Nitihka pansik, bisi 80 peratus bala nembiak ba Amerika besampi, tang semina setengah ari penyampau nya ke besampi ninting hari. Nya kebuah, bisi bala nembiak ke berunding: “Kati sampi nya semina nulung kitai ba emosi, tauka nama penguntung ke bukai ti diulih ari sampi?”

•  Nama reti sampi?

•  Kati Petara ningaka sampi?

•  Nama utai ke ulih disampika aku?

•  Nama ku orang ke serambau nuan

 Iya ke amat, sampi nya chara kitai ulih bejaku enggau Penempa kitai pasal sesiti utai. Nya alai, nama reti utai tu ba kitai? Perundingka, Jehovah nya pemadu bekuasa ari semua orang, tang Iya “enda jauh ari kitai siku-siku.” (Kereja Rasul 17:27) Ukai nya aja, dalam Bup Kudus mega bisi madahka kitai siti kangau ti amat manah: ‘Datai semak ngagai Petara, lalu Iya deka datai semak ngagai kita.’​—James 4:8.

 Baka ni nuan ulih semak ngagai Petara?

•   Siti chara nya nengah sampi. Nya meh chara nuan ulih bejaku ngagai Petara.

•   Chara ke bukai iya nya belajarka Bup Kudus. Nya meh chara Petara “bejaku” enggau nuan.

 Kitai ulih bejaku ngagai Petara nengah sampi sereta belajarka Bup Kudus. Tu ulih ngerapatka agi kaul nuan enggau Petara.

 “Ulih bejaku enggau Petara ti Pemadu Tinggi iya nya Jehovah, siti basa ti besai ba mensia.”​—Jeremy.

 “Aku ngasaika diri majak rapat enggau Jehovah lebuh aku mansutka asai ati diri ngagai Iya nengah sampi.”​—Miranda.

 Taja pan nuan pechaya sereta besampi ngagai Petara, tang kekadang nuan engka berunding kati Iya amat ninga. Tang Bup Kudus bisi madahka, Iya “nyaut sampi.” (Masmur 65:2) Nyentukka nuan mega diasuh ‘nyerahka semua pengirau nuan ngagai Iya.’ Nama kebuah? ‘Laban Iya ngibun nuan.’​—1 Peter 5:7.

 Perundingka: Kala nuan ngiga awak berandau enggau kaban rapat nuan? Enti kala, nuan mega ulih ngereja nya enggau Petara Jehovah. Suah meh besampi ngagai Iya. Maya besampi, kena meh nama Iya, Jehovah. (Masmur 86:​5-7; 88:9) Bup Kudus mega meransang nuan “seruran besampi.”​—1 Tesalonika 5:​17.

 “Lebuh besampi, aku ulih berandau enggau Apai ba serega. Aku mansutka asai ati enggau runding aku ngagai Iya.”​—Moises.

 “Baka chara aku ke bejaku enggau apai indai sereta kaban rapat aku, baka nya meh chara aku bejaku enggau Jehovah.”​—Karen.

 Bup Kudus madahka, ‘Dalam semua utai, bantaika semua peminta kitai ngagai Jehovah.’​—Pilipi 4:6.

 Enti nuan bisi penanggul, kati ulih nuan besampi? Ulih! Bup Kudus madah, ‘Serahka penusah nuan ngagai Jehovah, lalu Iya deka nyaga nuan.’​—Masmur 55:22.

 Ukai semina penanggul aja ke patut dipadahka nuan dalam sampi. Seiku nembiak indu ke benama Chantella madah, “Aku enggau Jehovah enda ulih nyadi kaban rapat enti aku semina minta tulung ari Iya. Ba aku, sampi terima kasih ngagai Iya nya utai ti patut dikemeratka. Aku patut madahka semua utai ke diterima kasihka aku ngagai Iya.”

 Perundingka: Ba pengidup nuan, nama utai ti amat dikerinduka nuan? Seharitu, nama tiga iti pekara ke deka dipadahka nuan ngagai Jehovah kena ngayanka terima kasih?

 “Lebuh kitai meda bungai ti manah sereta ngerinduka ati pan kitai deka beterima kasih ngagai Jehovah.”​—Anita.

 “Nuan ulih berundingka nama utai ke idup ba dunya tu ti ngerinduka ati nuan tauka bisi ayat Bup Kudus ke negu ati nuan. Udah nya, nuan ulih beterima kasihka utai tu ngagai Jehovah.”​—Brian.