Au, Sitan amat bisi. Iya seiku melikat ti jai lalu ngelaban Petara. Iya meh “pemerintah dunya tu.” (John 14:30; Epesus 6:11, 12) Bup Kudus bisi madahka sekeda ulah Sitan ke setipak enggau nama kangau tu:

•   Sitan nya “Orang ke Nyakal.”—Jop 1:6.

•   Antu Sitan nya “Petenah.”—Pemandang 12:9.

•   Ular ke dikena ba Bup Kudus mai reti “Penipu.”—2 Korint 11:3.

•   Penguji.—Matthew 4:3.

•   Pemula.—John 8:44.

Ukai penyai ke bisi dalam mensia

 Sekeda orang ngumbai, Antu Sitan nya ulah ti jai ke bisi dalam kitai. Tang dalam Bup Kudus bisi nulis, randau entara Petara enggau Sitan. Petara nya sempurna. Nyadi, enda patut Iya bejaku enggau sebagi ari Iya empu ke jai. (Ulang Adat 32:4; Jop 2:1-6) Kelimpah ari nya, Sitan pan kala ngasut Jesus, taja pan Jesus nya enda bedosa. (Matthew 4:8-10; 1 John 3:5) Reti iya, Bup Kudus nunjukka Sitan nya endang amat bisi, ukai semina ulah ti jai.

 Kati kitai patut tekenyit enti mayuh orang enda pechayaka Sitan nya amat bisi? Enda. Laban dalam Bup Kudus endang udah nerangka, Sitan deka ngena seribu daya nesatka mayuh orang. (2 Tesalonika 2:9, 10) Siti ari panjuk iya nya, iya mampul runding mayuh orang pasal kati iya amat bisi tauka enda.—2 Korint 4:4.

  Mayuh orang nyangka: Lucifer nya nama Sitan.

 Iya ke amat: “Lucifer” ke disalin ari jaku Hebrew ba Bup Kudus mai reti “bintang pagi ti terang.” (Isaiah 14:12) Utai ke deka dipadahka ba ayat tu, nerangka pasal sesiti perintah tauka peturun raja ba Babilon, ti deka ngeleseka Petara ketegal penyumbung sida. (Isaiah 14:4, 13-20) Nyadi, jaku ke nyebut “bintang pagi ti terang” nya, jaku kelese ngagai perintah Babilon pengudah menua nya dirusak.

  Mayuh orang nyangka: Sitan dikena Petara nguji mensia.

 Iya ke amat: Sitan nya munsuh Petara, lalu iya enda nyembah Petara. Antu Sitan ngelaban sereta nabur petenah ngagai orang ke nyembah Petara.—1 Peter 5:8; Pemandang 12:10.