Satu Timoti 4:1-16
4 Tang kuasa kudus* enggau terang madahka, maya deka datai alai sekeda orang deka ngelengkaka pengarap diri, laban sida beratika pesan ti pelesu ke baka ke datai ari Petara sereta mendingka ajar ari bala melikat ti jai.
2 Sida mega ningaka pemula orang ke pura-pura, ke ngembuan ati* ti enda ulih ngasaika nama-nama utai.*
3 Sida nagang orang belaki bebini sereta nagang orang makai sekeda pemakai. Tang Petara udah ngaga pemakai nya ke orang ti arap sereta nemu pemendar enggau betul, ngambika sida ulih makai pemakai nya lalu meri terima kasih ngagai Petara.
4 Tiap iti utai ke digaga Petara endang manah magang, lalu nadai siti pan ke patut ditulak enti iya diterima enggau sampi terima kasih,
5 laban pemakai nya udah nyadi tuchi nengah jaku Petara enggau sampi.
6 Enti nuan meri jaku ajar tu ngagai bala menyadi, nuan deka nyadi ulun Jesus Kristus ti manah. Nuan deka nunjukka diri udah dilatih ngena pesan pasal pengarap kitai sereta ajar ti manah ke udah amat-amat dititihka nuan ngelama tu.
7 Anang mendingka cherita bula ke ngenyaika nama Petara baka ke ditusui sida indu ke tuai. Tang latih meh diri lalu tetapka juluk ati ngambika enda bebagi ati nyembah Petara.
8 Enti orang ngelatih tubuh,* nya deka mai mimit penguntung ngagai iya. Tang enti iya enda bebagi ati nyembah Petara, nya deka mai penguntung ba semua pekara, lalu ba pengidup ke diatu enggau ke jemah ila, iya deka nerima berekat ke disemayaka Petara.
9 Jaku nya ulih dikearapka lalu patut diterima enggau pengabis ati.
10 Nya meh kebuah kitai bebendar gawa sereta ngereja utai enggau naka ulih, laban kitai ngarapka Petara ti idup. Iya meh Penyelamat semua macham orang, kelebih agi orang ke tetap ati.
11 Anang ngetu meri pesan nya sereta ngajar pasal pesan nya.
12 Anang nejuka orang ngemaruhka nuan ketegal nuan agi biak. Tang awakka jaku nuan, ulah nuan, pengerindu nuan, pengarap nuan, enggau pendiau nuan ti tuchi, nyadi teladan ke orang ti tetap ati.
13 Terus meh bebendar macha ba mua orang mayuh, meri jaku lalau,* sereta ngajar, nyentuk ke aku datai.
14 Anang enda ibuhka pemeri ke bisi ba nuan, ke udah diberi ngagai nuan nengah jaku bala nabi lebuh raban tuai gempuru ngengkahka jari sida ba atas nuan.
15 Perundingka meh enggau dalam sereta peratika meh enggau bebendar semua pekara nya, ngambika semua orang ulih meda pemansang nuan enggau terang.
16 Terus meh beratika diri empu sereta utai ke diajar nuan. Kereja semua nya enggau liat ati, laban enti nuan ngereja nya, nuan deka nyelamatka diri empu enggau sida ke mendingka nuan.
Nota Kaki
^ Peda Penerang Leka Jaku.
^ Jaku Gerika, “sy·neiʹde·sis.” Peda Penerang Leka Jaku, “Sy·neiʹde·sis.”
^ Tauka “ati ke udah disar ngena besi ti angat.”
^ Tauka “eksesais; besenam.”
^ Tauka “jaku peransang.”
