Bup Kudus bisi semaya: ‘Orang ke ngereja peneka Petara deka idup belama iya.’ (1 John 2:17) Nama kedeka Petara kereja nuan?

•   Belajar pasal Petara enggau anak Iya, Jesus. Lebuh Jesus besampi ngagai Petara, iya madahka, ‘Tu pengidup ti meruan belama iya, ngambika sida ngelala Nuan, Petara ti bendar enggau Jesus Kristus ke dikirumka Nuan.’ (John 17:3) Baka ni kitai ulih “ngelala” Petara enggau Jesus? Kitai ngelala seduai iya ari belajarka Bup Kudus lalu nitihka lalau iya dalam pengidup. a (Kereja Rasul 17:24, 25) Bup Kudus mega ngajar kitai pasal Anak Iya Jesus, ti mai “jaku ti meri pengidup ti meruan belama iya.”—John 6:67-69.

•   Andal meh ke tebus Jesus. Jesus datai ke dunya laban ‘iya deka mela lalu nyerahka diri kena nebus orang mayuh.’ (Matthew 20:28) Tebus Jesus muka jalai ngagai semua mensia idup belama iya ba dunya Paradais. b (Masmur 37:29) Jesus madahka: ‘Laban Petara balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya.’ (John 3:16) Kitai nunjukka diri ‘arapka iya’ enti kitai idup nitihka ajar Jesus lalu ngereja peneka Apai iya.—Matthew 7:21; James 2:17.

•   Ngembuan kaul ti rapat enggau Petara. Petara deka kitai semak sereta nyadi pangan Iya. (James 2:23; 4:8) Petara seruran bisi belama iya. Iya enda ulih mati, lalu Iya mega dekaka bala pangan Iya idup belama iya. Peneka Petara diterangka ngagai orang ke ngiga Iya munyi tu: “Awakka sida nyamai diau belama iya!”—Masmur 22:26.

 Runding ti salah: Pengidup ti belama iya nya ulih ngasuh leju.

 Iya ke amat: Pemeri pasal pengidup nya datai ari Petara ke rinduka kitai lalu dekaka kitai idup lantang. (James 1:17; 1 John 4:8) Iya nemu kitai tentu ulih gaga ati enti ngereja pengawa ke manah. (Pengajar 3:12) Petara besemaya orang ke idup belama iya ba dunya deka bulih pengawa ti manah sereta ngemuaska ati. Asil kereja sida ulih meri penguntung ngagai diri empu sereta orang ke dikesayauka sida.—Isaiah 65:22, 23.

 Kelimpah ari nya, orang ke idup belama iya deka terus belajarka utai ti baru pasal Penempa sida. Pia mega, sida deka belajarka mayuh pasal utai ke ditempa. (Pengajar 3:10, 11) Nya kebuah, orang ke idup belama iya ulih seruran belajar sereta ngereja utai ti manah.