Kolosi 4:1-18
4 Kita ke nyadi tuan, intu meh ulun kita enggau lurus sereta ngena chara ti patut, laban kita nemu kita mega bisi Tuan ba serega.
2 Anang ngetu besampi, mengkang bejaga sereta meri terima kasih.
3 Ba maya ti sama, besampi mega ke kami ngambika Petara meri kami peluang* nusui pesan nya sereta resia ti kudus pasal Kristus. Ketegal nya meh aku dijil.
4 Besampi mega ngambika aku ulih nusui pesan nya enggau terang, baka ke patut digaga aku.
5 Kita patut bepenemu-dalam lebuh begulai enggau orang ke ukai ari raban gempuru. Kena* meh awak kita enggau manah.
6 Awakka jaku kita seruran ngelantangka ati, baka pemakai ke dichampur garam, ngambika kita nemu chara deka nyaut tiap iku orang.
7 Tikikus, menyadi ke dikerinduka aku, ke sama tetap ati gawa enggau aku ke Tuan, deka madahka semua rita aku ngagai kita.
8 Aku nganjung iya ngagai kita, ngambika kita nemu rita kami, lalu ngambika iya ulih ngelantangka ati kita.
9 Iya deka datai enggau Onesimus, menyadi ke tetap ati sereta dikerinduka aku, ke kala enggau kita suba. Seduai iya deka madah ngagai kita pasal semua utai ke nyadi ba ditu.
10 Aristarkus, ke dijil baka aku, ngirumka salam ngagai kita. Pia mega enggau Mark, iya nya petunggal Barnabas, (pasal Mark, kita udah diasuh nyambut penatai iya enti iya datai ngagai kita),
11 enggau Jesus ke dikumbai Justus. Sida orang ke besunat.* Semina sida meh ke sama gawa enggau aku ke Perintah Petara, lalu sida meh ke balat ngelantangka ati* aku.
12 Epafras, siku ulun Jesus Kristus, ke kala enggau kita suba, mega ngirumka salam ngagai kita. Iya seruran bebendar besampi ke kita, ngambika kita ulih bediri tegap baka orang ke besai tuai, lalu amat andalka semua peneka Petara.
13 Aku empu ulih nyadi saksi. Iya bebendar gawa ke penguntung kita sereta ke bala sida ba Laudisia enggau Hierapolis.
14 Luke, lutur ke dikerinduka kitai, enggau Demas, ngirumka salam ngagai kita.
15 Kirumka salam aku ngagai bala menyadi ba Laudisia, enggau ngagai menyadi indu kitai, Nimfa, sereta ngagai raban gempuru ke begelumu ba rumah iya.
16 Pengudah surat tu dibacha ngagai kita, gaga atur ngambika surat tu dibacha ngagai raban gempuru ba Laudisia. Kita empu mega patut macha surat ke dituju ngagai raban gempuru Laudisia.
17 Kelimpah ari nya, padahka ngagai Arkipus: “Peratika pengawa ke diterima nuan ari Tuan, ngambika nuan ulih nembuka iya.”
18 Aku, Paul, ngirumka salam ngagai kita, lalu tu ditulis aku empu. Kingatka aku ke agi benung dijil. Ngarapka semua kita nerima pemanah ati Petara ti besai.
Nota Kaki
^ Tauka “muka pintu awakka kami.”
^ Jaku Asal, “Beli.”
^ Tauka “betutus.”
^ Tauka “nulung sereta ngeringka.”
