Hebrew 3:1-19
3 Nya alai, bala menyadi ke kudus ke sama dikangau* ngagai serega, perundingka enggau dalam pasal Jesus. Kitai ngaku iya nyadi rasul sereta imam besai.
2 Iya tetap ati ngagai Petara ke milih iya, baka Moses ke mega tetap ati ngagai Petara lebuh iya gawa ba semua endur dalam rumah Petara.
3 Orang ke ngaga rumah bulih basa ti besai agi ari rumah nya empu. Pia mega, Jesus layak bulih mulia ti besai agi ari Moses.
4 Tiap iti rumah endang bisi orang ke ngaga iya, tang Petara meh ke ngaga semua utai.
5 Moses gawa enggau tetap ati nyadi ulun ba semua endur dalam rumah Petara, lalu nya ngambarka utai ke deka dipadahka dudi hari.
6 Tang, Kristus ke nyadi Anak Petara nyaga rumah Petara enggau tetap ati. Kitai meh rumah Petara enti kitai mengkang bejaku enggau berani* sereta bepegai rat ba utai ke dianti kitai enggau andal, ke dikemegahka kitai nyentuk ke ujung.
7 Nya alai, baka ke dipadahka nengah kuasa kudus Petara: “Seharitu, enti kita ningaka nyawa Aku,
8 anang ngasuh ati kita kieh* baka aki ini kita ke ngasuh Aku balat amat ringat maya sida nguji Aku ba menua puang.
9 Ba dia meh aki ini kita ngelaban sereta nguji Aku, taja pan sida udah meda semua utai ke digaga Aku pengelama 40 taun.
10 Nya meh kebuah Aku keji ngagai rebak sida nya, lalu madahka: ‘Ati sida seruran limpang, lalu sida enda nemu jalai Aku.’
11 Nya alai, Aku ringat lalu besumpah: ‘Sida enda ulih tama ngagai endur Aku belelak.’”
12 Bala menyadi, bejimat meh enggaika siku ari kita ngembuan ati ti jai sereta enda entu arap ketegal ninggalka Petara ti idup.
13 Tang, anang ngetu meransang pangan diri ninting hari seagi-agi kitai idup ba maya ke dikumbai “Seharitu.” Enggau nya, nadai siku pan ari kita nyadi kieh ketegal kuasa dosa ti ulih nipu.
14 Kitai semina ulih nerima utai ke diterima Kristus enti kitai mengkang andal nyentuk ke ujung, sama baka kitai ke andal maya keterubah iya suba.
15 Baka ke udah dipadah: “Seharitu, enti kita ningaka nyawa Aku, anang ngasuh ati kita kieh baka aki ini kita ke ngasuh Aku balat amat ringat.”
16 Sapa ke mendingka jaku tu, tang agi ga ngasuh Petara balat ringat? Endaka sida nya semua orang ke diiring Moses pansut ari Ejip?
17 Kelimpah ari nya, ngagai sapa Petara berasai keji pengelama 40 taun? Endaka ngagai sida ke bedosa, iya nya sida ke mati ba menua puang?
18 Lebuh Petara besumpah, sapa ke dipadahka Iya enda ulih tama ngagai endur Iya belelak? Endaka sida nya orang ke enda ngasika Iya?
19 Nya alai, kitai ulih beratika, sida enda ulih tama laban sida enda arap.
Nota Kaki
^ Tauka “dibai.”
^ Peda Penerang Leka Jaku, “Bejaku enggau berani.”
^ Tauka “bingking; degil.”
