1 Raja 8:1-66
8 Udah nya, Solomon ngempuruka bala tuai orang Israel, iya nya bala tuai raban enggau bala tuai suku orang Israel. Sida betemu enggau Raja Solomon ba Jerusalem laban deka mindahka peti lampang batu Adat Jehovah ari Kuta David, iya nya Sion.
2 Semua orang Israel begempuru ba depan Raja Solomon maya Pengerami Belangkau ba bulan Etanim,* iya nya ba bulan ti ketujuh.
3 Lebuh semua bala tuai orang Israel udah datai, bala imam lalu ngesan peti lampang batu Adat nya.
4 Bala imam enggau orang Lewi mai peti lampang batu Adat Jehovah, langkau gempuru, enggau semua pekekas ti kudus ke bisi dalam langkau nya.
5 Raja Solomon enggau semua orang Israel ke udah dikangau betemu enggau Raja Solomon, begempuru magang ba depan peti lampang batu Adat nya. Bisi mayuh amat bedus enggau sapi ke diserahka nyadika pemeri, nyentukka penyampau semua jelu nya enda ulih diitung.
6 Udah nya, bala imam mai peti lampang batu Adat Jehovah ngagai endur ke udah ditetapka, iya nya ba Endur ti Pemadu Kudus. Bilik nya ba begian paling ujung Rumah Sembiang. Sida ngengkahka peti nya ba baruh sayap dua iku cherub.
7 Sayap dua iku cherub nya ngerembai ba atas peti lampang batu Adat nya. Lalu peti nya enggau kayu ke dikena ngesan peti nya ba baruh sayap nya.
8 Kayu ke dikena ngesan peti nya panjai. Ujung kayu nya ulih dipeda ari Endur ti Kudus ke ba depan Endur ti Pemadu Kudus. Tang kayu nya enda ulih dipeda ari luar. Kayu nya agi ba dia nyentukka seharitu.
9 Dalam peti nya semina bisi dua iti lampang batu. Lampang batu nya disimpan Moses lebuh iya ba Horeb, iya nya lebuh Jehovah ngaga sempekat enggau orang Israel pengudah sida pansut ari menua Ejip.
10 Lebuh bala imam pansut ari endur ti kudus nya, Rumah Jehovah lalu penuh laban remang.*
11 Bala imam enda ulih bejalaika pengawa sida ketegal remang nya. Mulia Jehovah udah ngemenuhka Rumah Jehovah.
12 Maya nya, Solomon lalu madah: “Jehovah, Nuan madahka Nuan deka diau dalam remang ti chelum nya.
13 Aku udah mujur ngaga siti Rumah ti bemulia ke Nuan, siti endur ti tetap alai Nuan diau belama iya.”
14 Udah nya, raja nguing lalu merekatka semua orang Israel ke benung bediri ba dia.
15 Ku iya bejaku: “Awakka Jehovah, Petara orang Israel dipuji! Iya udah besemaya ngagai apai aku, David, ngena mulut Iya Empu, lalu udah ngamatka semaya Iya ngena jari Iya Empu. Iya kala madahka:
16 ‘Kenyau ari Aku mai bala nembiak Aku, Israel, pansut ari menua Ejip, Aku lalu bedau milih siti kuta ba serata kawasan raban bansa Israel nyadika endur alai ngaga siti Rumah, ngambika nama Aku mengkang ba dia. Tang, Aku udah milih David merintah bala nembiak Aku, Israel.’
17 Apai aku, David, amat ingin deka ngaga siti Rumah kena ngemuliaka nama Jehovah, Petara orang Israel.
18 Tang, Jehovah madah ngagai apai aku, David: ‘Nuan amat ingin deka ngaga siti Rumah kena ngemuliaka nama Aku. Manah nya! Nuan bisi ati deka ngereja nya.
19 Taja pia, ukai nuan ke deka ngaga Rumah nya. Tang anak nuan empu, ke deka ada dudi hari, iya meh ke deka ngaga Rumah kena ngemuliaka nama Aku.’
