John 6:1-71
6 Udah nya, Jesus ngelayang Danau Galili ke seberai. Danau nya mega dikumbai Danau Tiberias.
2 Mayuh orang majak nitihka iya, laban sida udah meda kereja ajih ke digaga iya kena ngeraika orang ke sakit.
3 Nya alai, Jesus niki ngagai siti bukit lalu duduk ba dia enggau bala murid iya.
4 Maya nya, Pengerami Paska orang Judah nyau semak.
5 Lebuh Jesus meda mayuh amat orang datai ngagai iya, iya lalu bejaku ngagai Philip: “Dini kitai ulih meli roti ke diempa bala orang tu?”
6 Kebendar iya, Jesus nyebut munyi nya kena nguji Philip, laban iya nemu nama utai ke deka digaga diri.
7 Philip lalu nyaut iya: “Taja pan kitai ngena 200 denari* meli roti, enti disadung mimit-mimit ngagai tiap iku orang, enda meh roti nya chukup.”
8 Siku ari murid Jesus, iya nya Andrew, menyadi endar Simon Peter, bejaku ngagai Jesus:
9 “Siku anak mit lelaki ba ditu bisi lima iti tuku roti* enggau dua iku ikan ti mit. Tang ni nya chukup ke bala mayuh ditu?”
10 Jesus lalu bejaku: “Asuh sida duduk.” Ba endur nya bisi mayuh rumput. Nya alai semua orang pan duduk. Ba dia bisi kira-kira 5,000 iku lelaki.
11 Udah nya, Jesus ngambi roti nya, besampi meri terima kasih, lalu nyadung roti nya ngagai semua orang ke duduk ba dia. Iya mega ngereja utai ti sama enggau ikan mit nya, lalu semua orang makai sampai kenyang.
12 Pengudah sida kenyang magang, ku Jesus bejaku ngagai bala murid iya: “Gumpul teda roti nya ngambika enda tebasau ngapa.”
13 Nya alai, pengudah orang makai lima iti tuku roti nya, teda roti ke digumpul sida ngemenuhka 12 iti bakul.
14 Lebuh orang mayuh meda kereja ajih ke digaga iya, sida lalu bejaku: “Iya endang Nabi ti disemaya ke deka datai ke dunya.”
15 Jesus nemu sida deka datai lalu ngansak iya nyadi raja sida. Nya alai, Jesus mupuk kediri baru ngagai bukit.
16 Lebuh hari nyauka malam, bala murid Jesus nurun ngagai danau.
17 Sida nepan perau lalu ngelayang ke seberai ngagai Kapernaum. Maya nya hari nyau udah petang, tang Jesus agi bedau datai ngagai sida.
18 Danau majak begelumbang laban dipuputka ribut ti balat.
19 Tang lebuh sida udah bekayuh kira-kira lima tauka enam kilometer,* sida tepedaka Jesus bejalai ba atas ai. Lebuh Jesus mansang semak ngagai perau sida, sida balat takut.
20 Tang ku iya bejaku ngagai sida: “Anang takut! Aku tu.”
21 Nya baru sida deka mai iya nepan perau. Enda lama udah nya, perau sida datai ba endur ke dituju.
22 Hari siti, orang mayuh ke agi ba seberai danau nya nadai meda perau ba dia. Sebedau nya, bisi siti perau ti mit ba dia, tang Jesus enda nepan perau nya enggau bala murid iya, laban bala murid iya udah mupuk dulu kediri.
23 Maya nya mega, beberapa iti perau ari Tiberias datai semak endur sida ke makai roti pengudah Tuan besampi meri terima kasih.
24 Laban orang mayuh nadai meda Jesus tauka bala murid iya ba dia, sida pan nepan perau nya lalu mupuk ngagai Kapernaum ngiga Jesus.
25 Lebuh sida tetemuka iya ba seberai danau, ku sida bejaku ngagai iya: “Rabbi,* kemaya nuan datai ba ditu?”
26 Ku Jesus nyaut: “Enggau bendar aku madah ngagai kita: Kita ngiga aku ukai laban kita udah meda kereja ajih, tang laban kita udah kenyang makai roti.
