Dua Peter 2:1-22
2 Kelia menya, bisi bala nabi pelesu ba bala nembiak Petara. Pia mega, bala pengajar pelesu deka bisi ba bala kita. Sida ngena chara belalai ngasuh orang bepechah-belah nyadi beberapa raban, lalu nya deka nganchurka pengarap kita. Sida indah enda ngaku tuan sida ke udah meli sida. Ketegal nya, sida deka dipunaska enggau jampat.
2 Nambahka nya, mayuh orang deka nunda sida ke enda malu ngereja utai ti jai.* Ketegal nya, orang bejaika ajar ti bendar.
3 Bala pengajar pelesu ke amu tu deka ngena pemula ngambi ulih ba kita. Tang, ukum ke diterima sida udah ditentuka kenyau ari kelia menya, lalu ukum nya tentu enda laun ninggang sida. Sida tentu deka dipunaska.
4 Petara enda nagang Diri ari ngukum bala melikat ti bedosa. Tang Iya muai sida ngagai Tartarus,* lalu ngerantai sida ba endur ti balat petang* kena ngetan sida nyentuk ngagai maya sida diukum.
5 Petara mega enda nagang Diri ari ngukum dunya kelia menya. Iya ngenataika ai bah ngagai dunya orang ke enda bebasaka Iya, tang nyelamatka Noah ke nusui pasal pemendar sereta nyelamatka tujuh iku orang ke bukai.
6 Kelimpah ari nya, Petara ngukum Sodom enggau Gomorah nyentukka anchur nyadi amau. Utai nya nyadika tangkan ke nunjukka utai ke deka nyadi ngagai orang ke enda bebasaka Iya.
7 Tang Iya udah nyelamatka Lot. Lot siku orang ke lurus, ke balat tusah ati ketegal orang ke ngelanggar adat enda malu ngereja utai ti jai.*
8 Ninting hari, lelaki ke lurus nya balat merinsa lebuh iya diau begulai enggau sida. Nya ketegal iya ninga sereta meda pengawa sida ti jai.
9 Nyadi, Jehovah* nemu chara ngelepaska orang ke enda bebagi ati nyembah Iya ari penguji. Iya mega nemu chara ngetan orang ke enda lurus nyentuk ngagai hari sida diukum lalu dipunaska.
10 Kelebih agi, sida ke bebendar nguji deka ngamahka tubuh orang bukai sereta ke balat begedika* orang ke bekuasa.
Sida balat berani sereta bekeras enggau penemu diri, lalu sida enda takut bejaku kasar pasal orang ke dimuliaka Petara.
11 Indah, bala melikat ke kering agi sereta ke bekuasa agi pan enda nuduh sida ngena jaku ti kasar ketegal bala melikat nya bebasaka Jehovah.
12 Tang sida nya baka jelu ke enda nemu berunding, ke ngereja utai nitihka naluri, sereta ke endang sigi diadaka ngambika ditangkap lalu dipunaska. Sida nyebut utai ti jai pasal utai ti enda dimeretika sida. Penyai ke dikereja sida deka ngujungka sida dipunaska.
13 Ketegal penyai nya, sida deka merinsa. Nya meh upah ke deka diulih sida.
Sida bebendar idup kaya-raja sereta ngemuaska ati diri, indah maya siang hari. Ba sida, nya meh utai ti ngelantangka ati. Sida nya meh petik sereta utai ti kamah ke rindu amat* nusui ajar ti pelesu, lebuh sida begulai makai enggau kita.
14 Sida bisi pengingin ti balat deka ngereja pengawa butang,* lalu sida enda ulih ngetu ngereja pengawa ti bedosa. Sida narit ati orang ke lemi kena manjuk orang nya. Ati sida udah dilatih ngambika amu. Sida meh orang ke ditinggang sumpah.
15 Sida ninggalka jalai ti lurus, lalu udah dibai limpang. Sida udah nitihka jalai Balam anak Beor, ke rindu nerima upah ketegal ngereja utai ti salah.
16 Balam udah dirara ketegal iya ngelanggar utai ti betul. Siku jelu ke enda nemu bejaku udah bejaku ngena nyawa mensia, kena nagang pengawa nabi ke gila nya.
17 Bala pengajar pelesu nya pun penatai ai* ti rangkai sereta kabus ti dipuputka kabut ti balat. Pemetang ti pemadu balat udah disediaka ke sida.
18 Lebuh sida bejaku, jaku sida manah amat didinga, tang nadai reti. Sida enda malu ngereja mayuh utai ti jai* sereta ngasuh orang bisi pengingin ti salah. Nya meh chara sida narit ati lalu manjuk orang ke baru udah ngelepaska diri ari orang ke ngereja penyalah.
19 Sida besemaya deka ngelepaska orang, taja pan sida empu nyadi ulun penyai. Nya ketegal barang sapa ke alah, deka nyadi ulun orang* ke ngalahka iya.
20 Orang udah ngelepaska diri ari utai ti kamah ba dunya tu pengudah sida bulih penemu ti betul pasal Tuan sereta Penyelamat kitai, Jesus Kristus. Tang, enti sida nikal baru ngagai utai ti kamah nya, lalu dialahka utai nya, sida deka nyadi teruk agi ari ke sebedau nya.
21 Enti sida udah bulih penemu ti betul pasal jalai ti lurus, tang udah nya, sida nyau ninggalka pesan ti kudus ke udah diterima sida, manah agi enti sida nadai penemu nya.
22 Jaku-dalam tu amat-amat udah ngambarka sida: “Ukui pulai baru lalu makai mutah iya empu, lalu babi ke udah diberi mandi, ngalika diri ba tanah luchak.”
Nota Kaki
^ Jaku Gerika, “a·sel′gei·a.” Peda Penerang Leka Jaku, “A·sel′gei·a.”
^ Peda Penerang Leka Jaku.
^ Tauka engka, “lalu ngurung sida ba lubang ti balat petang.”
^ Jaku Gerika, “a·sel′gei·a.” Peda Penerang Leka Jaku, “A·sel′gei·a.”
^ Peda nota kaki ba Matthew 1:20.
^ Tauka “ngemaruhka.”
^ Tauka “ke enda tetagangka diri ketegal lantang ati deka.”
^ Orang ti udah kawin ngereja ulah seks enggau orang ke ukai kaling pengidup iya. Tauka “Mata sida penuh enggau pengawa butang.”
^ Tauka “mata ai.”
^ Jaku Gerika, “a·sel′gei·a.” Peda Penerang Leka Jaku, “A·sel′gei·a.”
^ Tauka “utai.”
