Iya duduk atas tanah, tubuh iya penuh enggau pisa tauka rumbak. Gambarka tu, iya ngendukka pala lalu mungkukka bau, indah nadai pengering deka muru lalat ke datai nutu iya. Iya duduk ba endur ke bisi abus lalu semina ulih ngena kerimpak periuk kena ngikis tubuh diri. Suba iya dipebasa, tang diatu orang begedika iya! Bala bakih, orang ke diau berimbai enggau iya, kaban belayan, semua udah ninggalka iya. Mayuh orang, indah anak mit pan, ngeleseka iya. Iya berunding, engka Petara Jehovah mega udah ninggalka iya, tang tu runding ti salah.—Jop 2:8; 19:18, 22.

 Lelaki tu benama Jop. Petara madahka: “Nadai orang di dunya ke badas sereta lurus baka iya.” (Jop 1:8) Beratus taun udah nya, Jehovah agi ngumbai Jop nya seiku ari nembiak Iya menya ke pemadu lurus ti kala idup.—Esekiel 14:14, 20.

 Kati nuan bisi ditinggang penusah tauka penguji? Cherita Jop ulih ngelantangka nuan. Cherita tu mega ulih nulung nuan mereti agi pasal siti pemanah ti amat beguna ba nembiak Petara—taluk. Mensia ngayanka penaluk ngagai Petara lebuh sida enggau pengabis ati ngereja peneka Iya taja pan napi penusah. Aram kitai belajar ari cherita Jop.

 Bisi bukti ke nunjukka lelaki ti tetap ati, Moses, nuliska cherita pengidup Jop pengudah Jop nadai. Ketegal bisi roh kudus Jehovah, Moses ukai semina ulih nulis semua utai ke nyadi ba Jop di dunya tu, tang mega sekeda utai ke nyadi ba serega.

 Ba pun cherita pengidup Jop, kitai macha pasal iya ke benung idup enggau ati ti puas sereta lantang. Jop lelaki ti kaya, dikelala mayuh orang sereta dipebasa ba menua Us—engka ba utara menua Arab. Iya amat gerah jari enggau sida ke bisi penyuntuk lalu iya mega nyaga sida ke enda ulih ngintu diri. Jop enggau bini iya ngembuan sepuluh iku anak. Tang utai ke berat agi ba Jop nya, kaul iya enggau Jehovah. Jop seruran nguji ngelantangka ati Jehovah baka ke digaga kaban belayan iya Abraham, Isak, Jakop sereta Josep. Baka sida tu, Jop mega seruran ngarika sida sebilik meri piring tunu ngagai Jehovah. Tu mega nyengkaum piring tunu kena ngarika bala anak iya.—Jop 1:1-5; 31:16-22.

 Tang enda memukai, cherita pasal pengidup Jop betukar ngagai utai ke nyadi ba serega. Kitai macha pasal utai ke nyadi ba serega lalu nemu sekeda utai ke enda ditemu Jop. Bala melikat Jehovah ti tetap ati begelumu ba mua Iya lalu Sitan pan datai. Jehovah nemu Sitan begedika Jop ke lurus. Nya alai Petara bejaku ngagai Sitan lalu madahka pasal penaluk Jop ti chukup manah. Sitan nyaut: “Kati Jop deka nyembah Nuan enti iya nadai bulih utai ari nya? Ukai enda Nuan ke seruran nyaga iya, nyaga ruang bilik enggau semua utai ti diempu iya?” Sitan begedika orang ti taluk. Lebuh sida enggau pengabis ati nyembah Petara Jehovah, tu nunjukka Sitan nya orang ti mungkirka semaya lalu enda rinduka orang bukai. Sitan madahka, Jop semina nyembah Jehovah enti iya tau bulih penguntung ari nya. Sitan mega madahka, enti sema Jop lenyauka semua utai ti dikemisi iya, Jop deka nyumpah Jehovah mua mata.—Jop 1:6-11.

 Jop enda nemu pasal tu, tang Jehovah meri iya siti peluang ti besai, iya nya, nunjukka Sitan nya salah. Sitan dikemendarka ngerumpak semua utai ke dikemisi Jop. Tang iya enda tau ngemediska Jop. Nya alai, Sitan berengkah ngereja pengawa iya ti jai. Dalam sehari, penusah betangkan-tangkan datai ninggang Jop. Semua jelu tupi iya—keterubah sapi enggau keledai, udah nya, bedus, lalu jelu unta—dibunuh magang. Lalu ke balat agi, semua ulun iya ke ngibun jelu tupi nya dibunuh mega. Seiku orang ke mai berita ngagai Jop madahka, bedus enggau ulun iya dibunuh Petara laban sida “dipangkaka ngitar.” Sebedau Jop ulih meretika kebuah semua penusah tu nyadi betangkan-tangkan, ke nyengkaum ulun iya ti udah nadai sereta reta iya ti udah dirumpak, Jop nerima siti agi berita ti chukup ngemediska ati. Sepuluh iku anak iya benung begelumu ba rumah anak iya ti pemadu tuai. Lalu lebuh nya, kabut ti besai datai lalu ngenyit mangka enggau numbangka rumah nya. Semua bala anak Jop mati magang!—Jop 1:12-19.

