John 18:1-40
-
Judas nyerahka Jesus ngagai munsuh (1-9)
-
Peter ngena pedang (10, 11)
-
Jesus dibai ngagai Anas (12-14)
-
Peter keterubah kali enggai ngaku ngelala Jesus (15-18)
-
Jesus ba mua Anas (19-24)
-
Dua kali agi Peter enggai ngaku ngelala Jesus (25-27)
-
Jesus ba mua Pilate (28-40)
-
“Perintah aku ukai sebagi ari dunya tu” (36)
-
18 Pengudah Jesus besampi munyi nya, iya ngagai siti taman ba seberai Lebak Kidron enggau bala murid iya.
2 Judas, orang ke deka nyerahka iya ngagai munsuh, mega nemu endur nya, laban Jesus suah betemu enggau bala murid iya ba dia.
3 Nya alai, Judas datai kia enggau seraban soldadu sereta bala jejaga ke dianjung bala tuai imam enggau orang Parisi. Sida datai bebaika sempun api, lampu kelita, enggau senyata.
4 Jesus nemu semua utai ke deka nyadi ngagai iya. Nya alai, iya mansang ke mua lalu madah ngagai sida: “Sapa orang ke digiga kita?”
5 Ku sida nyaut: “Jesus orang Nasaret.” Ku Jesus madahka: “Aku meh orang ke digiga kita.” Judas, orang ke nyerahka iya ngagai munsuh, mega bediri enggau sida.
6 Tang lebuh Jesus nyaut, “Aku meh orang ke digiga kita,” sida surut lalu labuh ke tanah.
7 Nya alai, iya nanya sida baru: “Sapa ke digiga kita?” Sida nyaut: “Jesus orang Nasaret.”
8 Ku Jesus nyaut: “Aku udah madah ngagai kita, aku meh orang ke digiga kita. Enti aku orang ke digiga kita, lepaska sida tu.”
9 Iya nyebut munyi nya kena ngamatka jaku ti udah disebut iya: “Aku enda lenyau siku pan ari semua orang ke udah diberi Nuan ngagai aku.”
10 Udah nya, Simon Peter nyintak* pedang ke dibai iya. Iya nyerang ulun imam besai lalu mutuska pending kanan ulun nya. Nama ulun nya Malkus.
11 Tang Jesus madah ngagai Peter: “Selitka pedang nya. Endaka aku patut ngirup ari mangkuk* ke diberi Apai ngagai aku?”
12 Udah nya, bala soldadu, ketuai soldadu, enggau bala jejaga orang Judah nangkap Jesus lalu nanchang iya.
13 Keterubah, sida mai iya ngagai Anas, iya nya mentua lelaki Kaiapas. Kaiapas nyadi imam besai taun nya.
14 Kebendar iya, Kaiapas meh ke kala madah ngagai orang Judah, sida deka bulih penguntung enti siku orang mati ke bansa sida.
15 Simon Peter enggau siku da agi murid nitihka Jesus. Murid nya dikelala imam besai. Nya alai, iya tama enggau Jesus ngagai laman rumah imam besai.
16 Tang Peter bediri ba luar pintu penama. Nya alai, murid ke dikelala imam besai nya pansut bejaku enggau ulun indu ke nyaga pintu. Udah nya, baru Peter dibai tama.
17 Ulun indu nya nanya Peter: “Ukai enda nuan mega siku ari murid lelaki nya?” Peter nyaut: “Ukai.”
18 Ketegal hari chelap, bala ulun enggau bala jejaga ngidupka api ngena arang, lalu bediri ba dia ngambika enda chelap. Peter mega bediri enggau sida ba dia.
19 Tuai imam lalu nanya Jesus pasal bala murid iya sereta pasal utai ke diajar iya.
20 Ku Jesus nyaut: “Aku suah bejaku ba mua orang mayuh. Aku enda kala belalai nyebut utai. Aku suah ngajar ba balai gempuru enggau ba Rumah Sembiang, iya nya endur semua orang Judah begempuru.