20 Jehovah udah ngamatka semaya Iya. Aku udah duduk ba kerusi diraja Israel lalu nganti apai aku nyadi raja, baka ke udah disemayaka Jehovah. Aku mega udah ngaga siti Rumah kena ngemuliaka nama Jehovah, Petara orang Israel.
21 Ba Rumah nya, aku udah nyediaka endur alai ngengkahka peti lampang batu Adat. Dalam peti nya bisi sempekat ke digaga Jehovah enggau aki ini kitai lebuh Iya mai sida pansut ari menua Ejip.”
22 Udah nya, Solomon bediri ba depan alta Jehovah, ba depan semua raban gempuru* Israel. Iya ngangkat kedua-dua jari iya ke langit
23 lalu besampi: “O Jehovah, Petara orang Israel, nadai Petara bukai ke baka Nuan, enda ngira ba serega tauka ba dunya. Nuan ngamatka sempekat Nuan, lalu ngayanka pengerindu ti setia ngagai bala nembiak Nuan ke nyembah Nuan enggau pengabis ati.
24 Nuan udah ngamatka semaya Nuan ngagai apai aku, David. Nuan udah besemaya ngena mulut Nuan Empu, lalu seharitu Nuan udah ngamatka semaya nya ngena jari Nuan Empu.
25 O Jehovah, Petara orang Israel, keamatka mega semaya tu, iya nya semaya ke udah disebut Nuan ngagai apai aku, David, lebuh Nuan madah: ‘Enti bala peturun nuan beratika pengidup diri empu lalu nitihka jalai Aku, baka ke digaga nuan, peturun nuan deka seruran duduk ba kerusi diraja Israel ba depan Aku.’
26 Nya alai, O Petara orang Israel, awakka semaya Nuan ngagai nembiak Nuan, David, apai aku, dikeamatka.
27 “Tang, kati Petara amat deka diau ba dunya tu? Indah langit, au, serata langit pan enda chukup besai ke Nuan. Anang agi Rumah ke udah digaga aku tu!
28 O Jehovah, Petara aku, dingaka meh sampi aku sereta utai ke dipinta aku, nembiak Nuan tu. Dingaka aku lebuh aku besampi sereta minta tulung ba depan Nuan seharitu.
29 Awakka mata Nuan beratika Rumah tu siang enggau malam. Pasal endur tu, Nuan udah madah: ‘Nama Aku deka bisi ba dia.’ Nya alai, pendingka meh nembiak Nuan lebuh iya besampi nunga endur tu.
30 Pendingka meh utai ke dipinta nembiak Nuan sereta bala nembiak Nuan, Israel, lebuh sida besampi nunga endur tu. Awakka Nuan ninga ari endur Nuan diau ba serega. Au, awakka Nuan ninga lalu ngampunka kami.
31 “Enti bisi orang dituduh ngereja utai ti salah lalu diasuh besumpah,* lalu udah nya iya mansang ngagai alta ba Rumah tu,
32 dingaka meh ari serega lalu akim meh nembiak Nuan nya. Awakka orang ke jai dikumbai salah lalu diukum nitihka penyalah ke udah dikereja iya. Awakka orang ke lurus dikumbai enda salah lalu diberi upah nitihka utai manah ke udah dikereja iya.
33 “Lebuh bala nembiak Nuan, Israel, alah laban munsuh ketegal sida majak bedosa ngagai Nuan lalu udah nya sida pulai baru ngagai Nuan, ngemuliaka nama Nuan, lalu besampi sereta bebendar minta kasih ari Nuan ba Rumah tu,
34 dingaka meh ari serega lalu ampunka meh dosa bala nembiak Nuan, Israel. Bai meh sida pulai ngagai menua ke udah diberi Nuan ngagai aki ini sida.
35 “Lebuh langit ditutup lalu hari enda ujan ketegal sida majak bedosa ngagai Nuan, lalu udah nya sida besampi nunga endur tu, ngemuliaka nama Nuan, sereta nesal ati ke dosa sida ketegal Nuan udah ngasuh sida baruh ati,*
36 dingaka meh ari serega lalu ampunka meh dosa bala penyembah Nuan, iya nya bala nembiak Nuan, Israel. Ajar meh sida jalai ti manah ke patut ditengah sida, lalu asuh meh ujan nurun ba menua ke udah diberi Nuan ngagai sida nyadika pesaka.