 Sigi tusah deka ngambarka pemedis ti diasaika Jop. Iya nyarikka gari diri, ngukur pala iya, lalu nyungkurka diri ke tanah. Jop madahka, Jehovah udah meri semua utai ngagai iya, nya alai Jehovah mega ulih ngambi semua utai nya baru. Kebendar iya, Sitan chukup pintar ngereja utai enggau chara ti ngasuh orang ngumbai Petara meh ke ngasuh semua penusah nya nyadi. Taja pia, Jop enda nyumpah Petara baka ke dijangka Sitan. Tang, Jop madahka: ‘Pujika nama Jehovah.’—Jop 1:20-22.

 Sitan balat ringat, tang iya enggai ngalahka diri. Sekali agi iya datai ngagai Jehovah lebuh bala melikat benung begelumu. Lalu, sekali agi Jehovah muji Jop ketegal mengkang taluk taja pan diperinsa Sitan. Ku Sitan nyaut baru: “Mensia deka ngelengkaka semua utai, asal nyawa iya idup. Tang enti nuan ngemediska iya, lalu negu tulang enggau isi iya, iya tentu deka nyumpah Nuan mua mata!” Sitan ngumbai enti Jop balat sakit, iya tentu deka nyumpah Petara. Jehovah amat andal Jop deka mengkang taluk, lalu ngemendarka Sitan ngasuh Jop sakit, asal Sitan enda munuh Jop.—Jop 2:1-6.

 Tu ngunjungka Jop napi pemedis ba pengerai baka ke dipadah ba genteran keterubah. Gambarka pengasai ati bini Jop. Bini iya udah balat pedis ketegal sepuluh iku anak iya udah nadai. Lalu diatu, iya semina ulih meda laki iya empu napi penyakit nya, tang enda ulih ngaga nama-nama kena ngeraika iya. Ketegal balat pedis, bini iya madahka: ‘Kati nuan agi mengkang tetap ati? Nama kebuah nuan enda nyumpah Petara, lalu mati?’ Tu ukai utai ti biasa disebut bini iya lalu Jop ngumbai bini iya bejaku baka orang ti beli. Taja pia, Jop enda nyumpah Petara. Iya enda mansutka jaku ti bedosa.—Jop 2:7-10.

 Kati nemu nuan? Cherita tu mega bisi kaul enggau pengidup nuan empu. Peratika jaku Sitan ngagai Jop. Utai ke dituduh nya ukai semina ngagai Jop aja tang ngagai semua mensia. Ku Sitan madahka: “Mensia deka ngelengkaka semua utai, asal nyawa iya idup.” Reti nya, Sitan ngumbai nadai siku ari mensia deka mengkang taluk ngagai Jehovah! Iya madahka, nuan nadai pengerindu ti bendar ngagai Jehovah lalu nuan deka enggau jampat ngelangkaka Jehovah kena nyelamatka diri empu. Tu baka Sitan benung ngumbai, nuan nya sama enggau iya! Kati nuan deka nunjukka Sitan nya salah? Semua kitai ngembuan peluang tu. (Jaku Dalam 27:11) Aram kitai beratika penanggul bukai ke ditapi Jop.

 Tiga iku lelaki ke ngelala Jop—Bup Kudus madahka sida tu pangan iya—dinga pasal penusah ke ninggang iya. Sida datai ngusung Jop lalu nguji ngelantangka ati iya. Lebuh sida meda Jop ari jauh, sida enda ulih ngelala iya. Jop balat pedis, kulit iya chelum ketegal penyakit nya, lalu gaya mua iya enda baka ke suba agi. Sida betiga nya—Elipas, Bildat enggau Sopar—nunjukka diri baka ke tusah ati ketegal utai ke nyadi ba Jop, bekeduie nyabak lalu ngerabuka amau ngagai pala sida. Udah nya, sida lalu duduk enggau iya tujuh hari tujuh malam, nadai bejaku seleka. Tang anang ngumbai pengawa sida ke enda bemunyi nya chara sida ngelantangka Jop, laban sida enda nguji betanya ngagai Jop. Utai ke ditemu sida semina pasal Jop ke amat balat pedis, tang tu endang ulih ditemu sapa-sapa pan enti sema sida bisi meda Jop.—Jop 2:11-13; 30:30.

