John 10:1-42
10 “Enggau bendar aku madah ngagai kita: Orang ke enda tama ngagai kandang bedus nengah pintu, tang niki nengah jalai bukai, nya penchuri enggau perumpak.
2 Tang orang ke tama nengah pintu nya pengibun bedus.
3 Orang ke nyaga pintu muka pintu ke iya, lalu raban bedus ningaka nyawa iya. Iya ngangauka nama bedus iya siku-siku lalu nguluka sida pansut.
4 Pengudah iya mai semua bedus iya pansut, iya bejalai ba mua lalu raban bedus iya nitihka iya, laban sida ngelala munyi nyawa iya.
5 Raban bedus nya enda nitihka orang ke enda dikelala sida. Tang, sida deka rari ari orang nya laban sida enda ngelala munyi nyawa orang nya.”
6 Jesus nyebut sempama tu ngagai sida, tang sida enda meretika utai ku iya.
7 Nya alai, Jesus nyebut baru: “Enggau bendar aku madah ngagai kita: Aku meh pintu ke raban bedus.
8 Semua orang ke pura-pura nyadi aku nya penchuri enggau perumpak. Tang raban bedus enda ningaka sida.
9 Aku meh pintu. Orang ke tama nengah aku deka diselamatka. Iya deka tama enggau pansut, lalu iya mega deka tetemuka padang rumput.
10 Penchuri datai semina deka ngenchuri, munuh, sereta ngerusak. Aku datai ngambika bedus bulih pengidup lalu bempu pengidup nya belama iya.
11 Aku tu meh pengibun bedus ti manah. Pengibun bedus ti manah nyerahka nyawa diri ke bedus iya.
12 Orang ke digaji ngibun bedus ukai pengibun bedus, lalu bedus nya ukai enggi iya. Lebuh iya meda serigala datai, iya ninggalka raban bedus nya lalu ngerarika diri. Pengujung iya, serigala nyerang raban bedus nya lalu ngasuh sida pambar rari.
13 Ketegal iya semina orang ke digaji ngibun bedus sereta enda ibuhka raban bedus nya, nya alai iya ngerarika diri.
14 Aku meh pengibun bedus ti manah. Aku ngelala bedus aku lalu bedus aku ngelala aku,
15 baka Apai ke ngelala aku lalu aku ngelala Apai. Aku nyerahka nyawa diri ke bedus aku.
16 “Aku bisi bedus ti bukai ke ukai ari raban tu. Aku mega patut mai raban bedus nya tama. Semua sida deka ningaka nyawa aku, lalu nyadi siti raban ba baruh siku pengibun bedus.
17 Tu meh kebuah Apai rinduka aku, laban aku nyerahka nyawa diri ngambika aku tau bulih iya baru.
18 Nadai orang ngambi nyawa aku, tang aku nyerahka iya laban aku empu ke deka ngereja nya. Aku bisi hak nyerahka iya, lalu aku bisi hak nerima iya baru. Nya meh pesan ke diterima aku ari Apai aku.”
19 Sekali agi, penemu orang Judah nyau enda sebaka baru ketegal jaku Jesus.
20 Mayuh ari sida madahka: “Iya dirasuk melikat ti jai lalu nyau gila. Nama meh kita deka mendingka iya?”
21 Sida ke bukai madahka: “Tu ukai jaku orang ke dirasuk melikat ti jai. Nadai melikat ti jai ulih ngeraika mata orang buta, enda pia?”
22 Maya nya, orang benung ngintu Pengerami Nyerahka Rumah Sembiang ba Jerusalem. Maya nya mega musin chelap.
23 Lalu Jesus benung bejalai ba Serambi* Solomon, ba Rumah Sembiang.
24 Udah nya orang Judah begelumu ngelingi iya lalu bejaku: “Berapa lama nuan deka nejuka kami berunding? Enti nuan nya Kristus, tak padahka aja meh ngagai kami.”
25 Ku Jesus nyaut: “Aku udah madah ngagai kita, tang kita enda arap. Pengawa ke dikereja aku dalam nama Apai aku deka meri saksi pasal aku.
26 Tang kita enda arap laban kita ukai bedus aku.
27 Bedus aku ngelala nyawa aku, aku ngelala sida, lalu sida nitihka aku.
28 Aku meri sida pengidup ti meruan belama iya, lalu sida enda sekali-kali deka dipunaska. Lalu nadai orang ke ulih ngerampas sida ari aku.
29 Sida ke diberi Apai aku ngagai aku berega agi ari utai bukai. Nadai orang ke ulih ngerampas sida ari Apai.
30 Aku enggau Apai beserakup.”*
31 Sekali agi orang Judah ngambi batu kena nuku iya.
32 Ku Jesus bejaku: “Baka ke diasuh Apai, aku udah ngereja mayuh pengawa ti manah ke kita. Ni bagi pengawa ke ngasuh kita deka nuku aku ngena batu?”
33 Ku orang Judah nyaut: “Kami nuku nuan ukai ketegal pengawa manah nuan, tang ketegal nuan bejaku ngelaban Petara. Nuan nya mensia, tang nuan ngumbai diri petara.”
34 Disaut Jesus: “Endaka bisi ditulis ba Adat kita, ‘Petara bejaku: “Nuan nya petara”’?*
35 Lalu kita nemu, jaku ba Bup Kudus enda ulih dibuai. Enti Petara ngumbai orang ke dikutuk ba Bup Kudus nya ‘petara,’
36 patut kita madah ngagai aku, ‘Nuan bejaku ngelaban Petara,’ lebuh aku madahka, ‘Aku Anak Petara,’ taja pan aku dikuduska Apai lalu dikirumka Iya ke dunya?
37 Enti aku enda ngereja pengawa ke diberi Apai aku, anang arapka aku.
38 Tang enti aku ngereja nya, arap meh ke pengawa ke dikereja aku, taja pan kita enda arapka aku. Enggau nya kita deka nemu sereta tetap arap, Apai beserakup enggau aku lalu aku beserakup enggau Apai.”
39 Nya alai, sida nguji baru deka nangkap iya, tang iya ulih ngerarika diri.
40 Jesus mupuk baru ke seberai Sungai Jordan, lalu diau ba din. Nya meh endur John keterubah iya maptisa orang.
41 Mayuh orang datai ngagai iya. Ku sida bejaku enggau pangan diri: “Sekali pan nadai meh John kala ngaga kereja ajih, tang semua utai ke dipadahka John pasal orang tu endang amat.”
42 Nya alai, mayuh orang ba dia arapka Jesus.
Nota Kaki
^ Endur orang bejalai ke bisi atap sereta mayuh tiang.
^ Tauka “endang siku.”
^ Tauka “Nuan baka Petara.”
