Daniel 2:1-49
-
Raja Nebukadnesar irau laban mimpi iya (1-4)
-
Orang ke bepenemu-dalam enda ulih madahka mimpi (5-13)
-
Daniel minta tulung ari Petara (14-18)
-
Muji Petara laban udah mandangka resia (19-23)
-
Daniel madahka mimpi ngagai raja (24-35)
-
Reti mimpi nya (36-45)
-
Batu nganchurka patung (44, 45)
-
-
Raja ngayanka basa ngagai Daniel (46-49)
2 Ba taun ti kedua Nebukadnesar merintah, iya bemimpi beberapa kali. Mimpi nya ngasuh iya balat amat irau nyentukka iya enda ulih tinduk.
2 Iya pan ngangauka bala imam ke nemu sihir,* orang ke nemu nilit nasit, bala dukun, enggau orang Kaldea* laban iya deka ngasuh sida madahka nama mimpi iya. Sida pan datai betemu enggau iya.
3 Udah nya, raja madah ngagai sida: “Aku bisi mimpi. Aku balat amat irau, laban aku ka nemu nama mimpi nya.”
4 Orang Kaldea pan nyaut raja ngena bansa jaku Aramaik:* “O tuan raja, awakka nuan idup belama iya. Padahka meh mimpi nuan ngagai kami, lalu kami deka madahka reti mimpi nuan.”
5 Raja madah ngagai orang Kaldea: “Tu pemutus aku: Enti kita enda madah ngagai aku nama mimpi aku sereta reti mimpi nya, tubuh kita deka ditetak, lalu rumah kita deka digaga nyadi jamban awam.*
6 Tang enti kita madah ngagai aku nama mimpi aku sereta reti iya, kita deka bulih hadiah ari aku, upah, sereta mulia ti besai. Nyadi, padahka ngagai aku nama mimpi aku nya sereta nama reti mimpi nya.”
7 Ku sida madah baru: “Padahka meh mimpi nuan ngagai kami, tuan raja, lalu kami deka madahka reti iya.”
8 Ku raja nyaut: “Aku nemu kita sengaja betangguh, laban kita udah nemu pemutus aku.
9 Enti kita enda madahka mimpi nya ngagai aku, semua kita deka nerima ukum ti sama. Aku nemu kita bepakat deka nipu aku, laban kita ngarapka aku ngubah runding diri. Padahka dulu nama mimpi aku. Nya baru aku nemu kita ulih nerangka reti iya.”
10 Ku orang Kaldea nya nyaut raja: “Nadai orang ba dunya ke ulih ngereja utai ke dipinta tuan raja. Nadai raja ke bekuasa tauka pemerintah ke kala ngasuh imam ke nemu sihir, orang ke nemu nilit nasit, tauka orang Kaldea ngereja utai ke baka nya.
11 Utai ke dipinta tuan raja nya amat tusah. Nadai siku pan orang ulih madahka nya ngagai tuan raja, kelimpah ari bala petara ke enda diau begulai enggau mensia.”
12 Pengudah ninga nya, raja pan balat amat ringat. Iya ngasuh orang munuh semua orang ke bepenemu-dalam ba Babilon.
13 Atur nya pan dikeluarka, lalu semua orang ke bepenemu-dalam deka dibunuh. Orang mega ngiga Daniel enggau bala kaban iya, laban sida mega deka dibunuh.
14 Maya nya, Daniel betemu enggau ketuai jejaga raja ke benama Ariok. Iya ngayanka basa sereta bejimat lebuh bejaku enggau Ariok ke benung mansang deka munuh semua orang ke bepenemu-dalam ba Babilon.
15 Ku Daniel nanya Ariok, pegawai raja nya: “Nama kebuah atur ke diberi raja nya kejam amat?” Udah nya, Ariok madahka Daniel pasal utai ke udah nyadi.
16 Nya alai, Daniel betemu enggau raja lalu minta raja meri iya masa kena nerangka mimpi nya.
17 Daniel pulai ke rumah lalu madahka pasal nya ngagai bala kaban iya, iya nya Hananiah, Misael, enggau Asariah.
18 Iya ngasuh sida besampi minta pengasih ari Petara ke ba serega sereta minta Petara madahka resia nya ngagai sida, ngambika sida enda dibunuh sama enggau bala orang ke bepenemu-dalam ba Babilon.