27 Anang bekereja ngulihka pemakai ti nemu jai, tang bekereja meh ke pemakai ti ulih tan sereta meri pengidup ti meruan belama iya. Anak Mensia deka meri pemakai nya ngagai kita laban Apai, iya nya Petara Empu, udah ngemendarka iya ngereja nya.”*
28 Sida lalu nanya iya: “Nama patut dikereja kami ngambika ulih ngereja pengawa ke diberi Petara?”
29 Ku Jesus nyaut: “Kena ngereja pengawa ke diberi Petara, kita patut arapka iya ke dikirumka Petara.”
30 Nya alai sida bejaku ngagai iya: “Enti pia, nama kereja ajih ke deka digaga nuan ngambika kami meda iya lalu arapka nuan? Nama deka digaga nuan?
31 Aki ini kami makai manna ba menua puang, baka ke udah ditulis: ‘Iya meri sida roti ari serega* ke diempa sida.’”
32 Nya alai Jesus bejaku ngagai sida: “Enggau bendar aku madahka: Ukai Moses ke meri kita roti ti bendar ari serega, tang Apai aku.
33 Laban roti ke diberi Petara nya, iya ke nurun ari serega lalu meri pengidup ngagai dunya.”
34 Nya alai sida bejaku ngagai iya: “Tuan, beri meh kami roti nya selalu.”
35 Jesus bejaku ngagai sida: “Aku meh roti ke meri pengidup. Barang sapa ke datai ngagai aku enda agi lapar, lalu barang sapa ke arapka aku enda agi aus.
36 Tang baka ke udah dipadah aku ngagai kita, kita udah meda aku tang kita agi enda arap.
37 Semua orang ke diberi Apai ngagai aku deka datai ngagai aku, lalu aku enda sekali-kali deka muru orang ke datai ngagai aku.
38 Laban aku nurun ari serega ukai deka ngereja peneka aku empu, tang ngereja peneka Iya ke ngirumka aku.
39 Tu meh peneka Iya ke ngirumka aku, iya nya aku enda tau lenyau siku pan ari semua orang ke udah diberi Iya ngagai aku. Tang aku patut ngangkatka semua sida idup baru jemah ila.*
40 Laban tu meh peneka Apai aku, iya nya genap iku orang ke nerima Anak lalu arapka iya deka bulih pengidup ti meruan belama iya, lalu aku deka ngangkatka iya idup baru jemah ila.”*
41 Orang Judah lalu mutap pasal iya laban iya udah nyebut: “Aku tu meh roti ke nurun ari serega.”
42 Ku sida bejaku: “Endaka iya tu Jesus anak Josep? Kitai ngelala apai indai iya. Baka ni ku iya diatu tau nyebut, ‘Aku udah nurun ari serega’?”
43 Jesus lalu nyaut sida: “Badu agi kita mutap.
44 Nadai orang ulih datai ngagai aku enti Apai ke ngirumka aku enda mai* iya ngagai aku. Lalu aku deka ngangkatka iya idup baru jemah ila.”*
45 Ba Ajar Sida Nabi, endang udah ditulis: ‘Semua sida deka diajar Jehovah.’ Genap iku orang ke udah ningaka Apai lalu belajar ari Iya, datai ngagai aku.
46 Tu ukai reti iya bisi orang kala meda Apai. Semina iya ke datai ari Petara kala meda Apai.
47 Enggau bendar aku madah ngagai kita: Orang ke arap deka idup belama iya.
48 “Aku meh roti ke meri pengidup.
49 Aki ini kita makai manna ba menua puang, taja pia sida agi mati.
50 Tang barang sapa makai roti ke nurun ari serega enda mati.
51 Aku meh roti pengidup ke nurun ari serega. Barang sapa makai roti tu deka idup belama iya. Kebendar iya, roti ke deka diberi aku nya tubuh aku, ngambika mensia bulih pengidup.”