37 “Enti menua tu ditinggang lapar pungkang tauka penyakit berampit, enti utai ditanam diserang penyakit,* diserang seraban buntak ke kuat makai tauka kena angin ti angat, enti kuta bala nembiak Nuan dikelulung munsuh, enti bala nembiak Nuan ditinggang penulah tauka penyakit,
38 lalu udah nya enti siku tauka semua nembiak Nuan, Israel, ngangkat jari nunga Rumah tu deka besampi tauka minta kasih (ketegal tiap iku orang nemu penusah ke bisi dalam ati diri),
39 dingaka meh ari endur Nuan diau ba serega. Ampunka sida lalu tulung sida. Beri upah ngagai tiap iku sida sejalai enggau semua utai ke udah dikereja sida, laban Nuan nemu ati sida. Semina Nuan siku aja ke amat-amat nemu utai ke bisi dalam ati tiap iku mensia.
40 Nya deka ngasuh sida nangika Nuan sepemanjai sida idup ba menua ke diberi Nuan ngagai aki ini kami.
41 “Perundingka mega orang asing ke ukai sebagi ari nembiak Nuan, Israel, ke udah datai kitu ari menua ti jauh ketegal nama Nuan
42 (ketegal sida ninga pasal nama Nuan ti mulia enggau jari Nuan ti kering sereta bekuasa), lalu iya datai sereta besampi nunga Rumah tu,
43 dingaka meh ari endur Nuan diau ba serega. Keamatka meh semua utai ke dipinta orang asing nya ngambika semua orang ba dunya nemu nama Nuan sereta nangika Nuan, baka nembiak Nuan, Israel. Sida mega deka nemu nama Nuan bisi ba Rumah ke udah digaga aku tu.
44 “Enti Nuan nganjung nembiak Nuan beperang ngelaban munsuh sida, enda ngira dini alai sida, lalu sida besampi ngagai Jehovah nunga kuta ke udah dipilih Nuan sereta nunga Rumah ke udah digaga aku,
45 dingaka meh sampi sereta utai ke dipinta sida lalu tulung sida.
46 “Enti sida bedosa ngagai Nuan (laban nadai siku mensia ke enda bedosa) lalu Nuan ringat ngagai sida, nejuka sida alah sereta ditabanka munsuh, lalu sida dibai ngagai menua munsuh ti jauh tauka semak,
47 tang lebuh sida ditangkap ba menua munsuh, sida nyau sedar lalu nguing ngagai Nuan. Sida minta kasih ngagai Nuan, lalu madah: ‘Kami udah bedosa sereta ngereja utai ti salah. Kami udah ngereja utai ti jai.’
48 Sida nguing ngagai Nuan enggau pengabis ati sereta enggau pengabis pengidup lebuh sida ba menua munsuh ke nabanka sida. Sida besampi ngagai Nuan nunga menua ke udah diberi Nuan ngagai aki ini sida, kuta ke udah dipilih Nuan, sereta Rumah ke udah digaga aku ke nama Nuan.
49 Nyadi, dingaka meh ari endur Nuan diau ba serega, sampi sida sereta utai ke dipinta sida, lalu tentuka sida dilayan enggau adil.
50 Ampunka meh nembiak Nuan ke udah bedosa ngagai Nuan. Ampunka meh semua penyalah ke udah dikereja sida ngagai Nuan. Asuh meh munsuh sida kasihka sida, lalu munsuh sida deka kasihka sida.
51 Sida iya nembiak Nuan sereta pesaka Nuan ti berega ke udah dibai Nuan pansut ari menua Ejip, iya nya ari serumbung api kena nganchurka besi.*
52 Awakka Nuan mendingka utai ke dipinta nembiak Nuan sereta utai ke dipinta bala nembiak Nuan, Israel, lebuh sida besampi ngagai Nuan.