19 Maya malam hari, Petara mandangka resia nya dalam runding Daniel. Nya alai, Daniel meri puji ngagai Petara ke ba serega.
20 Ku Daniel madahka:
“Awakka nama Petara dipuji belama iya;Semina Iya aja meh ke bisi penemu-dalam enggau kuasa.
21 Iya ngubah jam sereta musin,Ngelantik raja sereta muai raja,Meri penemu-dalam ngagai orang ke pintar, lalu meri penemu ngagai orang ke ulih meretika utai enggau dalam.
22 Iya mandangka utai ti dalam sereta utai ti dilalaika,Iya nemu utai ke ba dalam pemetang,Lalu Iya dikelingi cahaya ti terang.
23 O Petara aki ini aku, aku meri terima kasih sereta meri puji ngagai Nuan,Laban Nuan udah meri aku penemu-dalam enggau kuasa.
Nuan udah mandangka ngagai aku utai ke dipinta kami;Nuan udah madah ngagai kami mimpi raja.”
24 Udah nya, Daniel betemu enggau Ariok ke udah diasuh raja munuh semua orang ke bepenemu-dalam ba Babilon. Ku Daniel madah ngagai Ariok: “Anang munuh orang ke bepenemu-dalam ba Babilon. Bai aku betemu enggau raja. Aku deka madahka raja reti mimpi iya.”
25 Ariok pan terus mai Daniel betemu enggau raja. Ku Ariok madah ngagai raja: “Tuan raja, aku bisi tetemuka siku orang ke udah ditangkap ari Judah. Iya ulih madahka reti mimpi nuan, tuan raja.”
26 Ku raja nanya Daniel ke mega dikumbai Beltesasar: “Amat nuan ulih madahka mimpi aku sereta reti iya?”
27 Ku Daniel nyaut raja: “Nadai siku pan orang ke bepenemu-dalam, orang ke nemu nilit nasit, bala imam ke nemu sihir, tauka orang ke nemu nujum nengah bintang ulih madahka resia ke ditanya tuan raja nya.
28 Tang, bisi Petara ke ba serega ke ulih mandangka semua resia. Iya udah ngasuh tuan raja nemu pasal utai ke deka nyadi ba timpuh ti penudi. Tu meh mimpi nuan sereta utai ke dipandangka Petara dalam runding nuan lebuh nuan gali ba katil:
29 “Tuan raja, lebuh nuan gali ba katil, nuan bemimpi* pasal utai ke deka nyadi jemah ila, lalu Petara ke mandangka semua resia udah ngasuh nuan nemu nama utai ke deka nyadi.
30 Resia nya dipandangka ngagai aku, ukai ketegal aku lebih bepenemu-dalam agi ari orang bukai. Tang, resia nya dipandangka ngambika tuan raja ulih meretika mimpi nya sereta nemu nama utai ke diperundingka nuan dalam mimpi nuan.
31 “Tuan raja, nuan meda siti patung bediri ba depan nuan. Patung nya amat besai sereta bekilat, lalu balat ngenakutka.
32 Pala iya digaga ari emas ti tulin. Dada enggau lengan iya digaga ari pirak. Perut enggau pah iya digaga ari temaga.
33 Betis iya digaga ari besi, lalu kaki iya digaga ari besi enggau tanah liat.*
34 Lebuh tuan raja meda patung nya, bisi sigi batu diputung ari siti gunung, tang batu nya ukai diputung ngena jari mensia. Batu nya pan mangka lalu nganchurka kaki patung nya ke digaga ari besi enggau tanah liat.
35 Semua begian ke digaga ari besi, tanah liat, temaga, pirak, enggau emas anchur magang. Semua nya nyadi baka ampa ke ba endur alai ngindik gandum maya musin panas, lalu dikebuka angin nyentukka nadai agi dipeda. Tang, batu ke mangka patung nya nyadi siti gunung ti besai lalu ngemenuhka serata dunya.
