Satu Korint 7:1-40
7 Bekaul enggau tanya ke ditulis kita, manah agi enti siku lelaki enda negu* siku indu.
2 Tang ketegal mayuh amat orang ngereja ulah seks ti kamah,* awakka tiap iku lelaki bisi bini kediri empu, lalu tiap iku indu bisi laki kediri empu.
3 Awakka laki meri utai ke diguna bini iya, lalu awakka bini mega meri utai ke diguna laki iya.
4 Bini nadai kuasa atas tubuh diri empu, tang laki iya ke bisi kuasa atas tubuh iya. Pia mega, laki nadai kuasa atas tubuh diri empu, tang bini iya ke bisi kuasa atas tubuh iya.
5 Laki bini, anang enda meri utai ke diguna pangan diri. Semadi meh seduai udah besetuju enda ngereja nya ba sesiti timpuh laban deka ngena timpuh nya besampi. Pengudah nya, seduai patut begulai baru ngambika seduai enda terus diuji Sitan ketegal enda ulih nagang diri.
6 Tang, utai ke disebut aku nya ukai adat ke patut dititihka kita. Kita empu ulih milih sekalika kita deka ngereja nya tauka enda.
7 Aku ngarapka semua orang nyadi baka aku. Taja pia, tiap iku orang nerima pemeri diri ari Petara. Bisi nya nerima pemeri tu, lalu bisi nya nerima pemeri nya.
8 Ngagai sida ke bedau kawin enggau sida ke balu, manah agi enti sida terus nyadi baka aku.
9 Tang enti sida enda tetagangka diri, awakka sida kawin. Manah agi sida kawin ari ke dikuasa pengingin seks ti balat.
10 Ngagai orang ke udah kawin, aku meri jaku ajar ukai ari aku, tang ari Tuan. Bini enda patut beserara ari laki iya.
11 Tang enti iya beserara ari laki iya, iya enda patut belaki baru tauka iya patut bebaik baru enggau laki iya. Laki mega enda patut ninggalka bini.
12 Ngagai sida ke bukai, aku deka madahka jaku tu ari aku empu, ukai ari Tuan. Enti siku menyadi bisi bini ke enda arap, lalu bini iya setuju deka diau begulai enggau iya, iya enda patut ninggalka bini iya.
13 Enti siku menyadi indu bisi laki ke enda arap, lalu laki iya setuju deka diau begulai enggau iya, iya enda patut ninggalka laki iya.
14 Nya ketegal laki ke enda arap deka nyadi kudus ketegal bini iya. Lalu bini ke enda arap deka nyadi kudus ketegal laki iya. Enti enda, anak kita deka nyadi enda tuchi. Tang diatu sida nyadi kudus.
15 Tang enti laki tauka bini ke enda arap milih deka beserara, awakka iya mupuk. Ba pekara nya, menyadi lelaki tauka menyadi indu nya tau enda ibuh terus diau begulai enggau kaling pengidup ke enda arap nya. Petara udah meri kita pengelantang.
16 Kita ke bini, baka ni kita nemu sekalika kita ulih nyelamatka laki kita tauka enda? Kita ke laki, baka ni kita nemu sekalika kita ulih nyelamatka bini kita tauka enda?
17 Taja pia, awakka tiap iku orang idup sejalai enggau utai ke udah diberi Jehovah, iya nya, nitihka gaya pengidup iya maya iya dikangau Petara. Aku meri pesan tu ngagai semua raban gempuru.
18 Kati bisi orang ke udah besunat* maya iya dikangau? Enti pia, awakka iya terus baka nya. Kati bisi orang ke bedau besunat maya iya dikangau? Enti pia, iya enda ibuh besunat.
19 Besunat tauka enda, nya nadai reti. Tang utai ke lebih agi patut dikemeratka,* iya nya ngasika pesan Petara.
20 Awakka tiap iku orang nitihka gaya pengidup diri maya iya dikangau.
21 Kati kita ulun maya kita dikangau? Anang irau pasal nya. Tang enti kita bisi peluang dilepaska, kena meh peluang nya,
22 laban sapa-sapa ke nyadi ulun maya iya dikangau nyadi murid Tuan kitai udah dilepaska, lalu diempu Tuan kitai. Pia mega, barang sapa ke endang sigi orang ke bibas maya iya dikangau, deka nyadi ulun Kristus.