52 Orang Judah lalu bekelikuh enggau pangan diri. Ku sida: “Baka ni ku orang tu ulih meri tubuh iya ke diempa kitai?”
53 Nya alai, Jesus bejaku ngagai sida: “Enggau bendar aku madahka: Enti kita enda makai tubuh Anak Mensia, lalu enda ngirup darah iya, kita nadai bulih pengidup.*
54 Barang sapa makai tubuh aku lalu ngirup darah aku deka bulih pengidup ti meruan belama iya. Aku deka ngangkatka iya idup baru jemah ila.*
55 Laban tubuh aku nya pemakai ti bendar, lalu darah aku nya ai irup ti bendar.
56 Barang sapa ke makai tubuh aku lalu ngirup darah aku deka meruan beserakup enggau aku, lalu aku beserakup enggau iya.
57 Apai ke idup ngirumka aku, lalu aku idup ketegal Apai. Pia mega, barang sapa ke makai tubuh aku deka idup ketegal aku.
58 Tu meh roti ke nurun ari serega. Barang sapa ke makai roti tu deka idup belama iya. Roti tu enda baka utai ke diempa aki ini kita. Sida makai tang agi mati.”
59 Nya meh utai ke disebut Jesus lebuh iya ngajar ba balai gempuru* ba Kapernaum.
60 Pengudah ninga jaku Jesus, mayuh bala murid iya madahka: “Jaku nya enda ulih diterima. Sapa deka mendingka utai munyi nya?”
61 Jesus nemu bala murid iya benung mut-mut pasal utai tu. Nya alai, iya bejaku: “Enti utai tu pan udah ngasuh kita enda nyamai ati,*
62 bedau agi enti kita meda Anak Mensia niki ngagai endur asal iya.
63 Kuasa kudus Petara meh ke meri pengidup, ukai utai ke ulih digaga mensia. Utai ke disebut aku ngagai kita, datai ari kuasa kudus Petara, lalu ulih meri pengidup.
64 Tang bisi sekeda ari kita enda arap.” Kenyau ari pun, Jesus udah nemu, sapa ke enda arap, lalu sapa ke deka nyerahka iya ngagai munsuh.
65 Ku iya agi: “Nya meh kebuah aku madah ngagai kita: Nadai orang ulih datai ngagai aku, enti Apai enda ngemendarka nya.”
66 Ketegal nya, mayuh ari bala murid iya nikal baru ngagai utai ke udah ditinggalka sida, lalu badu agi nitihka iya.
67 Nya alai, Jesus bejaku ngagai 12 iku rasul iya: “Kati kita mega deka mupuk?”
68 Simon Peter lalu nyaut iya: “Tuan, ngagai sapa kami patut mupuk? Jaku nuan meri pengidup ti meruan belama iya.
69 Kami udah arap lalu nemu, nuan meh Nembiak Petara ti Kudus.”
70 Ku Jesus nyaut sida: “Endaka aku udah milih kita 12 iku? Taja pia, siku ari kita nya baka Sitan.”*
71 Kebendar nya, Jesus benung bejaku pasal Judas anak Simon Iskariot. Taja pan Judas nya siku ari 12 iku rasul iya, tang Judas meh ke deka nyerahka iya ngagai munsuh.
Nota Kaki
^ Sesingkap denari sama penyampau enggau gaji sehari.
^ Tauka “roti barli.”
^ Jaku Asal, “kira-kira 25 tauka 30 stadium.” Siti stadium kira 185 m (606.95 kaki).
^ Tauka “Pengajar.”
^ Tauka “udah ngengkahka chop Iya ba Anak Mensia.”
^ Tauka “langit.”
^ Jaku Asal, “ba hari ti penudi.”
^ Jaku Asal, “ba hari ti penudi.”
^ Jaku Asal, “narit; narit ati.”
^ Jaku Asal, “ba hari ti penudi.”
^ Jaku Asal, “nadai pengidup dalam kita.”
^ Jaku Asal, “ba hari ti penudi.”
^ Tauka engka, “ba mua orang mayuh.”
^ Jaku Asal, “ngasuh kita labuh.”
^ Jaku Gerika, “di·a′bo·los.” Leka jaku tu dikena ba orang ke ngenyaika nama manah orang bukai.