53 O Jehovah, Tuan ti Pemadu Tinggi, Nuan udah milih sida ari semua bansa ba dunya nyadika pesaka Nuan, baka ke udah dipadah Nuan nengah nembiak Nuan, Moses, lebuh Nuan mai aki ini kami pansut ari menua Ejip.”
54 Maya nya, Solomon besugang sambil ngangkatka jari iya ke langit ba depan alta Jehovah. Pengudah iya tembu besampi sereta madahka utai ke dipinta ngagai Jehovah, iya pan angkat lalu mupuk ari alta nya.
55 Lebuh iya bediri, iya merekatka semua orang Israel enggau nyawa ti inggar. Ku iya:
56 “Puji meh Jehovah ke udah meri endur ti likun ngagai nembiak Iya, Israel, baka ke udah disemayaka Iya. Nadai siti pan utai manah ke udah disemayaka Iya nengah nembiak Iya, Moses, ke enda dikeamatka.
57 Awakka Jehovah, Petara kitai, bisi enggau kitai baka Iya ke udah enggau aki ini kitai. Awakka Iya enda ninggalka kitai tauka ngelengkaka kitai.
58 Awakka Iya ngasuh ati kitai nitihka semua jalai Iya sereta ngasika pesan Iya, atur Iya, enggau adat Iya, baka ke diasuh Iya titihka aki ini kitai.
59 Awakka jaku enggau utai ke dipinta aku enggau bebendar ngagai Jehovah, dikingatka Jehovah, Petara kitai, siang enggau malam. Awakka Iya nentuka ulun Iya enggau bala nembiak Iya dilayan enggau adil, sejalai enggau utai ke diguna sida ninting hari.
60 Nya baru semua orang ba dunya deka nemu, Jehovah nya Petara ti bendar, nadai Petara bukai.
61 Nya alai, awakka kita nyembah Jehovah, Petara kita, enggau pengabis ati kita,* nitihka atur Iya, sereta ngasika pesan Iya, baka ke digaga kita seharitu.”
62 Udah nya, Raja Solomon enggau semua orang Israel nyerahka mayuh amat pemeri ngagai Jehovah.
63 Solomon nyerahka pemeri bebaik ngagai Jehovah. Iya nyerahka 22,000 iku sapi enggau 120,000 iku bedus. Baka nya meh chara raja enggau semua orang Israel ngerasmika Rumah Jehovah.
64 Ba hari nya, raja patut nguduska begian tengah laman ke ba depan Rumah Jehovah. Ba dia, iya nyerahka pemeri tunu, pemeri bijirin, enggau lemak pemeri bebaik, laban alta temaga ke ba depan Jehovah kelalu mit kena nunu semua pemeri nya.
65 Maya nya, Solomon enggau semua orang Israel ngintu pengerami ba depan Jehovah. Mayuh amat orang datai. Sida datai ari Lebo-hamat* nyentuk ngagai Wadi* Ejip. Sida ngintu pengerami nya pengelama tujuh hari, lalu neruska pengerami nya tujuh hari agi. Nyadi sida ngintu pengerami nya pengelama 14 hari.
66 Ba hari pengudah pengerami nya,* raja ngasuh semua orang pulai. Sida merekatka raja lalu pulai enggau ati ti gaga ketegal semua pemanah ke udah diayanka Jehovah ngagai nembiak Iya, David, sereta ngagai bala nembiak Iya, Israel.
Nota Kaki
^ Peda Rujukan B15.
^ Tauka “awan.”
^ Peda Penerang Leka Jaku.
^ Iya nya, sumpah ke tau ngujungka orang nya diukum enti iya bula tauka enda ngamatka sumpah nya.
^ Tauka “sida merinsa.”
^ Tauka “kulat.”
^ Serumbung api tu ngambarka sida balat diperinsa.
^ Tauka “enggau ati ti enda bebagi.”
^ Tauka “jalai tama ngagai Hamat.”
^ Peda Penerang Leka Jaku.
^ Jaku Asal, “Ba hari ti ke-8,” iya nya hari ke-15, sehari pengudah timpuh 7 hari ti kedua.