23 Kita udah dibeli ngena rega ti mar. Nya alai, badu agi nyadi ulun mensia.
24 Nyadi, bala menyadi, enda ngira baka ni gaya pengidup kita maya kita dikangau, awakka kita terus idup baka nya ba mua Petara.
25 Diatu, bekaul enggau kita ke bedau kawin,* aku nadai nerima pesan ari Tuan, tang ketegal pengasih ke diayanka Tuan ngagai aku, kita ulih pechayaka utai ke disebut aku tu.
26 Ketegal pengidup kitai ke tusah kemayaharitu, manah agi enti siku lelaki neruska pengidup iya baka ke diatu.
27 Enti kita bisi bini, anang agi ngiga chara ngambika ulih beserara ari iya. Enti kita nadai bini, anang agi ngiga bini.
28 Tang enti kita kawin, kita enda bedosa. Enti orang ke bujang dara kawin, iya mega enda bedosa. Tang orang ke kawin deka napi mayuh penusah. Aku deka nulung kita nyeliahka nya.
29 Nambahka nya, perundingka mega pasal tu, bala menyadi. Kitai nyau suntuk jam. Berengkah ari diatu, awakka orang ke bisi bini nyadi baka orang ke nadai bini,
30 orang ke nyabak nyadi baka orang ke enda nyabak, orang ke gaga ati nyadi baka orang ke enda gaga ati, orang ke meli utai nyadi baka orang ke enda ngempu utai ke dibeli,
31 lalu orang ke ngena dunya tu nyadi baka orang ke enda ngena dunya tu enggau pengabis iya, laban gaya dunya tu benung berubah.
32 Aku deka kita dilepaska ari pengirau. Lelaki ke enda kawin seruran berundingka pengawa ke Tuan, laban iya deka ngelantangka ati Tuan.
33 Tang lelaki ke udah kawin seruran berundingka utai ba dunya, laban iya deka ngelantangka ati bini iya.
34 Nya alai, ati iya bebagi. Indu ke enda kawin sereta indu ke agi dara seruran berundingka pengawa ke Tuan ngambika tubuh enggau runding sida kudus. Tang indu ke udah kawin seruran berundingka utai ba dunya, laban iya deka ngelantangka ati laki iya.
35 Aku ukai deka nyekat pengidup kita. Tang, aku nyebut munyi nya ke penguntung kita. Aku deka meransang kita ngambika enda limpang, tang ngereja utai ti ngena sereta terus gawa ke Tuan enggau pengabis ati.
36 Tang enti orang ke bedau kawin ngasaika diri enda ulih nagang pengingin seks iya, lalu iya udah ngelui jeman remaja,* manah agi iya kawin. Nya ukai dosa.
37 Taja pia, siku orang engka ngasaika diri enda ibuh kawin, lalu iya ulih nagang pengingin seks diri. Iya engka udah mutuska dalam ati iya, lalu iya tetap enggau pemutus iya ke enggai kawin. Enti pia, iya deka bulih penguntung.
38 Nya alai, orang ke kawin deka bulih penguntung, tang orang ke enda kawin deka bulih mayuh agi penguntung.
39 Bini mengkang jadi enggau laki iya seagi-agi laki iya idup. Tang enti laki iya udah tinduk dalam pemati, iya ulih kawin enggau sapa-sapa ke dipilih iya, asal aja lelaki nya murid Tuan.
40 Tang, iya deka lebih agi gaga ati enti iya enda belaki baru. Taja pan tu semina runding aku aja, tang aku mega pechaya aku bisi kuasa kudus Petara.
Nota Kaki
^ Iya nya, ngereja ulah seks enggau.
^ Jaku Gerika, “por·nei′a.” Peda Penerang Leka Jaku.
^ Tauka “betutus.”
^ Tauka “ke penting agi.”
^ Jaku Asal, “bujang dara.”
^ Iya nya, maya pengingin seks agi balat.