 Pengujung iya, Jop meh ke berengkah berandau enggau sida. Jop amat pedis nyentukka iya nyumpah hari iya ada. Lalu, iya mega madahka siti ari kebuah ke ngasuh iya balat pedis ati. Iya ngumbai Petara nya pun semua penusah iya! (Jop 3:1, 2, 23) Jop ukai nadai pengarap ngagai Petara tang iya amat begunaka pengelantang. Tang lebuh bala pangan iya berengkah bejaku, Jop nyau nemu, manah agi enti sida enda bemunyi.—Jop 13:5.

 Elipas, engka ke pemadu tuai ari sida betiga lalu tuai mega ari Jop, berengkah bejaku. Udah nya, dua iku ke bukai mega bejaku. Kitai engka ulih ngumbai seduai ke bejaku sepengudah Elipas nya baka ke beli laban seduai semina nitihka jaku Elipas. Sekeda ari utai ke dipadah sida nya baka ke nadai ngachau, laban sida nyebut utai ke suah dipadah orang pasal Petara lalu baka ke betul. Ambika chunto, sida ngumbai Petara nya tuchi, ngukum orang ke jai lalu merekatka sida ti manah. Tang ari pun jaku sida, kitai ulih meda, ke amat iya jaku sida ngagai Jop enda tentu manah. Chara Elipas berunding engka betul tang iya enda beratika sekeda utai ti berat. Iya ngumbai, enti sema Jehovah nya manah lalu ngukum orang ke jai aja, reti nya Jop sigi bisi ngereja utai ti jai.—Jop 4:1, 7, 8; 5:3-6.

 Kitai enda tekenyit lebuh Jop enda nerima lalu enggau keran nulak runding ke baka nya. (Jop 6:25) Ketegal nya, tiga iku pangan Jop amat pechaya iya bisi ngereja penyalah lalu iya benung nguji ngelalaika nya; semua utai ti ninggang iya endang patut. Elipas nuduh Jop nya ngumbai diri pama agi ari orang bukai, jai sereta enda nangika Petara. (Jop 15:4, 7-9, 20-24; 22:6-11) Sopar ngasuh Jop muai penyai diri lalu badu agi rindu ke pengawa ti bedosa. (Jop 11:2, 3, 14; 20:5, 12, 13) Lalu Bildat madahka utai ti chukup ngemedis. Iya madahka, bala anak Jop engka bisi ngereja dosa, nya kebuah chara sida mati endang patut!—Jop 8:4, 13.

 Sida betiga nya ngereja utai ti balat agi. Sida ukai semina ngumbai Jop nya enda taluk ngagai Petara, tang sida mega ngumbai nadai guna enti iya nguji taluk ngagai Petara! Ba pun jaku iya, Elipas madahka diri bisi betemu enggau roh ke enda ulih dipeda. Pengudah betemu enggau antu nya, Elipas ngumbai Petara “enda arapka bala nembiak Iya ke di serega. Indah bala melikat Iya deh dikumbai Iya bisi penyalah.” Enti sema jaku nya amat, reti nya nadai seiku mensia pan ulih ngagaka tauka ngelantangka ati Petara! Runding sereta jaku ke baka tu amat jai, laban enti sema orang pechayaka nya, tu deka ngerusakka pengarap sida ngagai Petara! Udah nya, Bildat madahka Petara enda kiruhka penaluk Jop, baka Iya ke enda kiruhka ulat ti taluk!—Jop 4:12-18; 15:15; 22:2, 3; 25:4-6.

 Kati nuan kala nguji ngelantangka orang ke balat napi penusah? Endang enda senang. Tang kitai ulih belajarka mayuh utai ari tiga iku pangan Jop ti enda manah nya—mayuh ari nya pasal utai ke enda patut disebut. Utai ke dipadah sida betiga nya baka ke pintar sereta betul tang sida enda ngayanka penyinu ngagai Jop. Sida indah enda ngangau Jop ngena nama iya empu! Sida enda ibuhka Jop ke balat tusah ati lalu sida berunding enda ibuh manah ulah enggau Jop. a Nya alai, enti orang ke dikeibuhka nuan nya tusah ati, nguji meh ngayanka penyinu sereta penyiru ngagai sida. Uji nulung iya negapka agi pengarap iya lalu meransang iya arapka Petara sereta pechaya, Petara nya siru, pengasih sereta lurus. Tu meh utai ke deka digaga Jop enti sema pangan iya napi pemerinsa lalu iya ke patut ngelantangka sida. (Jop 16:4, 5) Tang, baka ni pengasai Jop ngagai jaku sida ke ngeleseka penaluk iya?

