Saut ari Bup Kudus

 Daniel nya siku nabi orang Judah ti tetap ati ke idup ba abad ketujuh enggau keenam Sebedau Masihi. Petara meri Daniel penau kena nerangka reti mimpi, madahka iya utai ke deka nyadi dudi hari, sereta meri iya kuasa kudus ngambika iya ulih nulis siti ari bup mit ba Bup Kudus, iya nya bup Daniel.—Daniel 1:17; 2:19.

Sapa Daniel?

 Daniel besai ba Judah, iya nya siti perintah ke nyengkaum kuta Jerusalem sereta Rumah Sembiang Petara. Kena 617 Sebedau Masihi, Raja Nebukadnesar ari Babilon nyerang Jerusalem enggau mai “orang ke tinggi pangkat” nyadi orang tangkap ngagai Babilon. (2 Raja 24:15; Daniel 1:1) Daniel mega dibai enggau sida. Ba maya tu, engka Daniel agi nembiak.

 Daniel enggau beberapa iku nembiak ke bukai (nyengkaum Sadrak, Mesak, enggau Abednego) dibai ngagai istana Babilon, ngambika dilatih lalu ulih gawa ke raja. Daniel enggau tiga iku kaban iya mengkang tetap ati ngagai Petara sida, Jehovah, taja pan enda senang alai sida deka mengkang tetap ati. (Daniel 1:3-8) Pengudah dilatih tiga taun, Raja Nebukadnesar muji pemandai sereta pengelandik sida. Nyentukka raja nya ngaku, sida “sepuluh kali pandai agi ari semua orang ke tau keramat, tauka orang ke nyadi lemambang ke di menua ti dipegai iya.” Ketegal tu, Daniel sereta bala kaban iya dipilih gawa ke raja.—Daniel 1:18-20.

 Bepuluh taun udah nya, maya Daniel beumur 90-an, iya dikangauka ngagai istana. Raja Belsasar, ke merintah Babilon maya nya, minta Daniel madahka reti utai ke ditulis ba dinding istana. Jehovah nulung Daniel faham reti tulisan nya, lalu Daniel pan madahka Babilon deka dialahka Perintah Media Persia. Lalu utai tu amat nyadi ba malam nya mega!—Daniel 5:1, 13-31.

 Maya Babilon dipegai Media Persia, Daniel dipilih nyadi siku pegawai tinggi, tang Raja Darius deka meri iya pangkat ti tinggi agi. (Daniel 6:1-3) Bala pegawai ke bukai chemburuka Daniel. Sida pan bepakat deka munuh Daniel lalu muai iya ngagai lubang singa, tang Jehovah nyelamatka Daniel. (Daniel 6:4-23) Ba ujung pengidup iya, siku melikat ngayanka diri ngagai Daniel, lalu dua kali melikat nya madahka Daniel, iya amat berega ba mata Petara.—Daniel 10:11, 19.

 Peda meh cherita tu ba Drama Daniel—Arapka Petara Seumur Idup, begian 1 enggau 2.