Kemayaritu, ngereja utai enggau lurus nya ngerugika. Bisi orang madah:

•   “Enti aku enda ngemulaka apai indai, aku tentu kena ukum.”

•   “Enti aku enda ngupi, aku tentu pil.”

•   “Enti aku enda ngenchuri, aku tentu nadai duit.”

 Bisi mega madahka, “Nama penyalah iya deh? Ni bisi orang lurus ba semua utai.”

 Saut iya, bisi. Mayuh orang—nyengkaum bala nembiak—pechaya, enti lurus maya ngereja utai ulih mai penguntung. Bup Kudus madah, “Kita deka ngetau utai ti ditanam kita empu.” (Galatia 6:7) Reti iya, tiap iti utai ke dikereja kitai tentu bisi asil iya empu.

 Perundingka sekeda penusah ke ulih nyadi ketegal bula.

  “Aku ngemulaka indai pasal kaul aku enggau seiku lelaki. Iya bisi bukti ti terang pasal pemula aku. Ketegal aku udah tiga kali bula, indai berasai asa amat ati. Aku enda dikemendarka pansut ari rumah pengelama dua minggu. Lalu aku mega enda dikemendarka ngena handphone tauka meda TV pengelama sebulan. Enggai agi aku bulaka apai indai!”—Anita.

 Perundingka: Nama kebuah Anita begunaka awak, ngambika apai indai iya ulih pechayaka iya baru?

 Bup Kudus madahka: ‘Badu agi bula! Awakka semua kitai nyebut utai ti bendar ngagai pangan diri’—Epesus 4:25

  “Aku bulaka apai indai, lalu aku ngumbai diri ulih lepas.Tang udah nya sida ngasuh aku nyeritaka baru, tang aku enda ingatka semua utai ke udah disebut aku sebedau tu, laban nya enda sama enggau utai ke amat nyadi. Enti nuan enda bula berengkah ari pun, nuan tentu enda napi utai tu.”—Anthony.

 Perundingka: Baka ni Anthony ulih nyeliahka diri ari pekara ti ngemaluka iya tu?

 Bup Kudus madah: ‘Jehovah begedika orang ke bula, tang Iya gaga ati ke orang ke ngamatka semaya diri.’—Jaku Dalam 12:22.

  “Aku bisi seiku kaban ke rindu amat nambahka sesiti cherita. Iya ngemesaika cherita nya enggau bula. Iya endang kaban aku, lalu aku deka pechayaka cherita iya. Tang, tusah amat deka arapka iya.”—Yvonne.

 Perundingka: Baka ni ulah kaban Yvonne nya ulih ngenyaika nama iya empu ketegal ngemesaika cherita enggau bula?

 Bup Kudus madah: ‘Kami deka ngereja utai ti badas berari.’—Hebrew 13:18.

 Perundingka sekeda penguntung ke diulih ketegal lurus maya ngereja utai.

  “Lumpit seiku indu ke bejalai ba mua aku labuh. Aku madahka iya lalu nyuahka lumpit nya. Iya amat beterima kasih. Iya madah, ‘Manah amat ati nuan. Tusah deka tetemuka orang baka nuan kemayaharitu.’ Enti bisi orang meda pemanah ke digaga nuan, nya amat ngagaka ati!”—Vivian.

 Perundingka: Nama kebuah indu nya tekenyit meda pemanah Vivian? Nama penguntung ke diterima Vivian?

 Bup Kudus madah: “Beberekat meh . . . ke seruran ngereja utai ti ngena.”—Masmur 106:3.

  “Kami sebilik nyadi tukang peresi. Maya nuchi opis, kekadang kami tetemuka duit siling ba lantai. Kami ngengkahka duit nya ba mija ke semak. Seiku pekereja opis dia tekenyit meda kami. Iya madah, ‘Tu semina duit siling aja?’ Tang iya amat arapka kami.”—Julia.

 Perundingka: Baka ni pengelurus Julia maya iya ngereja utai, nulung iya bulih nama ti manah enti iya deka ngiga kereja bukai?

 Bup Kudus madah: ‘Enggau naka ulih serahka diri empu ngagai Petara, laban Iya udah ngemendarka nuan, ke enda malu ke pengawa diri.’—2 Timoti 2:15.

  “Aku nerima gaji ke patut pengelama 80 jam. Tang aku semina kereja 64 jam aja. Endang gaga nerima gaji ti mayuh, tang aku enda sanggup nyimpan duit nya. Aku madahka pengurus akaun pasal utai nya, lalu iya amat beterima kasih. Taja pan aku kereja ba kompeni ti besai, tang ba aku, nyimpan duit nya baka ke ngenchuri.”—Bethany.

 Perundingka: Kati ngenchuri ari kompeni ti besai nya baik agi ari ke ngenchuri ari orang bukai?

 Bup Kudus madah: ‘Jehovah begedika orang ke ngereja penyai, tang Iya ngaga orang ke lurus nyadika pangan Iya.’—Jaku Dalam 3:32.