36 “Nya meh mimpi tuan raja, lalu diatu kami deka madahka reti iya.
37 Tuan raja, nuan meh raja atas semua raja, lalu Petara ke ba serega udah meri nuan perintah, kuasa, pengering, enggau mulia.
38 Petara mega udah meri nuan kuasa atas bala mensia enda ngira ba dini alai sida diau, nyengkaum bala jelu ke ba padang sereta burung ke ba langit. Iya udah ngasuh nuan nyadi pemerintah atas semua sida. Nuan meh pala ke digaga ari emas nya.
39 Pengudah perintah nuan, bisi siti perintah deka datai. Tang, perintah nya enda bekuasa baka perintah nuan. Udah nya, perintah ti ketiga deka datai, iya nya begian ke digaga ari temaga, lalu perintah nya deka merintah serata dunya.
40 Perintah ti keempat deka nyadi kering baka besi. Baka besi ke nganchurka sereta ngeredakka semua utai, perintah nya deka nganchurka sereta ngeredakka semua perintah ke sebedau iya.
41 Baka ke dipeda nuan tuan raja, kaki enggau tunjuk kaki patung nya digaga ari tanah liat* enggau besi. Nya alai, perintah nya deka bebagi. Tang sebagi ari perintah nya deka nyadi kering baka besi, laban baka ke dipeda nuan, tanah liat ti lembut nya disegulaika enggau besi.
42 Ketegal tunjuk kaki patung nya digaga ari besi enggau tanah liat, nya alai sebagi ari perintah nya kering lalu sebagi da agi lemi.
43 Baka ke dipeda nuan, besi nya disegulaika enggau tanah liat ti lembut, nya alai perintah nya deka begulai enggau orang.* Taja pia, sida enda ulih beserakup, baka besi ke enda ulih bechampur enggau tanah liat.
44 Lebuh bala raja nya agi megai perintah, Petara ke ba serega deka numbuhka siti perintah ke enda ulih dipunaska. Perintah nya enda diserahka ngagai orang bukai. Perintah nya mega deka nganchurka sereta ngemunaska semua perintah ke bukai nya. Pengujung iya, semina perintah nya aja ke deka meruan belama iya.
45 Utai nya nyadi baka ke udah dipeda nuan. Sigi batu diputung ari siti gunung, tang batu nya ukai diputung ngena jari mensia. Batu nya lalu nganchurka besi, temaga, tanah liat, pirak, enggau emas nya. Petara ti bemulia udah ngasuh tuan raja nemu utai ke deka nyadi jemah ila. Mimpi nya amat, lalu reti iya ulih dipechaya.”
46 Udah nya, Raja Nebukadnesar nyungkurka diri ba depan Daniel, lalu ngayanka basa ngagai Daniel. Iya mega ngasuh orang nunu menyan lalu meri hadiah ngagai Daniel.
47 Ku raja madah ngagai Daniel: “Sigi amat, Petara nuan Petara atas semua petara, Tuan atas semua raja, sereta Petara ke mandangka semua resia. Nya meh kebuah nuan ulih madahka resia nya.”
48 Udah nya, raja nikika pangkat Daniel, lalu meri iya mayuh hadiah ti berega. Iya mega ngelantik Daniel nyadi pemerintah atas semua wilayah ke dipegai Babilon sereta nyadi ketuai ke ngemataka semua orang ke bepenemu-dalam ba Babilon.
49 Nitihka peminta Daniel, raja mega ngelantik Sadrak, Mesak, enggau Abednego nyadi pegawai perintah ke ngemataka wilayah Babilon. Daniel empu gawa ba istana raja.
Nota Kaki
^ Peda Penerang Leka Jaku, “Ilmu sihir.”
^ Iya nya, seraban orang ke landik nilit nasit sereta landik nujum nengah bintang.
^ Asal iya, Da 2:4b ngagai 7:28 ditulis dalam bansa jaku Aramaik.
^ Tauka engka, “endur alai muai sampah; tugung tai.”
^ Tauka “berunding.”
^ Tauka “tanah liat ke udah ditunu.”
^ Jaku Asal, “tanah liat tukang periuk tanah.”
^ Iya nya, orang biasa.
