Kati apai indai ngemendarka nuan ngena media sosial? Enti au, artikel tu deka nulung nuan dalam tiga iti begian ti penting ba pengidup nuan.

Ba artikel tu

•  Nama kesan media sosial ngagai awak aku?

•  Nama kesan media sosial ngagai jam tinduk aku?

•  Nama kesan media sosial ngagai emosi aku?

•  Nama ku nembiak serambau nuan

 Ngena media sosial baka ke nepan kuda ti amat betenaga—enti nuan enda nguasa iya, iya deka nguasa nuan.

 “Maya berengkah meda media sosial, aku semina berunding deka meda nya dalam beberapa minit aja. Tang enda berasai, aku udah ngena bejam-jam awak dia. Media sosial ulih ngasuh gian sereta masau mayuh jam.”—Joanna.

 Kati nuan nemu? Media sosial ulih ngasuh gian laban nya meh chara iya digaga. Orang ke ngaga laman web tu nemu, enti laman web tu tebilang sereta mayuh orang ngena iya, kompeni sanggup mayar mar kena ngelakuka produk sida.

 Tanya diri empu: ‘Kati aku udah ngena mayuh jam lebih ari ke dijangka aku ba media sosial?’ ‘Ulih aku ngena sekeda ari jam nya ngereja utai ti beguna agi?’

 Utai ke ulih digaga nuan. Tetapka dulu penyampau jam ke deka dikena nuan ba media sosial, lalu anang meh ngelanggar utai ke udah ditetapka nuan.

 “Aku netapka jam dalam talipun, ngambika aku ulih ngena sekeda aplikasi dalam sesiti awak aja. Aku ngereja tu dalam siti timpuh, lalu nya ngelatih aku ngena media sosial enggau seimbang. Nyadi aku enda masau mayuh jam.”—Tina.

 Prinsip Bup Kudus: “Kena meh awak kita enggau manah.”—Epesus 5:16.

 Mayuh pakar madah, bala nembiak begunaka abis nadai lapan jam alai sida tinduk ninting malam, tang mayuh ari sida tinduk kurang ari lapan jam. Siti ari kebuah tu, bala nembiak ngena media sosial maya sida patut tinduk.

 “Sebedau aku tinduk aku meda talipun, lalu ngujungka aku masau mayuh jam meda gambar ke dipost orang ba media sosial. Nya siti tebiat ke enda manah ti deka diketuka aku.”—Maria.

 Kati nuan nemu? Enti kitai enda chukup tinduk, kitai senang deka bulih penyakit balat irau tauka kemurungan. Nitihka profesor psikologi Jean Twenge, siti ari kebuah ti pemadu besai orang ulih berasai enda gerai sereta enda gaga ati, laban sida enda chukup tinduk. Iya mega madahka, enti nuan udah lama enda chukup tinduk, nuan tusah deka berunding enggau manah sereta tusah berasai gaga. a

 Tanya diri empu: ‘Berapa penyampau jam aku tinduk ninting malam?’ ‘Kati aku ngena mayuh jam ba media sosial maya aku patut relax sereta nyediaka diri tinduk?’

 Utai ke ulih digaga nuan. Uji anang mai perengka elektronik nuan semak alai nuan tinduk. Enggau naka ulih, ngetu meda skrin talipun dua jam sebedau nuan tinduk. Enti nuan begunaka alarm ngambika ngerak nuan pagi, uji meh ngena utai bukai kelimpah ari talipun tauka tablet.

 “Kekadang, aku meda talipun aku nyentukka jauh malam. Tang aku nguji ngubah tebiat tu. Aku patut lebih matang, reti iya aku patut nemu agi berunding sereta betanggungjawap. Matlamat aku, aku patut tinduk tumu ngambika aku chukup belelak, lalu ulih ngereja semua utai ke patut dikereja aku ba hari siti.”—Jeremy.

 Prinsip Bup Kudus: “Nemu ni bagi utai ke beguna agi.”—Pilipi 1:10.

 Nitihka siti pansik, nyauka setengah ari nembiak indu ba sekula menengah madahka, sida “selalu berasai tusah ati tauka nadai harapan.” Media sosial engka ulih nyadi sebagi ari penanggul tu. Dr. Leonard Sax madah, “Mayuh agi jam ke dikena nuan ba media sosial, mandingka diri enggau bukai, senang agi nuan deka bulih penyakit kemurungan.” b

 “Mandingka diri enggau orang bukai utai ti biasa ba sida ke nembiak, lalu media sosial ngasuh pekara tu teruk agi. Nuan ulih meda gambar ke dipost orang bukai bejam-jam lalu mandingka pengidup diri enggau sida. Tauka, nuan mega ulih meda utai ti ngerinduka ati ke digaga bala kaban nuan, lalu nuan ngasaika sida lebih enjoy ari nuan.”—Phoebe.

 Kati nuan nemu? Taja pan media sosial ulih ngetanka kaul nuan enggau bala kaban, tang nya enda semanah ari nuan ulih betunga mua lalu berandau enggau sida. Dr. Nicholas Kardaras nulis, “Lebuh kitai berandau enggau orang bukai nengah perengka elektronik, nya enda ulih ngasuh kitai gaga agi ati ari ke berandau betunga mua. Nya enda ulih ngemuaska ati kitai, laban mensia sigi patut begulai enggau pangan diri.” c

 Tanya diri empu: ‘Kati aku berasai puang pengudah meda pengawa bala kaban aku?’ ‘Kati aku ngasaika pengidup aku boring maya aku mandingka pengidup sida enggau aku ari utai ke dipost sida ba media sosial?’ ‘Kati aku berasai asa ati lebuh utai ke dipost aku mimit aja dipeda orang tauka nadai orang “likes”?’

 Utai ke ulih digaga nuan. Uji meh ngetu ngena media sosial dalam beberapa hari, dalam seminggu, tauka dalam sebulan. Kena mayuh agi awak nuan begulai enggau bala kaban betunga mua tauka nengah talipun. Nuan engka ngasaika nuan kurang agi stress sereta nyadi gaga ati pengudah nuan ngetu ari media sosial.

 “Maya aku ngena media sosial, aku ngasaika diri kelalu berundingka utai ke digaga orang bukai. Pengudah aku nutup akaun media sosial, aku asaika lepas ari ma ti berat. Udah nya, aku ngasaika diri mayuh agi awak ngereja utai ti beguna.”—Briana.

 Prinsip Bup Kudus: “Tiap iku orang patut meresa pengawa diri, lalu iya deka gaga ati ketegal pengawa iya empu, ukai ketegal mandingka diri enggau orang bukai.”—Galatia 6:4.