Galatia 3:1-29
3 O kita orang Galatia, kita tu enda nemu berunding! Sapa ke udah nipu kita? Endaka kita udah diajar enggau terang pasal Jesus Kristus ke dipantang ba tiang?
2 Bisi siti utai ke deka ditanya aku ngagai kita: Kati kita nerima kuasa kudus* Petara ketegal kita nitihka adat tauka ketegal kita arapka utai ke didinga kita?
3 Nama kebuah kita balat enda nemu berunding? Pengudah kita belabuh bejalai nitihka iring kuasa kudus, kati kita deka nembuka pejalai nya nitihka runding mensia?
4 Kati kita lebu ngapa napi mayuh amat pemerinsa? Tentu enda!
5 Kati orang ke meri kita kuasa kudus Petara sereta ke ngaga mayuh pengawa ti ngalitka ati ba bala kita, ngereja nya ketegal kita ngasika adat tauka ketegal kita arapka utai ke didinga kita?
6 Pia mega, Abraham arapka Jehovah,* lalu iya dikumbai lurus.
7 Kita tentu nemu, sida ke arap nya peturun Abraham.
8 Bup Kudus udah madahka Petara deka ngumbai bansa bukai lurus ketegal sida arap, lalu Bup Kudus udah dulu madahka berita manah tu ngagai Abraham: “Nengah nuan, semua bansa deka diberekat.”
9 Nyadi, semua sida ke arap deka diberekat sama enggau Abraham ke arap.
10 Semua orang ke bepanggai ba adat udah ditinggang sumpah, laban baka ke ditulis ba Bup Kudus: “Awakka tiap iku orang ke enda ngasika semua utai ke ditulis ba gulung surat Adat ditinggang sumpah.”
11 Nambahka nya, kitai nemu enggau terang, nadai orang ulih dikumbai Petara lurus nengah adat, laban “orang ke lurus deka idup ketegal iya arap.”
12 Adat enda minta orang ngayanka diri arap. Tang Adat nya madahka: “Barang sapa ke nitihka Adat deka idup.”
13 Kristus udah meli kitai. Iya ngelepaska kitai ari ditinggang sumpah Adat, lebuh iya nganti kitai nyadi orang ke ditinggang sumpah. Laban Bup Kudus madahka: “Tiap iku orang ke dipantang ba tiang ditinggang sumpah.”
14 Tuju iya, ngambika berekat ke disemaya ngagai Abraham mega diterima bansa bukai nengah Jesus Kristus. Enggau nya, ketegal kitai arap, kitai ulih nerima kuasa kudus Petara ti udah disemayaka.
15 Bala menyadi, awakka aku ngena siti chunto ari pengidup besehari-sehari: Sepengudah siti sempekat disahka, nadai orang ke ulih nginsil tauka nambahka nama-nama utai ba sempekat nya, taja pan sempekat nya semina disahka mensia.
16 Semaya Petara udah dipadah ngagai Abraham enggau ngagai siku peturun iya. Bup Kudus nadai madahka, “ngagai bala peturun nuan,” ke nunjukka sida iya mayuh. Tang Bup Kudus madahka, “ngagai siku peturun nuan,” ke nunjukka ngagai siku orang aja, iya nya Kristus.
17 Aku mega deka madahka pekara tu: Semaya Petara dulu agi diberi, tang Adat nyau bisi 430 taun udah nya. Nya alai, Adat enda ulih nginsil sempekat Petara tauka muai semaya Iya.
18 Enti pesaka nya diberi beduduk ba Adat, reti iya pesaka nya enda agi diberi beduduk ba semaya. Tang Petara enggau manah ati meri Abraham pesaka nya ketegal siti semaya.
19 Enti pia, nama kebuah Adat diberi? Adat diberi kena mandangka pengawa ti salah nyentuk ke peturun ke nerima semaya nya datai, lalu bala melikat madahka Adat nya nengah siku orang tengah.
20 Tang orang tengah enda diguna enti semina siku orang aja ke bekaul enggau sempekat nya, lalu Petara endang siku aja.
21 Kati reti nya Adat belaban enggau semaya Petara? Tentu enda! Enti sema adat ke diberi ulih meri pengidup, reti nya orang ulih dikumbai lurus nengah adat nya.
22 Tang Bup Kudus nyerahka semua orang awakka ditangkap dosa, ngambika sida ke arapka Jesus Kristus ulih nerima semaya Petara.
23 Sebedau kitai arapka Kristus, kitai dijaga adat lalu ditangkap adat, seraya kitai nganti utai ke deka dipandangka Petara nya.
24 Enggau nya, Adat nyadi penyaga* ke ngiring kitai ngagai Kristus, ngambika kitai dikumbai lurus ketegal kitai arap.
25 Tang diatu, pengudah kitai arapka Kristus, kitai enda begunaka penyaga* nya agi.
26 Kebendar iya, semua kita anak Petara, laban kita arapka Jesus Kristus.
27 Nya ketegal semua kita ke dibaptisa ngambika beserakup enggau Kristus udah nyadi baka Kristus.
28 Enda ngira sekalika kita orang Judah tauka orang Gerika, ulun tauka orang ke bibas, lelaki tauka indu, semua kita nadai bida, laban semua kita beserakup, lalu semua kita beserakup enggau Jesus Kristus.
29 Nambahka nya, enti kita enggi Kristus, kita amat peturun Abraham, lalu kita meh ke deka nerima pesaka ke udah disemayaka.
Nota Kaki
^ Peda Penerang Leka Jaku.
^ Peda nota kaki ba Matthew 1:20.
^ Tauka “pengajar.”
^ Tauka “pengajar.”
