahka diri amat rindu enggau saut ke diberi bala mayuh. Iya mega madahka, ba gerija sida nadai utai ke dikena belajar baka kami.”—Brenda.

Nemu nuan? Ba Palan Gempuru, nadai ngumpul duit pupu, tama enda bebayar.

Kaul ti ulih meransang nuan. Nitihka ajar Bup Kudus, siti kebuah orang Kristian patut datai begempuru laban nya ulih “meransang pangan diri.” (Hebrew 10:24, 25) Kaul ti manah begulai enggau orang ke beberatka Petara nya amat ngelantangka ati. Kelebih agi, kemayaharitu mayuh orang semina berundingka diri empu aja.

“Pengudah sepemanjai hari, aku berasai tusah ati sereta lelak, tang orang ke ditemu aku ba Palan Gempuru meri aku pengelantang. Lebuh ba rantau jalai pulai ke rumah, aku berasai gaga sereta besedia nyediaka diri enggau penanggul ba hari siti.”—Elisa

Nemu nuan? Kira-kira lebih ari 120,000 iti eklisia Saksi-Saksi Jehovah, ba serata dunya begempuru enggau pangan diri, ba 60,000 iti endur ti enda sama. Ninting taun, rata-rata 1,500 Palan Gempuru didirika laban penyampau orang ke datai majak nambah. a

Nama ku nembiak serambau nuan

“Maya aku ba sekula sekondari, seiku ari orang ke sekelas enggau aku beberapa kali datai begempuru. Iya amat rindu meda pemelajar Bup Kudus nya orang ti enda sama umur lalu sama-sama bela belajar. Empai lama tu tadi, bos aku mega bisi datai begempuru, lalu iya mega rindu meda kami mayuh ngena Bup Kudus. Asai terima kasih iya ngagai gempuru kami, ngasuh aku rindu agi datai begempuru!”—Jessica.

“Aku ngasaika gempuru nya ulih meri aku pengelantang pasal pengirau ke ditapi aku ninting hari. Kami belajar baka ni deka bulih pengidup ti bisi reti, nyadi orang ke manah agi, enggau mayuh agi. Tiap kali aku pulai ari begempuru, aku ngasaika diri diperansang sereta lantang.”—Timothy.

“Seiku lelaki ke dibai aku ngagai gempuru madahka, ‘Iya ke amat, aku datai ngagai gempuru kita laban aku deka nunjukka pengarap kita salah, tang ari gempuru nya, baru meh aku nemu pengarap aku ke salah!’ Iya amat rindu meda pemanah bala Saksi. Iya madahka, ‘Taja pan baru ngelala kita, tang aku ngasaika baka udah lama ngelala pangan diri!’”—Jacob

“Kekadang aku bisi runding, ‘Aku deka terus pulai pengudah abis gempuru.’ Tang lebuh datai ba endur begempuru, runding nya nadai agi. Pengudah abis begempuru, aku bejaku enggau orang ke datai lalu enda ingatka diri deka pulai tumu. Enti ukai ketegal bisi gempuru ke baka tu, aku tentu enda bulih bakih ti manah baka sida.”—Madison.