21 Nama kebuah kita nanya aku? Tanya meh sida ke kala ninga jaku aku. Sida tentu nemu utai ke disebut aku.”
22 Pengudah Jesus nyebut munyi nya, siku jejaga ke bediri ba dia nampar mua Jesus, lalu madahka: “Baka nya chara nuan nyaut tuai imam pia?”
23 Jesus nyaut: “Enti aku nyebut utai ti salah, padah ngagai aku utai salah ke disebut aku nya. Tang enti utai ke disebut aku nya betul, nama kebuah nuan nampar aku deh?”
24 Udah nya, Anas ngasuh orang mai Jesus ngagai Imam Besai Kaiapas. Maya nya, Jesus agi ditanchang.
25 Lebuh Simon Peter agi benung bediri ngangatka diri semak api, orang bukai lalu nanya iya: “Ukai enda nuan mega siku ari murid iya?” Iya enggai ngaku lalu madahka: “Ukai.”
26 Siku ulun imam besai, iya nya kaban belayan lelaki ke pending iya ditetak Peter, madahka: “Ukai enda nuan ke dipeda aku enggau iya ba taman nya?”
27 Tang sekali agi, Peter enggai ngaku. Tekala nya, manuk lalu engkukuk.
28 Maya tumu pagi, sida mai Jesus ari rumah Kaiapas ngagai rumah gabenor. Tang sida enda tama ngagai rumah gabenor, enggaika sida nyadi enda tuchi lalu enda ulih makai pemakai Pengerami Paska.
29 Nya alai, Pilate pansut lalu nanya sida: “Nama jaku tuduh kita ngagai lelaki tu?”
30 Ku sida nyaut iya: “Enti lelaki tu enda ngereja penyalah, enda kami nyerahka iya ngagai nuan.”
31 Pilate lalu bejaku: “Bai iya pansut lalu akim iya nitihka adat kita.” Orang Judah nyaut: “Kami nadai kuasa munuh orang.”
32 Nyadi tu ngamatka utai ke disebut Jesus pasal chara iya deka mati.
33 Pilate tama baru ngagai rumah gabenor, lalu ngangauka Jesus. Ku iya nanya: “Kati nuan Raja orang Judah?”
34 Ku Jesus nyaut: “Kati nuan nanya munyi nya ari runding nuan empu, tauka bisi orang bukai ke madah ngagai nuan pasal aku?”
35 Pilate madahka: “Aku ukai orang Judah. Bansa nuan empu enggau bala tuai imam ke nyerahka nuan ngagai aku. Nama utai ke udah digaga nuan?”
36 Ku Jesus nyaut: “Perintah aku ukai sebagi ari dunya tu. Enti Perintah aku sebagi ari dunya tu, bala murid aku tentu ngetanka aku ngambika aku enda diserahka ngagai orang Judah. Tang Perintah aku ukai ari dunya tu.”
37 Nya alai, Pilate madah ngagai iya: “Enti pia, kati nuan tu raja?” Ku Jesus nyaut: “Nuan empu ke nyebut aku tu raja. Aku patut besaksi pasal pemendar. Laban ketegal nya meh aku ada lalu datai ke dunya. Tiap iku orang ke nyukung pemendar ningaka nyawa aku.”
38 Pilate madah ngagai iya: “Nama pemendar nya?”
Pengudah Pilate bejaku munyi nya, iya pansut baru lalu madah ngagai orang Judah: “Aku nadai tetemuka penyalah lelaki tu.
39 Pia mega, nitihka adat kita, aku patut ngelepaska siku lelaki maya Pengerami Paska. Nya alai, kati kita deka aku ngelepaska Raja orang Judah?”
40 Sida manjung baru: “Anang ngelepaska orang tu! Lepaska Barabas.” Kebendar iya, Barabas nya siku perumpak.
Nota Kaki
^ Tauka “mansutka.”
^ Tu ngambarka peneka Petara ke ngemendarka Jesus mati ketegal dituduh bejaku ngelaban Petara.
