John 14:1-31
14 “Anang tusah ati. Arapka Petara, lalu arap mega ke aku.
2 Ba rumah Apai aku, bisi mayuh endur diau. Enti enda, aku enda nyebut munyi nya. Tang diatu, aku deka mupuk nyediaka endur ke kita.
3 Pengudah aku mupuk nyediaka endur ke kita, aku deka datai baru lalu mai kita ngagai rumah aku, ngambika ba dini alai aku, ba dia mega alai kita.
4 Pia mega, kita nemu jalai ngagai endur ke dituju aku.”
5 Thomas bejaku ngagai iya: “Tuan, kami enda nemu kini nuan deka mupuk. Nya alai, baka ni ku kami tau nemu jalai nya?”
6 Ku Jesus madahka: “Aku tu meh jalai, pemendar, enggau pengidup. Nadai orang ulih datai ngagai Apai, enti enda nengah aku.
7 Enti kita ngelala aku, kita tentu mega ngelala Apai aku. Kenyau ari diatu, kita ngelala Iya lalu udah meda Iya.”
8 Philip lalu bejaku ngagai iya: “Tuan, pandangka Apai ngagai kami. Nya pan udah chukup.”
9 Ku Jesus madah ngagai iya: “Aku udah lama begulai enggau kita. Tang Philip, kati ku nuan tak agi enda ngelala aku? Barang sapa udah meda aku, udah mega meda Apai. Nyadi, nama kebuah nuan nyebut, ‘Pandangka Apai ngagai kami’?
10 Kati nuan enda arap aku beserakup enggau Apai lalu Apai beserakup enggau aku? Utai ke dipadahka aku ngagai kita enda datai ari aku empu, tang Apai ke seruran beserakup enggau aku ngereja pengawa Iya nengah aku.
11 Pechaya meh ke aku lebuh aku madahka, aku beserakup enggau Apai lalu Apai beserakup enggau aku. Enti enda, pechaya meh ke utai ti udah digaga aku.
12 Enggau bendar aku madah ngagai kita: Barang sapa ke arapka aku deka ngereja utai ke digaga aku. Kebendar nya, iya deka ngereja utai ti besai agi laban aku deka mupuk ngagai Apai.
13 Pia mega, aku deka ngereja nama-nama utai ke dipinta kita dalam nama aku, ngambika Apai dimuliaka nengah Anak.
14 Enti kita minta nama-nama utai dalam nama aku, aku deka ngereja nya.
15 “Enti kita rinduka aku, kita deka ngasika pesan aku.
16 Aku deka minta ngagai Apai, lalu Iya deka meri kita penulung* bukai ke deka enggau kita belama iya,
17 iya nya kuasa kudus Petara ke mandangka pemendar. Dunya enda ulih nerima kuasa kudus Petara, laban dunya enda ulih meda tauka nemu pasal kuasa kudus nya. Tang kita nemu kuasa kudus nya, laban kuasa nya seruran enggau kita lalu bisi dalam kita.
18 Aku enda ninggalka kita kediri.* Aku deka pulai baru ngagai kita.
19 Enda lama agi, dunya enda meda aku agi. Tang kita deka meda aku, laban aku idup lalu kita mega deka idup.
20 Ba hari nya, kita deka nemu aku beserakup enggau Apai aku. Kita beserakup enggau aku lalu aku beserakup enggau kita.
21 Barang sapa ke nerima lalu nitihka pesan aku nya, orang ke rinduka aku. Barang sapa ke rinduka aku, dikerinduka Apai aku. Lalu aku mega deka rinduka iya. Lalu aku enggau terang deka mandangka diri ngagai iya.”
22 Judas, ukai Judas Iskariot, madah ngagai iya: “Tuan, nama utai ke udah nyadi nyentukka nuan deka enggau terang mandangka diri ngagai kami, tang ukai ngagai dunya?”
23 Ku Jesus bejaku: “Barang sapa ke rinduka aku, deka nitihka ajar aku. Apai aku deka rinduka iya, lalu kami duai deka datai ngagai iya lalu diau enggau iya.
24 Barang sapa enda rinduka aku, enda nitihka ajar aku. Ajar ke didinga kita nya enda datai ari aku, tang datai ari Apai ke udah ngirumka aku.
25 “Aku madah ngagai kita semua utai tu lebuh aku agi enggau kita.
26 Tang penulung nya, iya nya kuasa kudus Petara ke deka dikirumka Apai dalam nama aku, deka ngajar kita semua utai lalu deka ngingatka kita pasal semua utai ke udah disebut aku ngagai kita.
27 Aku ninggalka pengelantang ke kita. Aku meri kita pengelantang aku. Pengelantang ke diberi aku ngagai kita enda sama enggau pengelantang ke diberi dunya. Anang tusah ati lalu anang takut.
28 Kita udah ninga aku madahka, ‘Aku deka mupuk, tang aku deka datai baru ngagai kita.’ Enti kita rinduka aku, kita deka gaga ati laban aku deka mupuk ngagai Apai, laban Apai besai agi ari aku.
29 Nyadi diatu, aku madah ngagai kita utai ke deka nyadi, ngambika lebuh utai nya nyadi, kita deka arap.
30 Kenyau ari diatu, aku enda bejaku mayuh agi enggau kita laban pemerintah dunya tu deka datai, tang iya nadai kuasa atas aku.
31 Taja pia, ngambika dunya nemu aku rinduka Apai, aku ngereja utai ke diasuh Apai kereja aku. Aram kitai mupuk ari tu.”
