“Tang lebuh nuan nyendiaka pengerami makai besai, ambi ngabang orang ke seranta, ke kait-kupit, ke lemi, enggau ke buta. Nya baru nuan deka bulih berekat, laban sida enda ulih malas pemanah nuan.”—Luke 14:13, 14.
Bala nembiak ke rindu nulung
Bisi mayuh bala nembiak ke rindu nulung! Peda beberapa iti chunto.
“Kekadang aku semina deka belelak aja lalu meda TV. Tang aku ingatka apai indai aku ke agi kereja, tentu sida berasai lelak maya pulai kereja. Nya alai, aku nuchi pinggai enggau meresi rumah. Aku mega ngaga kupi laban apai indai aku rindu ngirup kupi. Maya indai pulai, iya madah, ‘Wah, beresi amat! Bau rengut mega. Terima kasih Endu!’ Gaga amat ulih nulung apai indai aku baka nya.”—Casey.
“Apai indai selalu nyukung sereta meri utai ke diguna aku. Nya alai, bisi sekali kerita seduai iya balat jai taun nyin tadi. Aku meri sida duit tabung aku taja pan kos nya besai amat. Keterubah sida nulak, tang aku tetap deka meri. Apai indai aku endang patut nerima semua nya, indah lebih ari nya. Gaga amat ulih meri sida utai ke mimit.”—Holly.
Nemu nuan? Mayuh bala nembiak Saksi-Saksi Jehovah berasai gaga laban nulung orang bukai belajarka Bup Kudus. Nyentukka bisi entara sida sanggup pindah ngagai menua bukai ke begunaka mayuh agi bantu ngajar orang Bup Kudus.
“Aku pindah ari Amerika Serikat ngagai Mexico ketegal deka ngajar Bup Kudus. Kekadang tusah deka meri tulung ba belanja tauka utai laban aku empu pan enda mayuh utai ke ulih diberi. Tang, aku ulih meri awak sereta pengering dikena aku ba pengawa nginjil. Nya jauh berega agi ari utai tauka duit.”—Evan.
Baka ni aku ulih nulung orang bukai?
Kati nuan deka ngasaika pengaga ati ari nulung orang bukai? Peratika sekeda utai ke ulih dikereja nuan.
Tulung meh diri sebilik:
Meresi rumah, nuchi pinggai, tauka meresi bilik tinduk enggau enda diasuh
Berapi
Nulis kad terima kasih ngagai apai indai
Nulung menyadi biak nuan ngaga kereja sekula iya
Nulung orang bukai kelimpah ari diri sebilik nuan:
Nganjung kad ngagai orang ke benung sakit
Meresi rumah orang ke diau semak nuan ti udah tuai
Ngabas orang ke enda ulih pansut ari rumah ketegal sakit tauka udah tuai
Meri hadiah ngagai orang ke benung tusah ati
Chara: Uji perundingka utai bukai ti ulih dikereja nuan. Udah nya, uji tulung seseiku orang ba minggu tu. Nuan engka enda nyangka, nya amat ngerinduka ati!
“Pengudah nulung orang bukai, kitai berasai lantang. Puas ati laban ulih nulung sida, lalu kitai pan ulih ngasaika sida amat beterima kasih. Lebuh benung nulung sida, kitai berasai rindu amat ati, taja pan keterubah iya kitai enda kala nyangka nya ngerinduka ati baka nya. Nyau penudi, kitai enda ngasaika diri bisi meri nama-nama laban kitai empu ke nerima mayuh penguntung.”—Alana.
Nuan deka bulih pengidup ti bisi penguntung? Dingaka seraya Cameron nyeritaka baka ni iya bulih pengidup ti ngemuaska ati ba endur ti enda dijangka iya.
