Enti ngirup ai bisa enggau penumbas iya, nya ukai dosa. Dalam Bup Kudus bisi nyebut, wain nya siti pemeri ari Petara ke ulih ngelantangka ati mensia. (Masmur 104:14, 15; Pengajar 3:13; 9:7) Bup Kudus mega setuju, wain ulih meri penguntung ba pengerai.—1 Timoti 5:23.

 Jesus ngirup wain maya iya ba dunya. (Matthew 26:29; Luke 7:34) Iya mega kala nukar wain ba siti pengerami kawin, lalu pemeri ke gerah jari tu siti ari pengawa ajih Jesus ke tebilang.—John 2:1-10.

Penusah ketegal enda tetagangka diri ngirup ai bisa

 Taja pan Bup Kudus bisi nyebut pasal pemanah wain, Bup Kudus mega enda rinduka ulah ti mabuk sereta enda tetagangka diri ngirup ai bisa. Nya alai, orang Kristian ke deka ngirup ai bisa patut nemu nagang diri. (1 Timoti 3:8; Titus 2:2, 3) Bup Kudus bisi madahka beberapa iti kebuah kitai enda patut kelalu mayuh ngirup ai bisa.

•   Kitai enda ulih berunding sereta ngaga pemutus enggau manah. (Jaku Dalam 23:29-35) Orang ke mabuk, enda ulih nitihka prinsip Bup Kudus ke madah, ‘nyerahka tubuh kita nyadi pemeri ti idup, ti kudus, ti dikerinduka Petara. Nya meh jalai kita patut nyembah Iya.’—Rome 12:1.

•   Kelalu mayuh ngirup ai bisa ulih ngasuh seseiku orang nya enda tetagangka diri, lalu “ngasuh bala nembiak Aku enda nemu berunding!”—Hosia 4:11; Epesus 5:18.

•   Ulah tu ulih ngujungka penyeranta enggau penanggul ba pengerai.—Jaku Dalam 23:21, 31, 32.

•   Petara enda rinduka orang ke mabuk sereta ngirup mayuh ai bisa.—Jaku Dalam 23:20; Galatia 5:19-21.

Nama reti “kelalu mayuh ngirup ai bisa”?

 Orang ke kelalu mayuh ngirup ai bisa, ulih ngemediska diri empu tauka orang bukai pengudah sida ngirup ai bisa. Orang nya ulih dikumbai mabuk taja pan iya agi ngeleda. Nitihka Bup Kudus, tanda-tanda orang ke mabuk nya nyengkaum, enda ulih berunding enggau manah, pejalai iya enda lurus, senang belaya, tauka enda ulih mansutka leka jaku enggau terang. (Jop 12:25; Masmur 107:27; Jaku Dalam 23:29, 30, 33) Taja pan sida engka enda mabuk, tang “gian ngirup” deka ngujungka penusah nyadi.—Luke 21:34, 35.

Enda tau ngirup ai bisa sekali-kali

 Bup Kudus mega bisi nerang, orang Kristian patut nagang diri ngirup ai bisa enti:

•   Nya ulih ngasuh orang bukai enda nyamai ati.—Rome 14:21.

•   Nya ngelanggar undang-udang perintah ba menua nya.—Rome 13:1.

•   Nya ulih ngasuh iya enda tetagangka diri. Orang ke gian ngirup ai bisa tauka salah guna maya ngirup ai bisa, patut ngaga ubah enggau jampat.—Matthew 5:29, 30.