Dosa ke enda ulih diampun reti iya, dosa ke dikereja enggau ulah ti ngasuh seseiku orang nya enda ulih nerima pengampun ari Petara. Baka ni ulah ke baka nya tau nyadi?

 Orang ke nesal ati, nitihka standard Petara, lalu ngasika Jesus Kristus ulih diampunka Petara. (Kereja Rasul 3:19, 20) Tang sayau, sekeda orang enggai berubah ari jalai ti salah nyentukka sida enggai ngubah ulah diri. Nitihka Bup Kudus, orang ke baka tu udah “ngembuan ati ti jai” sereta “ditipu dosa lalu nyadi kieh.” (Hebrew 3:12, 13) Sempama tanah liat ke udah ditunu, lalu enda ulih dikena ngaga nama-nama utai agi, baka nya meh ati orang ke udah kieh, lalu majak ngelaban Petara. (Isaiah 45:9) Orang ke baka tu nadai daya agi deka ditulung. Laban sida udah ngereja dosa ti enda ulih diampunka.—Hebrew 10:26, 27.

 Sekeda ari tuai pengarap orang Judah maya jeman Jesus ngereja dosa ti enda ulih diampunka. Sida nemu Jesus ngereja pengawa ajih ketegal bisi roh kudus Petara, tang sida madahka kuasa Jesus nya datai ari Antu Sitan.—Mark 3:22, 28-30.

Chunto dosa ke ulih diampunka

•  Ngenyaika nama Petara enggau enda sengaja. Rasul Paul kala bejaika nama Petara, tang udah nya iya madahka, “Tang aku udah bulih pengasih, laban lebuh maya nya suba aku nadai nemu utai, laban aku apin arap.”—1 Timoti 1:13.

•  Butang. Bup Kudus kala nyebut pasal sekeda orang ke butang. Tang, sida nesal ati lalu Petara ngampunka sida.—1 Korint 6:9-11.

“Kati aku udah ngereja dosa ke enda ulih diampunka?”

 Enti nuan endang amat udah nesal enggau penyalah ti suba, sereta deka berubah, nuan ulih diampunka. Indah Petara ngampunka dosa ke selalu dikereja, seagi ati nuan enda kieh lalu ngelaban Iya.—Isaiah 1:18.

 Sekeda orang ngasaika diri udah ngereja dosa ti enda ulih diampunka, laban ati ti besalah majak ngukum sida. Tang, Bup Kudus nangkan kitai anang kelalu pechayaka ati diri. (Jeremiah 17:9) Petara enda kala ngasuh kitai ngakim orang bukai, nyengkaum kitai empu. (Rome 14:4, 12) Iya ulih ngampunka kitai, indah maya ati agi ngukum kitai empu.—1 John 3:19, 20.

Kati dosa ke dikereja Judas Iskariot enda ulih diampunka?

 Au. Ketegal amu, iya sanggup ngenchuri duit ke patut dikena ba pengawa ti tuchi. Indah iya sanggup pepura ibuhka orang ti seranta, tang ba ati iya semina deka ngulihka mayuh agi duit. (John 12:4-8) Lebuh Judas kieh deka nitihka jalai ti salah, iya mega sanggup nyual Jesus ketegal deka ngulihka 30 singkap duit pirak. Jesus nemu Judas enda nesal ati, nya kebuah iya ngumbai Judas “siku ke endang diletak deka lenyau.” (John 17:12) Reti iya, lebuh Judas mati, iya nadai bulih peluang diangkatka idup baru.—Mark 14:21.

 Judas enda amat nesal ati enggau penyalah diri. Iya ngaku penyalah diri ukai ngagai Petara, tang ngagai tuai pengarap ke beaum enggau iya.—Matthew 27:3-5; 2 Korint 7:10.