 Sinu amat, Jop benung napi pemerinsa lebuh bala pangan iya datai bekelikuh enggau iya. Kenyau ari pun, Jop ngaku diri bisi nyebut utai enggau enda berunding tauka “bejaku ngapa.” (Jop 6:3, 26) Kitai ulih meretika kebuah nya. Iya bejaku munyi nya laban ati iya balat pedis. Utai ke dipadah iya mega nunjukka iya enda tentu meretika kebuah semua utai nya nyadi. Laban penusah ke ninggang iya ngenyit datai lalu nyadi enggau chara ke enda ulih diterangka, Jop ngumbai Jehovah ke ngasuh penusah nya nyadi. Bisi pekara ti berat agi ke enda ditemu Jop. Nya alai iya berunding bepelasarka penemu ti enda betul.

 Taja pia, Jop seiku lelaki ti bisi pengarap ti teguh. Pengarap iya enggau terang ulih dipeda ari utai ke disebut iya lebuh berandau enggau bala pangan iya—jaku ti betul, manah, sereta meransang semua kitai kemayaharitu. Lebuh iya bejaku pasal utai ke ditempa Petara, iya madahka utai ke enda ulih ditemu mensia enti sema Petara enda nunjukka ngagai iya. Ambika chunto, iya madahka Jehovah “ngitang dunya ba langit ti puang,” lalu tu enda ditemu bala saintis nyentuk ke beratus taun udah nya. b (Jop 26:7) Lalu, Jop bejaku pasal pengadang iya ke jemah ila, sama baka pengadang ke dikembuan semua nembiak Petara ti tetap ati. Jop pechaya, enti iya mati, Petara deka ingatka iya, lelengauka iya, lalu deka ngangkatka iya idup baru.—Jop 14:13-15; Hebrew 11:17-19, 35.

 Baka ni enggau isu ke bekaul enggau penaluk? Elipas enggau dua iku kaban iya madahka, penaluk seiku mensia nadai reti ba Petara. Kati Jop semina nerima aja runding ti jai nya? Enda! Jop madahka penaluk nya amat besai reti ba Petara. Iya enggau andal madahka Jehovah bisi beratika penaluk iya. (Jop 31:6) Nambahka nya, Jop ulih meda, runding salah ke dipadah bala pangan iya semina deka ngasuh iya enda taluk ngagai Jehovah. Lalu, tu meransang Jop ngaga jaku iya ti pemadu panjai, lalu jaku nya chukup manah nyentukka tiga iku lelaki nya nadai ulih nyaut.

 Jop nemu penaluk iya nyengkaum semua utai ke digaga iya ninting hari. Nya alai, iya nerangka chara iya ngetanka penaluk iya ba semua pengawa ke digaga iya. Ambika chunto, iya nyeliahka diri ari nyembah engkeramba; iya ngayanka penyiru sereta bebasaka orang bukai; ulah iya tuchi, lalu iya ngetanka tikah iya; sereta ke pemadu berat, iya mengkang taluk ngagai Petara ti bendar, Jehovah. Nya kebuah Jop ulih madahka enggau pengabis ati iya: “Aku deka majak [‘taluk,’ NW] nyentuk ngagai maya aku mati.”—Jop 27:5; 31:1, 2, 9-11, 16-18, 26-28.

 Kati runding nuan pasal penaluk sebaka enggau Jop? Jop nemu, enda chukup enti kitai semina madahka diri taluk. Kitai mega patut ngayanka penaluk nengah ulah kitai. Kitai ngayanka diri taluk sereta nyembah Petara enggau pengabis ati lebuh kitai ngasika pesan Iya lalu ngereja utai ti ngena ba pengidup ninting hari—taja pan napi penanggul. Enti pia, kitai tentu deka ngelantangka ati Jehovah lalu ngasuh munsuh Iya Sitan ringat, baka ke udah digaga Jop suba. Tu meh chara ti pemadu manah kitai ulih neladan pengarap Jop!

 Tang, tu ukai pengujung cherita pasal Jop. Iya enda ingatka utai ti beguna bendar lalu iya kelalu beberatka pengawa ngetanka pengelurus diri ari ke ngetanka nama Petara ti kudus. Iya begunaka tulung sereta lalau ke ulih nulung iya berunding baka Petara. Iya agi napi pemedis ba ati lalu begunaka pengelantang ti bendar. Nama deka digaga Jehovah ngagai nembiak Iya tu ke tetap ati sereta taluk? Siti agi artikel ba siri tu deka nyaut tanya nya.